ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

របាយ​ការណ៍៖ រដ្ឋាភិបាល​កម្ពុជា​យក​វិបត្តិ​ជំងឺ​កូវីដ​១៩ មក​គាប​សង្កត់​ប្រព័ន្ធ​ផ្សព្វផ្សាយ​និង​រឹតត្បិត​ការ​រិះគន់


រូបឯកសារ៖ អ្នក​តស៊ូ​មតិ​សិទ្ធិមនុស្ស​អាមេរិកាំង​ដើម​កំណើត​ខ្មែរ​អ្នកនាង សេង ធារី (ឆ្វេង) ថ្លែង​ទៅ​កាន់​អ្នក​កាសែត​នៅ​មុន​សវនាការ​មួយ​នៅ​តុលាការ​រាជធានី​ភ្នំពេញ ថ្ងៃទី១៤ ខែមករា ឆ្នាំ២០២១។

អង្គការ​អ្នក​កាសែត​គ្មាន​ព្រំដែន​(Reporters Without Borders)​បាន​ដាក់​ប្រទេស​កម្ពុជា​ក្នុង​ចំណាត់​ថ្នាក់​១៤៤​ក្នុង​ចំណោម​ប្រទេស១៨០​សម្រាប់​សេរីភាព​សារព័ត៌មាន​និង​ការ​បញ្ចេញ​មតិ។ នេះ​បើ​យោង​តាម​សន្ទទស្សន៍​វាយ​តម្លៃ​របស់​អង្គការ​នេះ​សម្រាប់​ឆ្នាំ​២០២១ ដែល​ចេញ​ផ្សាយ​កាល​ពី​ថ្ងៃ​អង្គារ។

ចំណាត់​ថ្នាក់​នេះ​មិន​ខុស​ពី​ការ​កត់ត្រា​របស់​អង្គ​ការ​អ្នក​កាសែត​គ្មាន​ព្រំដែន កាល​ពី​ឆ្នាំ​២០​២០ ដែល​មាន​ន័យ​ថា​សេរីភាព​សារព័ត៌មាន​របស់​កម្ពុជា​ស្ថិត​ក្នុង​ស្ថានភាព​អាក្រក់។

អង្គការ​ការពារ​សិទ្ធិ​អ្នក​កាសែត​ដែល​មាន​មូលដ្ឋាន​នៅ​ទីក្រុង​ប៉ារីស ​ប្រទេស​បារាំង​ បាន​វាយ​តម្លៃ​ថា​ រដ្ឋា​ភិបាល​កម្ពុជា​បាន​បង្កើត​ច្បាប់​រឹត​ត្បិត​ខ្លាំងលើ​ការ​ប្រើ​ប្រាស់​សិទ្ធិ​សេរី​ភាព​ពលរដ្ឋ​ ឬ​ការ​បង្កើត​ឯកសារ​ផ្លូវ​ច្បាប់​ផ្សេងៗ​ជា​បន្ត​បន្ទាប់​នៅ​ឆ្នាំ​២០​២០ ហើយ​វាធ្វើ​ឲ្យ​មាន​ជា​បទ​ឧក្រិដ្ឋ​ចំពោះ​ការ​រិះ​គន់​សកម្មភាព​រដ្ឋាភិបាល ​ហើយ​ក្នុង​ករណី​ខ្លះ​ ធ្វើ​ឲ្យ​ការ​បោះ​ពុម្ព​ផ្សាយ​ ឬ​ការ​ផ្សព្វផ្សាយ​តាម​រលក​ធាតុ​អាកាស​ ក្លាយ​ជា​ព័ត៌មាន​ក្លែង​ក្លាយ​ដែល​អាច​ត្រូវ​ដាក់​ទោស​ទណ្ឌ​ឲ្យ​ជាប់​ពន្ធនាគារ​ជា​ច្រើន​ឆ្នាំ។

