ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​កម្ពុជា​ប្រកាស​ជ្រើស​រើស​មន្ត្រី​រាជការ​ថ្មី​ជិត​៣ម៉ឺន​នាក់​សម្រាប់​ឆ្នាំ​២០១៩


រូបឯកសារ៖ មន្ត្រីរាជការ និងមហាជនជាង៤ម៉ឺននាក់ត្រូវបានឲ្យចូលរួមរំលឹកខួប៧មករា រាជធានីភ្នំពេញ នៅថ្ងៃទី៧ ខែមករា ឆ្នាំ២០១៨។ (ខាន់ សុគុំមនោ/VOA)

​រដ្ឋាភិបាល​កម្ពុជា​ត្រូវការ​មន្ត្រី​ក្រប​ខណ្ឌ​ស៊ីវិល​ ​និង​មន្ត្រី​ជាប់​កិច្ច​សន្យា​ជាង​២​ម៉ឺន​៦​ពាន់​ ​ដើម្បី​បំពេញ​មុខ​ងារ​សាធារណៈ​ផ្សេងៗ​របស់​រដ្ឋ។​ មន្ត្រី​អង្គការ​សង្គម​ស៊ីវិល​បារម្ភ​ចំពោះ​ការ​ចំណាយ​ថវិកាជាតិ​​ច្រើន​បន្ថែម​ទៀត​ចំពោះ​ការ​ជ្រើសរើស​មន្ត្រី​សាធារណៈ​ថ្មីៗ​ទំាង​នេះ។

រដ្ឋាភិបាល​កម្ពុជា​នៅ​សប្ដាហ៍​នេះ​ បាន​ប្រកាស​ផ្ដល់​ផែន​ការ​ក្របខណ្ឌ​ជូន​គ្រប់​ក្រសួង​ ស្ថាប័ន​ ដើម្បី​រើស​មន្ត្រី​ក្របខណ្ឌ​ថ្មី និង​មន្ត្រី​ជាប់​កិច្ច​សន្យា​ជាច្រើន​ម៉ឺន​នាក់​សម្រាប់​ឆ្នាំ​២០១៩។ ​នេះ​បើ​យោង​តាម​សេចក្ដី​ប្រកាស​ដែល​ VOA ​បាន​ទទួល។

សេចក្ដី​ជូន​ដំណឹង​របស់​ក្រសួង​មុខ​ងារ​សាធារណៈ​ចេញ​កាល​ពី​ថ្ងៃ​ព្រហស្បតិ៍​ សរសេរ​ថា៖ «រាជរដ្ឋាភិបាល​បាន​យល់​ព្រម​ផ្ដល់​គោលការណ៍​ជ្រើស​រើស​ក្របខណ្ឌ​មន្ត្រី​ថ្មី​ ដែល​ក្នុង​នោះ​មន្ត្រី​ក្រប​ខណ្ឌ​ស៊ីវិល​មាន​ចំនួន​៥,៩៩៦ ​កន្លែង​មន្ត្រី​ជាប់​កិច្ច​សន្យា​ជិត​២ម៉ឺន​នាក់​ ដើម្បី​បំពេញ​មុខងារ​សាធារណៈ​នា​នា​នៅ​តាម​ស្ថាប័ន​របស់​រដ្ឋាភិបាល»។

លោក ​យក់ ប៊ុនណា ​រដ្ឋលេខាធិការ​នៃ​ក្រសួង​មុខ​ងារ​សាធារណៈបាន​ប្រាប់​ VOA​ តាម​ទូរសព្ទ​ថារាជ​រដ្ឋាភិបាល​តែង​តែ​ជ្រើស​រើស​មន្ត្រី​រាជការ​ថ្មី​ជា​រៀង​រាល់​ឆ្នាំ​ទាំង​មន្ត្រី​ក្រប​ខណ្ឌ​និង​មន្ត្រី​ជាប់​កិច្ច​សន្យា ​ទៅ​តាម​ចំនួន​មន្ត្រី​ដែល​ចូល​និវត្តន៍​និង​តម្រូវ​ការ​បន្ថែម។

លោក​បាន​និយាយ​ថា៖​

«បាទ!​ ឆ្នាំ​កន្លង​មក​ យើង​រើស​ដូចគ្នា​ហ្នឹង​ គោល​ការណ៍​ជា​ការ​សម្រេច​របស់​រដ្ឋាភិបាល​គឺ​យើង​រើស​ផ្អែក​លើ​ចំនួន​ចូល​និវត្តន៍។ មាន​ន័យ​ថា​ចូល​និវត្តន៍​ប៉ុន្មាន​ យើង​រើស​ប៉ុណ្ណឹង»។

លោក​បាន​បន្ថែម​ថា​ឆ្នាំ​នេះ ​មាន​មន្ត្រី​ក្របខណ្ឌ​ដែល​ត្រូវ​ចូល​និវត្តន៍​ជិត​៤,០០០​នាក់​ ប៉ុន្តែ​វិស័យ​សុខាភិបាល​និង​វិស័យ​អប់រំ​ត្រូវ​ការ​មន្ត្រី​បន្ថែម​ដើម្បី​ឆ្លើយ​តប​នឹង​ចំនួន​ប្រជាជន​ដែល​កំពុង​កើន​ឡើង។

