សេតវិមានបាននិយាយនៅក្នុងសប្តាហ៍ចុងក្រោយបង្អស់នៃខែវិច្ឆិកាថាលោកស្រីអនុប្រធានាធិបតី Kamala Harris នឹងដឹកនាំគណៈប្រតិភូសហរដ្ឋអាមេរិកទៅកាន់សន្និសីទកំពូលអាកាសធាតុសំខាន់បំផុតនៃពិភពលោក ដែលនៅទីនោះនឹងមានវាយតម្លៃអំពីការជឿនលឿនក្នុងការប្រឹងប្រែងបញ្ឈប់ភាពអាកាសក្តៅជាងមុនក្នុងសាកលលោក។
សេតវិមានបានបញ្ជាក់ថាលោកប្រធានាធិបតីJoe Biden ចាត់ទុកវិបត្តិអាកាសធាតុក្នុងចំណោមអាទិភាពកំពូលបួនរបស់លោក តែសង្គ្រាមកាលពីពេលថ្មីៗនេះរវាងអ៊ីស្រាអែលនិងក្រុមហាម៉ាស់បាននាំឱ្យលោកចំណាយពេលនិងការយកចិត្តទុកដាក់ច្រើន។
លោកស្រី Kirsten Allen អ្នកនាំពាក្យលោកស្រីអនុប្រធានាធិបតីបាននិយាយកាលពីថ្ងៃពុធទី២៩វិច្ឆិកាថា«តាមរយៈទំនាក់ទំនងរបស់លោកស្រី លោកស្រីអនុប្រធានាធិប តីនឹងគូសបញ្ជាក់ជោគជ័យរបស់រដ្ឋបាលលោក Biden និងលោកស្រី Harris ក្នុងការធ្វើឱ្យសម្រេចរបៀបវារៈធាតុអាកាស ទាំងនៅក្នុងប្រទេសនិងទាំងនៅក្រៅប្រទេស»។
សេតវិមានបានថ្លែងថាលោកស្រី Harris នឹងដឹកនាំមន្ត្រីអាមេរិកជាន់ខ្ពស់រាប់សិបនាក់ មានរួមទាំងលោក John Kerry ប្រេសិតពិសេសរបស់ប្រធានាធិបតីខាងអាកាសធាតុនិងពួកមន្ត្រីឯទៀតៗមកពីទីភ្នាក់ងារនិងមន្ទីរជាង២០។
សន្និសីទនៃក្រុមភាគី Conference of the Parties ដែលជាការប្រជុំបែបនេះលើកទី២៨ នឹងត្រូវចាត់ចែងដោយព្រះចៅ Mohamed bin Zayed នៃប្រទេសអារ៉ាប់រួមអេមីរ៉ាត។ ព្រះចៅអង្គនេះដែលបានកាន់តំណែងក្រោយការសុគតនៃព្រះរៀមទ្រង់កាលពីឆ្នាំ ២០២២ ក៏ជាប្រធានក្រុមប្រឹក្សាកំពូលប្រេងដែលជាអង្គការកំពូលគ្រប់គ្រងប្រេង ឧស្ម័ននិងឧស្សាហកម្មពាក់ព័ន្ធនៃអាមីរ៉ាត Abu Dhabi។
ក្រុមប្រតិភូជាង៧ ម៉ឺននាក់មកពីប្រទេសជិត២០០ចាប់ផ្តើមមកដល់ក្រុងឌូបៃដែលមានឬសគល់ពីភូមិអ្នកនេសាទហើយបានក្លាយទៅជាក្រុងធំមួយដោយសារធនធានប្រេងដ៏ធំធេងរបស់ផងខ្លួន។
នៅទីនោះ នៅក្នុងក្រុងមួយដែលគេស្គាល់ដោយសារប្រជុំកោះសិប្បនិមិត្តនិងហាងលក់ទំនិញសែនទំនើបនៅក្នុងអគារហាងទំនិញទំនើបបំផុតមួយមានទំហំស្មើនឹងវាលកីឡាបាល់ទាត់៥០ ព្រមទាំងមានកន្លែងលេងស្គីនិងសត្វ penguins ផង ក្រុមប្រតិភូទាំងនេះនឹងស្ទង់ប៉ាន់មើលការជឿនលឿនអំពីគោលដៅកម្រិតកម្តៅសាកលត្រឹម ១,៥អង្សាសេលើសកម្រិតមុនឧស្សាហកម្ម៕
ប្រែសម្រួលដោយលោក ឈឹម សុមេធ
លោកស្រីអនុប្រធានាធិបតី Harris នឹងដឹកនាំគណៈប្រតិភូសហរដ្ឋអាមេរិកទៅកាន់សន្និសីទកំពូលអាកាសធាតុធំមួយ
