ភ្ជាប់​ទៅ​គេហទំព័រ​ទាក់ទង

មេដឹកនាំ​ក្រុម​ Hamas និយាយ​ពី​កិច្ច​ព្រមព្រៀង​ផ្សះផ្សា​ជាមួយ​ក្រុម​ Fatah ដែល​ជា​គូ​ប្រជែង​


បុគ្គលិក​ម្នាក់​កំពុង​និយាយ​ទូរស័ព្ទ​ក្បែរ​រូប​របស់​លោក​ប្រធានាធិបតី​ប៉ាឡេស្ទីន​ Mahmoud Abbas ដែល​ត្រូវ​បាន​គេព្យួរ​នៅ​លើអគារ​ al-Zafer ក្នុង​ទីក្រុង Gaza កាលពី​ថ្ងៃទី​០៤ តុលា ២០១៧។

ក្រុម​ Hamas នៃ​ប៉ាឡេស្ទីន​និយាយ​ថា​ពួក​គេ​បានសម្រេច​កិច្ចព្រមព្រៀង​មួយ​ជាមួយ​ក្រុម​ Fatah ដែល​ជា​គូ​ប្រជែង​អំពី​ការផ្សះផ្សា​ខាង​នយោបាយ។​

លោក Ismail Haniyeh មេដឹកនាំពួក​ Hamas បាន​ចេញ​ផ្សាយ​សេចក្តី​ថ្លែង​ការណ៍​មួយ​នៅថ្ងៃ​ព្រហស្បតិ៍នេះ​ចែង​ថា​ភាគី​ទាំង​ពីរ​បានសម្រេចកិច្ចព្រមព្រៀង​មួយ​នៅ​ក្រោយ​កិច្ចចរចា​គ្នា​ពីរ​ថ្ងៃ​នៅ​ក្នុង​ក្រុង Le Caire នៅ​ក្រោមអ្វី​ដែល​លោក​ហៅ​ថា​ការ​ឧបត្ថម្ភផ្ចុងផ្តើម «ដោយ​សប្បុរស» របស់​ប្រទេស​អេហ្ស៊ីប។ ​លោក Haniyeh បាននិយាយ​ថា​សេចក្តី​ល្អិតល្អន់នៃ​កិច្ចព្រមព្រៀង​នេះ​នឹង​ត្រូវប្រកាស​នៅ​ពេល​បន្ទាប់មកទៀត​នៅ​ថ្ងៃនេះនៅក្នុង​រដ្ឋធានី​នៃ​ប្រទេសអេហ្ស៊ីប។​

អ្នកនាំ​ពាក្យម្នាក់​របស់​ក្រុម​ Fatah បាន​បញ្ជាក់​ថា​មានសេចក្តី​ប្រកាស​នេះ​មាន​នៅ​ក្នុង​សេចក្តី​សម្ភាសន៍​មួយជាមួយទីភ្នាក់ងារ​ព័ត៌មានបារាំង​ Agence France Presse។

​កិច្ចព្រមព្រៀង​នេះ​មានឡើង​ក្រោយ​សេចក្តី​សម្រេចមួយ​កាលពី​ខែ​មុនដោយ​ក្រុមជន​សកម្មប្រយុទ្ធ Hamas បានអនុញ្ញាត​ឱ្យ​ចលនា Fatah របស់​លោក​ប្រធានាធិបតី​ Palestine Mahmoud Abbas ត្រួតត្រា​ជាថ្មីលើតំបន់ Gaza។

ពួក Hamas បានគ្រប់គ្រង​តំបន់ Gaza និង​អ្នកស្រុក​ពីរ​លាន​នាក់នៃ​តំបន់នោះចាប់តាំង​ពី​ឆ្នាំ២០០៧​មក​នៅ​ពេល​ដែល​ពួក​គេ​បានប្រយុទ្ធ​ក្នុង​សង្គ្រាម​ស៊ីវិលខ្លី​មួយ​ជាមួយពួក Fatah។ ​ភាគី​ទាង​ពីរ​បាន​យល់ព្រម​បង្កើត​រដ្ឋាភិបាល​ឯកភាព​ជាតិ​មួយកាល​ពី​ឆ្នាំ២០១៤​ ក៏​ប៉ុន្តែ​ពួក Hamas នៅ​តែ​ត្រួតត្រា​តំបន់​ Gaza ជាមួយ​អង្គការ​រដ្ឋបាល​របស់​ពួក​គេ។

ប្រទេស​អ៊ីស្រាអែល បាន​រាំង​ខ្ទប់​តំបន់​ Gaza មួយ​ទសវត្សរ៍​ហើយ​ព្រំដែន​នៃ​តំបន់​នេះ​ជាមួយ​ប្រទេស​អេហ្ស៊ីប​ក៏​នៅ​តែ​បិទ​ដោយ​ភាគ​ច្រើន​កាលពី​ប៉ុន្មាន​ឆ្នាំ​ថ្មីៗនេះដែល​បាន​បណ្តាល​ឱ្យ​សេដ្ឋកិច្ច​ Gaza មាន​ភាព​ច្របូកច្របល់៕

XS
SM
MD
LG