លោក ណុប វី នាយក​ប្រតិបត្តិ​នៃ​សម្ព័ន្ធ​អ្នក​សារព័ត៌​មាន​កម្ពុជា​(ខេមបូចា) ប្រាប់​វីអូអេ​នៅ​ថ្ងៃ​ពុធ​នេះ​ថា​ការ​ប្តឹង​ផ្តល់​ប្រឆាំង​អ្នក​កាសែត​ទៅ​តុលាការ និង​ការ​ធ្វើ​ទុក្ខ​បុក​ម្នេញ​តាម​រូបភាព​គំរាម​កំហែង​លើ​អ្នក​កាសែត​ជា​ដើម​ចម​សំខាន់​មួយ​ នាំ​ឲ្យ​គ្មាន​ការ​ប្រែប្រួល​នៃ​ចំណាត់​ថ្នាក់​សេរីភាព​សារព័ត៌​មាន​កម្ពុជា​ក្នុង​ឆ្នាំ​២០២១​នេះ។​

ទោះ​យ៉ាង​ណា​អ្នក​ការពារ​សិទ្ធិ​អ្នកកាសែត​រូប​នេះ​និយាយ​ថា​ស្ថានភាព​សេរីភាព​អ្នក​សារព័ត៌មាន​របស់​កម្ពុជា​មិន​អាក្រក់​ខ្លាំង​ដូច​ប្រទេស​កុម្មុយនីស្ត​មួយ​ចំនួន​ក្នុងតំបន់​ដូចជា​វៀតណាម​ និង​ឡាវ​នោះ​ទេ ហើយ​ក៏ប្រសើរ​ជាង​ប្រទេស​ផ្តាច់​ការ​មួយ​ចំនួន​ដូច​ជា​មីយ៉ាន់ម៉ា​ជាដើម។

លោក​កត់​សម្គាល់​ រដ្ឋា​ភិបាល​កម្ពុជា​ក៏​បាន​រក្សា​លម្ហ​មួយ​សម្រាប់​ក្រុម​អ្នក​ការពារ​សិទ្ធិ អ្នក​សារព័ត៌មាន​ឲ្យ​បាន​តស៊ូ​មតិ​ប្រឆាំង​នឹង​ភាព​មិន​ប្រក្រតី​ពាក់ព័ន្ធ​នឹង​សេរីភាព​ព័ត៌​មាន។ ចំណុច​វិជ្ជមាន​ខ្លះ​នេះ​ បាន​ធ្វើ​ឲ្យ​កម្ពុជា​មិន​ធ្លាក់​ចុះ​ខ្លាំង​នៃ​ចំណាត់​ថ្នាក់​របស់​ខ្លួន​ថែម​ទៀត។

លោក​បន្ថែម​ថាស្ថានភាព​សេរីភាព​សារព័ត៌មាន​នៅ​កម្ពុជា​នឹង​កាន់​តែ​ប្រសើរ​ជាង​មុន​ បើ​សិន​រដ្ឋាភិបាល​ផ្តល់​អាទិភាព​លើ​ការ​ផ្តល់​សេរីភាព​ពេញ​លេញ​ដល់​អ្នក​សារព័ត៌មាន​ក្នុង​ការផ្តល់​ព័ត៌មានពិតទាក់ទង​នឹង​ជំងឺ​កូវីដ​១៩។

លោក​មាន​ប្រសាសន៍​ថា៖ «អីចឹង​ហើយ​នៅ​ក្នុង​ករណី​នេះ​រាជ​រដ្ឋាភិបាល​លោក​គួរ​តែ​អាទិភាព​ អាទិភាព​ផ្តល់ការ​អនុញ្ញាត​ សម្រាប់​បង​ប្អូន​អ្នក​សារព័ត៌មាន​វិជ្ជាជីវៈ​ បង​ប្អូន​អ្នក​សារព័ត៌មាន​ ដែល​ធ្វើ​កិច្ច​ការ​ការងារ​ នៅ​ក្នុង​ការ​ជួយ​ស្តា​ និង​លើក​កម្ពស់​នូវ​ការ​ផ្សព្វ​ផ្សាយ​ព័ត៌មាន​ពិត ព័ត៌មាន​ត្រឹមត្រូវ​ ហើយ​និង​កាត់​បន្ថយ​នូវ​អា​ព័ត៌មាន​ក្លែង​ក្លាយ​ហ្នឹង អាហ្នឹង​គឺ​ជា​ចំណុច​សំខាន់»។

