ក្រសួងសុខាភិបាលនៅថ្ងៃច័ន្ទនេះបានឲ្យដឹងថាមនុស្សជាង៥០០នាក់ទៀតបានឆ្លងជំងឺកូវីដ១៩ ខណៈអ្នកស្លាប់ថ្មីមានចំនួន៦នាក់។
ក្នុងសេចក្តីប្រកាសព័ត៌មានមួយ ក្រសួងបានឲ្យដឹងថាក្នុងចំណោមករណីឆ្លងចុងក្រោយបំផុតនេះ ករណីឆ្លងថ្មីក្នុងព្រឹត្តិការណ៍២០កុម្ភៈ មានចំនួន៤៩៥នាក់ ដែលនាំឲ្យករណីឆ្លងសរុបចាប់តាំងពីផ្ទុះឆ្លងថ្ងៃទី២០ ខែកុម្ភៈ បានកើនឡើងដល់ជិត២ម៉ឺននាក់។ មនុស្សប្រមាណ១២.០០០នាក់ កំពុងសម្រាកព្យាបាលជំងឺកូវីដ១៩។
ក្រសួងសុខាភិបាលឲ្យដឹងថាមនុស្ស៦នាក់ទៀតបានស្លាប់ ដោយសារជំងឺកូវីដ១៩ ដែលនាំឲ្យករណីស្លាប់សរុបបានកើនឡើងដល់១២៦នាក់។
នាយកដ្ឋានប្រយុទ្ធប្រឆាំងនឹងជំងឺឆ្លងCDCនៃក្រសួងសុខាភិបាលបានបញ្ជាក់នៅលើទំព័រហ្វេសប៊ុករបស់ខ្លួននៅថ្ងៃច័ន្ទនេះថា៖ «ជំងឺកូវីដ១៩នៅតែបន្តគំរាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះ»។
គួរបញ្ជាក់ថាតំបន់ខ្លះនៅរាជធានីភ្នំពេញដែលត្រូវបានកំណត់ជាតំបន់ក្រហមនិងលឿងទុំ ត្រូវបានរាំងខ្ទប់ដដែល រហូតដល់ថ្ងៃទី១២ ខែឧសភា។ អាជ្ញាធរបានឲ្យដឹងថាករណីរកឃើញឆ្លងថ្មីភាគច្រើនចេញពីតំបន់ក្រហមនិងលឿងទុំ៕
