រដ្ឋមន្ត្រីក្រសួងហិរញ្ញវត្ថុនៃប្រទេសក្រិកចោទប្រកាន់ប្រទេស និងអង្គការផ្តល់ឥណទានឱ្យរដ្ឋាភិបាលក្រុងអាថែន ថាប្រព្រឹត្ត «ភេរវកម្ម»។
លោក Yanis Varoufakis បាននិយាយប្រាប់កាសែត El Mundo នៃប្រទេសអេស្ប៉ាញថា អ្វីដែលម្ចាស់ឥណទានកំពុងធ្វើជាមួយប្រទេសក្រិក «មានឈ្មោះថាភេរវកម្ម»។ លោកបាននិយាយថា «អ្វីដែលព្រុចសែល និងក្រុមប្រទេសទាំងនោះចង់បាននៅថ្ងៃនេះគឺធ្វើឱ្យការបោះឆ្នោតជ័យជំនះដើម្បីឱ្យពួកគេអាចធ្វើឱ្យប្រជារាស្ត្រក្រិកមានការអាម៉ាស់មុខ»។
ក៏ប៉ុន្តែ ទោះជាយ៉ាងណាក៏ដោយ ក៏លោក Varoufakis បាននិយាយថា លោកមានការប្រាកដប្រជាថាកិច្ចព្រមព្រៀងមួយជាមួយម្ចាស់ឥណទាននឹងអាចសម្រេចបានពីព្រោះ «ការមិនយល់ស្របគ្នាអាចនាំឱ្យមានការខាតបង់ច្រើនដល់ភាគីទាំងពីរ។ ប្រសិនប្រទេសក្រិករលំ ប្រាក់១លានលានអឺរ៉ូនឹងបាត់បង់។ នេះជាទឹកប្រាក់ច្រើនណាស់ ហើយខ្ញុំមិនជឿថាអឺរ៉ុបអាចអនុញ្ញាតឱ្យការណ៍នេះកើតមានបានទេ»។
បទសម្ភាសន៍នេះបានត្រូវបោះពុម្ពផ្សាយនៅថ្ងៃសៅរ៍នេះ មួយថ្ងៃមុនការបោះឆ្នោតប្រជាមតិក្នុងប្រទេសក្រិកអំពីលក្ខខណ្ឌនៃជំនួយសង្គ្រោះសេដ្ឋកិច្ចរបស់អឺរ៉ុបដល់ប្រទេសក្រិក៕