អង្គការ​អ្នក​កាសែត​គ្មាន​ព្រំដែន​បាន​ឲ្យ​ដឹង​ថា​ គិត​ត្រឹម​ពេល​នៃ​ការ​ចេញ​របាយការណ៍​របស់​ខ្លួន​ក្នុង​ឆ្នាំ​២០២១​នេះ​ អ្នក​កាសែត​៤នាក់​ត្រូវ​បាន​គេ​ឃុំខ្លួន​ ក្នុង​នោះ​មាន​លោក រ៉ាត់ រ័ត្នមុនី ជា​អ្នក​បក​ប្រែ​ឲ្យ​ទីភ្នាក់​ងារព័ត៌​មាន​រុស្ស៊ី ​RT​ ដែល​ត្រូវ​បាន​ដោះ​លែង​កាល​ពី​ខែ​ធ្នូ​ឆ្នាំ​២០២០​ លោក​ សុខ​ ឧត្តម​ អតីត​ម្ចាស់ស្ថានីយ៍​វិទ្យុ​រិទ្ធី​សែន​ និង​លោក ​រស់​ សុឃិត​ ចាង​ហ្វាង​កាសែត​ជាតិ​ខ្មែរ​ដែល​នៅ​បន្ត​ជាប់​ឃុំ។

ទាំង​លោក​សុខ​ ឧត្តម​ និងលោក​ រស់​ សុឃិត​ ត្រូវ​បាន​តុលាការ​កាត់​ទោស​ឲ្យ​ជាប់​ពន្ធនាគារ ពាក់ព័ន្ធ​នឹង​ចោទ​ប្រកាន់​ពី​បទ​ញុះញង់ ដែល​ត្រូវ​បាន​ក្រុម​សិទ្ធិ​មនុស្ស​រិះគន់​ថា​ជា​បទ​ចោទ​ប្រកាន់ ដើម្បី​បំបិទ​សំឡេង​ជំទាស់។

អង្គការ​អ្នក​កាសែត​គ្មាន​ព្រំដែន​បាន​បង្ហាញ​ក្នុង​របាយ​ការណ៍​ខ្លួន​ថា​ ដោយ​បារម្ភ​អំពីលទ្ធភាព​នៃ​ការ​ចាញ់​ក្នុង​ការ​បោះឆ្នោត​ជាតិ​ឆ្នាំ​២០១៨ លោក​នាយក​រដ្ឋមន្ត្រី​ហ៊ុន សែន​ ដែល​ស្ថិត​ក្នុង​អំណាច​ជាង​៣០​ឆ្នាំ​ បាន​បើក​យុទ្ធនាការ​ប្រឆាំង​ជាមុន​ជាមួយ​ប្រព័ន្ធ​ផ្សព្វផ្សាយ​ ដែល​ធ្វើ​ឲ្យ​ខូច​ខាត​យ៉ាង​ធ្ងន់​ធ្ងរ​នៃ​ស្ថាន​ភាព​សារព័ត៌មាន​។

អង្គការ​អន្តរជាតិ​នេះ​បាន​រៀបរាប់​ថា ​ស្ថានីយ៍​វិទ្យុ​និ​ង​កាសែត​ជាច្រើន​ត្រូវ​បាន​ហាមឃាត់​ភ្លាមៗ​ នៅ​ពេល​បុគ្គលិក​នៃ​អង្គភាព​សារព័ត៌មាន​ផ្សេង​ទៀត​ត្រូវ​គេ​«បោស​សម្អាត»។

