ភ្ជាប់​ទៅ​គេហទំព័រ​ទាក់ទង

​លោក​ Hariri ពន្យារ​ពេល​ក្នុង​ការ​លាលែង​ពី​តំណែង


ក្រុម​អ្នក​គាំទ្រ​លោក Saad al-Hariri ដែល​បាន​ពន្យារ​ការលា​លែង​ពី​តំណែង កំពុង​កាន់​ទង់​ជាតិ​នៅ​ស្រែក​ពាក្យ​ស្លោក​គាំទ្រ​លោក​នៅ​ជិត​ទីលាន Martyrs ក្នុង​ទីក្រុង​បេរូត ប្រទេស​លីបង់។

លោក​នាយក​រដ្ឋមន្ត្រី​ Saad Hariri នៃ​ប្រទេស​លីបង់​បាន​និយាយនៅ​ថ្ងៃ​ពុធ​នេះ​ថា​ លោក​ផ្អាក​ការ​លា​លែង​ចេញ​ពី​តំណែង​របស់​លោក​តាម​សំណើ​សុំ​របស់​លោក​ប្រធានាធិបតី​ Michel Aoun។

ថ្លែង​ទៅ​កាន់​ពួក​អ្នក​កាសែត​នៅ​ក្នុង​ក្រុង​បេរូត នៅ​ក្រោយ​ពិធី​ដង្ហែ​ក្បួន​ព្យុហ​យាត្រា​មួយ​ដើម្បី​ប្រារព្ធទិវា​ឯករាជ្យ​នៃ​ប្រទេសលីបង់ ​លោក Hariri បាន​មាន​ប្រសាសន៍​ថា ​ការ​ពន្យា​ពេល​ការ​លាលែង​ចេញ​ពី​តំណែង​របស់​លោក​មាន​ន័យ​ថា​ ជា​ការ​ផ្តល់​ពេល​វេលា​ថែម​ទៀត​សម្រាប់​ឱ្យ​មាន​ការ​ពិភាក្សា​ថែម​ទៀត​ជា​មួយ​លោក​ប្រធានាធិបតី។​

លោក​ Hariri ​បាន​នាំ​ឱ្យ​មាន​វិបត្តិ​នយោបាយ​មួយ​កាល​ពី​ពេល​ដើម​ខែ​នេះ ​នៅ​ពេល​លោក​បាន​ប្រកាសពី​ប្រទេស​អារ៉ាប៊ី​សាអូឌីត​ ថា​ លោក​លា​លែង​ចេញ​ពី​តំណែង​ ហើយ​បន្ទាប់​មក​លោក​បាន​ឋិត​នៅ​ក្នុង​ប្រទេសអារ៉ាប៊ី​សាអូឌីត ដែល​នាំ​ឱ្យ​មាន​ការ​និយាយ​ស្មានៗ​ថា​ លោក​ប្រហែល​បាន​ត្រូវ​ឃាត់​ខ្លួន​នៅ​ទី​នោះ។​

លោក​ប្រធានាធិបតី​ Aoun បាន​មាន​ប្រសាសន៍​ថា​លោក​នឹង​មិន​ទទួល​យក​ការ​លា​លែង​ចេញ​ពី​តំណែង​របស់​លោក​នាយក​រដ្ឋមន្ត្រី​ទេ រហូត​ដល់​ពេល​ណា​លោក​បាន​និយាយ​ដោយ​ផ្ទាល់​ជាមួយ​លោក Hariri។ នៅ​ក្រោយ​លោក​បាន​ឈប់​សំចត​នៅ​ក្នុង​ប្រទេស​បារាំង​និង​ប្រទេស​អេហ្ស៊ីប​ មក​ លោក​ Hariri ក៏​បាន​ធ្វើ​ដំណើរ​ត្រឡប់​មក​កាន់​ប្រទេស​លីបង់​វិញ​កាល​ពី​យប់​ថ្ងៃ​អង្គារ។

នៅ​ក្នុង​សុន្ទរកថា​លា​លែង​ចេញ​ពី​តំណែង​របស់​លោក ​លោក Hariri បាន​បរិហារ​រិះគន់​ប្រទេស​អ៊ីរ៉ង់​និង​ពួក​ Hezbollah ​ថា​បាន​ធ្វើ​ឱ្យ​មាន​ការ​បែក​បាក់​គ្នា​រវាង​ពួក​រដ្ឋ​អារ៉ាប់​ ហើយ​ថា​លោក​ភ័យ​ខ្លាច​អំពី​ការ​ធ្វើឃាត​ផង​ដែរ។​ ឪពុក​របស់​លោកគឺ​លោក​អតីត​នាយក​រដ្ឋមន្ត្រី​ Rafik Hariri ​បាន​ត្រូវ​ធ្វើ​ឃាត​នៅ​ក្នុង​ការ​បំផ្ទុះ​គ្រាប់​បែក​កាល​ពី​ឆ្នាំ​២០០៥៕

XS
SM
MD
LG