ការស្ទង់មតិរបស់ក្រិកទំនងធ្វើការបោះឆ្នោតនៅថ្ងៃអាទិត្យខាងមុខនេះស្តីពីសំណើរប្រាក់ជំនួយអឺរ៉ុបចង្អុលបង្ហាញថា ពួកគេមានការបែងចែកជិតស្មើគ្នារវាងអ្នកបោះឆ្នោតគាំទ្រ និងអ្នកបោះឆ្នោតមិនគាំទ្រ។
ការស្ទង់មតិមនុស្សជិតមួយពាន់នាក់ ដែលបានធ្វើឡើងដោយក្រុមហ៊ុន ALCO សម្រាប់កាសែត Ethos កាលពីថ្ងៃទី៣០ ខែមិថុនា រហូតដល់ថ្ងៃទី១ ខែកក្កដា បានប្រាប់ឲ្យដឹងថា អ្នកឆ្លើយតបជាង៤៤,៨ភាគរយ និយាយថា ពួកគេនឹងបោះឆ្នោតគាំទ្រស្តីពីលក្ខខណ្ឌប្រាក់សង្គ្រោះសេដ្ឋកិច្ច ខណៈដែលអ្នកឆ្លើយតប ៤៣,៨ភាគរយនឹងបោះឆ្នោតប្រឆាំង ហើយ១១,៨ភាគរយទៀតមិនទាន់សម្រេចចិត្ត។
លោក Alexis Tsiprasនាយករដ្ឋមន្រ្តីនៃប្រទេសក្រិក កំពុងធ្វើយុទ្ធនាការ «បោះឆ្នោតមិនគាំទ្រ» ដោយនិយាយថា វានឹងផ្តល់ឲ្យក្រិកនូវអំណាចក្នុងការចរចានៅថ្ងៃអនាគតជាមួយម្ចាស់បំណុលអឺរ៉ុប។
លោក Yanis Varoufakisរដ្ឋមន្រ្តីក្រសួងហិរញ្ញវត្ថុ បាននិយាយនៅក្នុងកិច្ចសម្ភាសន៍តាមទូរទស្សន៍នាសប្តាហ៍នេះថា ប្រសិនបើពួកអ្នកបោះឆ្នោតសុខចិត្តទទួលយកសំណើរប្រាក់សង្គ្រោះសេដ្ឋកិច្ចរបស់ម្ចាស់បំណុលសហភាពអឺរ៉ុបរដ្ឋាភិបាល វាស្មើនឹងការចាកចេញរបស់រដ្ឋាភិបាល ហើយលោកប្រហែលនឹងមិនមែនជារដ្ឋមន្រ្តីក្រសួងហិរញ្ញវត្ថុនៅថ្ងៃច័ន្ទខាងមុខនេះ។
ក្រុមមេដឹកនាំអឺរ៉ុបបានព្រមានថា ការបោះឆ្នោតប្រជាមតិមិនគាំទ្រប្រាក់សង្គ្រោះសេដ្ឋកិច្ចនឹងបង្កើនការគាបសង្កត់ឲ្យក្រិកក្លាយជាប្រទេសមុនដំបូង ដែលនឹងចាកចេញពីតំបន់ប្រើប្រាស់អឺរ៉ូក្នុងអំឡុងពេលប្រវត្តិសាស្រ្តរយៈពេល១៨ឆ្នាំរបស់តំបន់ប្រើប្រាស់ប្រាក់អឺរ៉ូ ដែលមាន១៩ប្រទេសជាសមាជិកនោះ៕