អង្គការ​ដដែល​បាន​អធិប្បាយ​ក្នុង​ន័យ​ដើម​ថា​៖«ជា​លទ្ធ​ផលបាន​មក​ពីការបោសសម្អាត​យ៉ាង​លឿន​នេះ​ ពល​រដ្ឋ​កម្ពុជា​ឥឡូវនេះ មាន​លទ្ធភាព​ទទួល​បាន​ព័ត៌មាន​ដែល​ផ្តល់​ក្រុម​បណ្តាញ​ផ្សព្វផ្សាយ​ព័ត៌មាន​ដែល​មាន​ទំនាក់​ទំនង​ដោយ​ផ្ទាល់​ជាមួយ​លោក ​ហ៊ុន សែន ដូចជា​ទីភ្នាក់​ងារ​ព័ត៌មាន​ Fresh News ដែល​បាន​បញ្ចេញ​សេច​ក្តី​រាយការណ៍​បែបឃោសនា​ការ​គាំទ្រ​រដ្ឋាភិបាល»។

អង្គការ​នេះ​បន្ត​កត់​សម្គាល់​ថា​ការ​បង្កើត​សម្ព័ន្ធ​អ្នកសារ​ព័ត៌មាន​កម្ពុជា ឬ​ខេមបូចា ក្នុង​ចំណោម​ក្រុម​អ្នក​សារ​ព័ត៌មាន​ឯករាជ្យ គឺ​ដើម្បី​ឆ្លើយ​តប​នឹង​ស្ថានភាព​យ៉ាប់​យឺន​នេះ​នៅ​ក្នុង​ឆ្នាំ​២០១៩ ដែល​ផ្តល់​ឱកាស​ឲ្យ​អ្នក​សារ​ព័ត៌មាន​កម្ពុជា​នូវ​លម្ហ​សម្រាប់​ពួក​គេ​មាន​សិទ្ធិ​ជា​តំណាង​ខ្លះ​ ដែល​ជាការ​សម្ប​ទាន​មាន​កម្រិត​របស់​រដ្ឋាភិបាល។

យ៉ាង​ណា​ក៏​ដោយ​ អង្គការ​នេះ​សង្កត់​ធ្ងន់​ថា​៖«ក្នុង​ឆ្នាំ​២០២០​ រដ្ឋាភិបាល​យ៉ាងណាមិញ​បាន​ប្រើ​ប្រាស់​វិបត្តិ​ជំងឺ​កូវីដ១៩​ មក​បង្ក​ឲ្យ​មាន​ការ​ចាប់​ពិរុទ្ធ បិទ​គេហ​ទំព័រ​ព័ត៌​មាន​តាម​បណ្តាញ​អ៊ីន​ធឺ​ណិត​ ចាប់​អ្នកកាសែត​ និង​ប្រកាស​រដ្ឋ​ក្នុង​គ្រា​មាន​អាសន្ន​ ដែល​ផ្តល់​អំណាច​ដល់​រដ្ឋាភិបាលដែល​មិន​រំពឹង​ទុក​មុន​ដើម្បី​ចាប់​ពិរុទ្ធ និង​យក​ការណ៍​ប្រព័ន្ធ​ផ្សព្វ​ផ្សាយ​ជាកាសែត​ និង​តាម​បណ្តាញ​អន​ឡាញ។

លោក ​មាស សុភ័ណ្ឌ​ អ្នក​នាំ​ពាក្យ​ក្រសួង​ព័ត៌មាន​ច្រាន​ចោល​ការ​វាយ​តម្លៃ​អវិជ្ជមាន​របស់​អង្គការ​អ្នក​កាសែត​គ្មានព្រំដែន​មក​លើ​ស្ថានភាព​សេរីភាព​សារព័ត៌មាន​របស់​កម្ពុជា ដោយ​ថា​អង្គការ​នេះ​ មិន​ស្រង់​យក​គំនិត​គ្រប់​ភាគី​ពាក់ព័ន្ធ​ ក្នុង​នោះ​គឺ​រដ្ឋាភិបាល​កម្ពុជា​ ដើម្បី​ធ្វើ​សេចក្តី​សន្និដ្ឋាន​របស់​ខ្លួន​ទេ។​

