ក្រុមមន្ត្រីបាននិយាយនៅល្ងាចថ្ងៃព្រហស្បតិ៍ថា មនុស្សជាង១០នាក់ ត្រូវបានឃុំខ្លួនក្នុងការធ្វើឃាតប្រធានាធិបតីហៃទីលោក Jovenel Moise។ អាជ្ញាធរហៃទី បាននិយាយថា ក្រុមទាហានស៊ីឈ្នួលចំនួន២៨នាក់នោះ មានជនជាតិកូឡុំប៊ី២៦នាក់ និងជនជាតិអាមេរិកាំងហៃទី២នាក់ ដែលពាក់ព័ន្ធនឹងការសម្លាប់លោក Moise អាយុ៥៣ ឆ្នាំ នៅគេហដ្ឋានឯកជនរបស់លោកនៅជាយរដ្ឋធានីព័រអូប្រាំង មុនពេលថ្ងៃរះ នៅថ្ងៃពុធ។
លោក Leon Charles អគ្គស្នងការនគរបាលជាតិហៃទីបាននិយាយកាលពីថ្ងៃព្រហស្បតិ៍ថា មនុស្ស១៧នាក់ ត្រូវបានឃាត់ខ្លួនដែលមានជាជនជាតិអាមេរិកពីរនាក់ និងជនជាតិកូឡុំប៊ី១៥នាក់។ លោក Charles បាននិយាយថា ជនសង្ស័យ៣នាក់ ត្រូវបានសម្លាប់ និង៨នាក់ទៀត នៅមិនទាន់រកឃើញនៅឡើយ។ មុននេះប៉ូលិសបាននិយាយថា ជនសង្ស័យ៤នាក់ ត្រូវបានសម្លាប់។ ទាំងលោក Charles និងមន្ត្រីប៉ូលិស មិនបានពន្យល់អំពីតួលេខខុសគ្នានេះទេ។
លោក Charles បាននិយាយថា «ការតាមរកពួកទាហានស៊ីឈ្នួលទាំងនេះ នៅតែបន្ត។ ពួកគេនឹងត្រូវសម្លាប់ក្នុងការប្រយុទ្ធ ឬត្រូវចាប់ខ្លួន»។
នៅព្រឹកថ្ងៃសុក្រ កោះតៃវ៉ាន់បានចេញសេចក្តីថ្លែងការណ៍មួយថា ជនសង្ស័យ១១នាក់ត្រូវបានចាប់ខ្លួននៅបរិវេណស្ថានទូតតៃវ៉ាន់ ក្នុងរដ្ឋធានីព័រអូប្រាំង បន្ទាប់ពីប៉ុនប៉ងគេចពីប៉ូលិស។ សេចក្តីថ្លែងការណ៍របស់ស្ថានទូតនេះបាននិយាយថា «ប៉ូលិសបានបើកប្រតិបត្តិការនៅម៉ោងប្រហែល៤រសៀល ថ្ងៃព្រហស្បតិ៍ និងបានចាប់ខ្លួនជនសង្ស័យ១១នាក់»។
រដ្ឋមន្រ្តីផ្នែកបោះឆ្នោតប្រទេសហៃទី កាលពីថ្ងៃព្រហស្បតិ៍បានកំណត់អត្តសញ្ញាណជនជាតិអាមេរិកាំងហៃទីទាំងពីរនាក់ គឺ James Solages អាយុ៣៥ឆ្នាំ និង Joseph Vincent អាយុ៥៥ឆ្នាំ។ ក្រសួងការបរទេសសហរដ្ឋអាមេរិក មិនបានបញ្ជាក់ពីរបាយការណ៍ដែលថា ពលរដ្ឋអាមេរកាំងពីរនាក់ កំពុងជាប់ឃុំឃាំងនោះទេ។ នៅល្ងាចថ្ងៃព្រហស្បតិ៍ រដ្ឋាភិបាលកូឡុំប៊ីបានបញ្ជាក់ថា យ៉ាងហោចណាស់ជនសង្ស័យ៦នាក់រួមទាំងពីរនាក់ដែលត្រូវបានសម្លាប់ទំនងជាកងទ័ពកូឡុំប៊ីចូលនិវត្តន៍ តែមិនបានកំណត់អត្តសញ្ញាណជនសង្ស័យទេ។ នាយករដ្ឋមន្រ្តីបណ្តោះអាសន្នលោក Claude Joseph បានប្រកាសប្រើច្បាប់អាជ្ញាសឹក តាមចាប់ក្រុមនេះ។
លោក Brian Concannon មេធាវីសិទ្ធិមនុស្សនិងជាអតីតមន្រ្តីសិទ្ធិមនុស្សអង្គការសហប្រជាជាតិ និងជាស្ថាបនិកវិទ្យាស្ថានយុត្តិធម៌និងប្រជាធិបតេយ្យនៅហៃទី បានប្រាប់វីអូអេថា ស្ថានភាពអាជ្ញាសឹកនេះ អនុញ្ញាតឱ្យប៉ូលិសធ្វើអ្វីគ្រប់យ៉ាងក្នុងការតាមរកក្រុមឃាតករនេះ៕
