នៅថ្ងៃចន្ទនេះ អនុប្រធានាធិបតីសហរដ្ឋអាមេរិកអ្នកស្រី Kamala Harris នឹងទទួលជួបពិភាក្សាជាមួយមន្ត្រីមួយរូបនៃគណៈរដ្ឋមន្ត្រីទទួលបន្ទុកកិច្ចការសង្គ្រាមរបស់អ៊ីស្រាអែលដែលកំពុងធ្វើទស្សនកិច្ចនៅរដ្ឋធានីវ៉ាស៊ីនតោន។ មន្ត្រីអ៊ីស្រាអែលរូបនេះធ្វើទស្សនកិច្ចនៅសហរដ្ឋអាមេរិកនេះ ដោយមិនមានការអនុញ្ញាតពីនាយករដ្ឋមន្ត្រីអ៊ីស្រាអែលលោក Benjamin Netanyahu ទេ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
លោក Benny Gantz ដែលជាអ្នកនយោបាយប្រកាន់ទស្សនៈកណ្ដាលនិយមនិងជាគូប្រជែងរបស់លោក Netanyahu នឹងជួបពិភាក្សាជាមួយនឹងមន្ត្រីជាន់ខ្ពស់ជាច្រើនរូបនៃរដ្ឋបាលប្រធានាធិបតីសហរដ្ឋអាមេរិកលោក Joe Biden នៅសប្ដាហ៍នេះ ដែលក្នុងនោះរួមទាំងអ្នកស្រី Harris លោករដ្ឋមន្ត្រីការបរទេស Antony Blinken និងទីប្រឹក្សាសន្តិសុខជាតិសេតវិមានលោក Jake Sullivan ផងដែរ។ លោក Biden កំពុងស្ថិតនៅរមណីយដ្ឋានលំហែកាយ Camp David នៅក្រៅរដ្ឋធានីវ៉ាស៊ីនតោននិងបន្តស្នាក់នៅទីនោះរហូតដល់ថ្ងៃអង្គារស្អែក។
មន្ត្រីមួយរូបមកពីគណបក្ស Likud ដែលជាគណបក្សស្ដាំនិយមរបស់លោក Netanyahu បាននិយាយថា លោក Gantz មិនមានការអនុញ្ញាតពីលោក Netanyahu ដើម្បីចូលរួមក្នុងជំនួបទាំងនេះនៅរដ្ឋធានីវ៉ាស៊ីនតោនទេ និងថាលោក Netanyahu បាន «និយាយខ្លាំងៗ» ទៅកាន់លោក Gantz។ ករណីនេះគូសបញ្ជាក់ឱ្យឃើញអំពីការប្រេះស្រាំដ៏ធំនៅក្នុងរង្វង់ថ្នាក់ដឹកនាំគណៈរដ្ឋមន្ត្រីកិច្ចការសង្គ្រាមរបស់អ៊ីស្រាអែលក្នុងរយៈពេលជិត ៦ ខែកន្លងមកនៃសង្គ្រាមរវាងអ៊ីស្រាអែលនិងក្រុមហាម៉ាស់ (Hamas)។
នៅក្នុងជំនួបជាមួយនឹងលោក Gantz អ្នកស្រី Harris គ្រោងនឹងសង្កត់ធ្ងន់ឱ្យមានកិច្ចព្រមព្រៀងលើបទឈប់បាញ់ជាបណ្ដោះអាសន្នមួយរវាងអ៊ីស្រាអែលនិងក្រុមហាម៉ាស់ ដែលនឹងអនុញ្ញាតឱ្យមានការដោះលែងចំណាប់ខ្មាំងជាច្រើនដែលក្រុមហាម៉ាស់កំពុងចាប់ឃុំ។
មន្ត្រីជាន់ខ្ពស់រដ្ឋបាលលោក Biden មួយរូបបានបញ្ជាក់ថា អ៊ីស្រាអែលបានយល់ព្រមជាមូលដ្ឋានចំពោះកិច្ចព្រមព្រៀងនេះ ហើយសេតវិមានបានសង្កត់ធ្ងន់ថា ការសម្រេចបានកិច្ចព្រមព្រៀងនេះគឺអាស្រ័យលើក្រុមហាម៉ាស់នៅពេលឥឡូវនេះ។
សម្រាប់លោក Gantz វិញ លោកមានបំណងពង្រឹងទំនាក់ទំនងជាមួយសហរដ្ឋអាមេរិក ទ្រទ្រង់ការគាំទ្រចំពោះសង្គ្រាមរបស់អ៊ីស្រាអែល និងជំរុញឱ្យមានការដោះលែងចំណាប់ខ្មាំងអ៊ីស្រាអែលដែលក្រុមហាម៉ាស់ចាប់ឃុំ។ នេះបើយោងតាមការបញ្ជាក់របស់មន្ត្រីអ៊ីស្រាអែលមួយរូបទៀត។
ជំនួបទាំងនេះបានធ្វើឡើងចំពេលដែលសហរដ្ឋអាមេរិកចាប់ផ្ដើមទម្លាក់ជំនួយជាបន្តបន្ទាប់ទៅក្នុងតំបន់ហ្កាហ្សា (Gaza)។ ការទម្លាក់ជំនួយនេះបានធ្វើឡើងក្នុងពេលប៉ុន្មានថ្ងៃក្រោយមកបន្ទាប់ពីជនជាតិប៉ាឡេស្ទីនរាប់សិបនាក់ត្រូវបានសម្លាប់ នៅពេលដែលអ្នកទាំងនោះព្យាយាមទាញយកម្ហូបអាហារពីកងរថយន្តដែលមានការចាត់តាំងរបស់អ៊ីស្រាអែល។
សហរដ្ឋអាមេរិកបានទម្លាក់ជំនួយដំបូងកាលពីថ្ងៃសៅរ៍ទៅក្នុងផ្នែកនិរតីក្នុងតំបន់ហ្កាហ្សា ហើយមន្ត្រីសេតវិមានបាននិយាយថា ការទម្លាក់ជំនួយទាំងនេះនឹងបន្តរហូតដើម្បីបំពេញបន្ថែមពីលើការបញ្ជូនជំនួយតាមរថយន្តដឹកទំនិញ ស្របពេលដែលសហរដ្ឋអាមេរិកកំពុងធ្វើការលើការបញ្ជូនជំនួយផងដែរតាមផ្លូវសមុទ្រ៕
វេទិកាបញ្ចេញមតិ