លោក​ប្រាប់​វីអូអេ​បន្ថែម​ថា​រដ្ឋាភិបាល​បាន​រក្សា​លម្ហា​សម្រាប់​ការ​អនុវត្តន៍​សារព័ត៌មាន​ប្រកប​ដោយ​វិជ្ជាជីវៈ តែ​ចំពោះ​បុគ្គល​ដែល​បំពាន​ច្បាប់​ក្នុង​ពេល​បំពេញ​អាជីព​នេះ​ ត្រូវតែ​ទទួល​ការ​ដាក់​ពិន័យ​តាម​ផ្លូវ​ច្បាប់។

«ដោយ​សារ​តែ​អ្នក​សារព័ត៌មាន​ទាំង​អស់​នោះ គាត់​បាន​ប្រព្រឹត្ត​ខុស​ពីក្រម​សីលធម៌​វិជ្ជាជីវៈ​ ខុស​ពី​កិច្ច​សន្យា​ដែល​គាត់​បាន​តម្កល់​ទុក​នៅ​ក្រសួង​ព័ត៌មាន​ ក៏ដូច​ជាប្រព្រឹត្ត​សកម្មភាព​ដែល​ផ្ទុយ​ទៅ​នឹង​ច្បាប់​នៃ​ព្រះរាជា​ណា​ចក្រ​កម្ពុជា​។ ដូច្នេះ​ការ​ចាត់​វិធានការ​ផ្លូវ​ច្បាប់​ទៅ​លើ​អ្នក​សារព័ត៌មាន​ដែល​ប្រព្រឹត្ត​ខុស​ច្បាប់​ វា​មិន​មែន​ជា​ការ​ដាក់​គំនាប​ ឬ​ក៏​គំរាម​កំហែង​ ឬ​បិទ​សិទ្ធិ​សេរីភាព​របស់​អ្នក​សារព័ត៌មាន​ទេ។ ក៏ប៉ុន្តែ​គឺ​ជា​ការ​ពង្រឹង​ និង​រក្សា​នូវ​គុណ​តម្លៃ​របស់​អ្នក​សារព័ត៌មាន​ រក្សានូវ​តម្លៃ​របស់​វិជ្ជាជីវៈ​សារព័ត៌មាន​ទៅ​វិញ​ទេ»។

ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ​ អ្នក​កាសែត​នៅ​ប្រទេស​កម្ពុជា​បាន​រង​ការ​បំពាន​ខាង​រាង​កាយ​និង​ផ្លូវ​ច្បាប់​ចំពោះ​មុខ​នាទី​របស់​ពួកគេ​ជា​អ្នកសារ​ព័ត៌មាន។ អ្នក​កាសែត​ខ្លះ​ត្រូវ​បាន​ជន​មិន​ស្គាល់​អត្តសញ្ញាណ​លប​ធ្វើ​ការ​វាយ​ប្រហារ​ធ្ងន់​ធ្ងរ​ នៅ​ពេល​ ឬ​ក្រោយ​ពេល​ពួក​គេ​ធ្វើ​សេចក្តី​រាយការណ៍​រស៊ើប​មួយ​ចំនួន​ ដូចជា​បទល្មើស​ព្រៃឈើ ហើយ​អ្នក​កាសែត​ខ្លះ​បាន​បាត់​បង់​អាជ្ញា​បណ្ណ​របស់​ខ្លួន​ ឬ​ត្រូវ​ចាប់​ដាក់​ពន្ធនាគារ​ចំពោះ​ការ​បញ្ចេញ​មតិ​តាម​ប្រព័ន្ធ​សង្គម​ដែល​ជា​ការ​រំខាន​ចិត្ត​ដល់​អ្នក​មាន​អំណា​ច​មួយ​ចំនួន ឬ​ក៏​គ្រាន់​តែ​រាយការណ៍​ឡើង​វិញ​នូវ​ពាក្យ​សម្តីរ​បស់​លោក​នាយករដ្ឋមន្រ្តី ហ៊ុន សែន។ នេះ​បើ​យោង​តាម​ក្រុម​អ្នក​សង្កេត​ការណ៍​នៅ​ប្រទេស​កម្ពុជា៕

XS
SM
MD
LG