​លោក​បាន​បន្ត​ថា៖

«យើង​ឃើញ​សេវា​ហ្នឹង​វា​កើន ​វា​រីក​ណាស់​ដោយ​សារ​ចំនួន​ប្រជាជន​របស់​យើងកើន​ឡើង​រហូត ​មាន​អត្រា​កំណើន​ ​ជា​ប្រទេស​ក្មេង​ អ៊ីចឹង។ យើង​ត្រូវ​ការ​សេវា​អប់រំ​និង​សេវា​សុខាភិបាល​ហ្នឹង​បន្ថែម​ទៀត។​ អ៊ីចឹង​ អ្នក​ទាំង​អស់​គ្នា​ហ្នឹង​នឹង​ទៅ​ជួយ​ការងារ​នៅ​ក្នុង​វិស័យ​ហ្នឹង​ ឲ្យ​កាន់តែ​ប្រសើរ​ឡើង​បន្ថែម​ទៀត​បាទ»។

​សម្រាប់​ក្របខណ្ឌ​ឆ្នាំ​២០១៩​ នេះ ​ក្រសួង​សុខាភិបាល​ត្រូវ​ការ​ជ្រើស​រើស​មន្ត្រី​ក្របខណ្ឌ​បន្ថែម​ចំនួន​១,៣០០​កន្លែង​ និង​៣,៦០០​កន្លែង​សម្រាប់​ក្រសួង​អប់រំ​ យុវជន​និង​កីឡា​ ហើយ​មន្ត្រី​រាជការ​ដែល​កំពុង​បម្រើ​ការងារ​សព្វថ្ងៃ​មាន​ចំនួន​សរុប​ជាង​២០​ម៉ឺន​នាក់​នៅ​ទូទាំង​ប្រទេស​កម្ពុជា។

​ប៉ុន្តែ​ ការ​រើស​មន្ត្រី​ក្នុង​លក្ខណៈ​ច្រើន​បែប​នេះ ​មាន​ទាំង​ចំណុចវិជ្ជមាន និង​ចំណុច​អវិជ្ជមាន។នេះ​បើ​យោង​តាម​លោក​ ​ព្រាប កុល​ ​នាយក​ប្រតិបត្តិ​នៃ​អង្គការ​តម្លាភាព​កម្ពុជា។

លោក​បាន​និយាយ​ថា ​ចំណុច​វិជ្ជមាន​នោះ​គឺ​យុវជន​ដែល​មាន​សមត្ថភាព​អាច​មាន​ឱកាស​បម្រើ​ការងារ​រដ្ឋាភិបាល​ និង​ទទួល​បាន​បទពិសោធន៍​ការងារ​បន្ថែម។

លោក​ ព្រាប កុល​ បាន​បន្ថែម​ថា៖​

«ហើយ​ចំណុច​អវិជ្ជមាន​គឺ​បើ​សិន​ជា​មិន​មាន​តម្រូវ​ការ​ជាក់​ស្ដែង​ មិន​មាន​តម្រូវការ​នៅ​ក្នុង​ការ​បំពេញ​ការងារ​ ដែល​ទាមទារ​ឲ្យ​មាន​ចំនួន​មន្ត្រី​ថែមហើយ​យើង​រើស​ចូល​ វា​អាច​ជា​ការ​កើន​នូវ​ចំណាយ​ថវិកា​ជាតិ»។

ទោះ​យ៉ាង​ណា លោក​ ​យក់ ប៊ុនណា ​រដ្ឋលេខាធិការ​ក្រសួង​មុខ​ងារ​សាធារណៈ​ច្រានចោល​ក្ដី​បារម្ភ​នេះ​ ដោយ​លោក​អះអាង​ថា​ ការ​រើស​មន្ត្រី​រាជការ​ដើម្បី​បម្រើ​ការងារ​នេះ ​មិន​មាន​ប៉ះពាល់​ដល់​ថវិកា​ជាតិ​ឡើយ។

​ទិន្នន័យ​ចុះផ្សាយ​ដោយ​ក្រសួង​សេដ្ឋកិច្ច​និង​ហិរញ្ញវត្ថុ​ ​ឱ្យ​ដឹង​ថា​សម្រាប់​ឆ្នាំ២០១៩​នេះ​រដ្ឋាភិបាល​កម្ពុជា​គ្រោង​ចំណាយថវិកាជាតិ​សរុប​ចំនួន​ ​២៥​លាន​លាន​រៀល​ស្មើនឹង​ជាង​៦ពាន់​លាន​ដុល្លារ​សហរដ្ឋ​អាមេរិក​ ​ក្នុង​នោះ​ចំណាយ​សម្រាប់​បុគ្គលិក​រួម​ទាំង​មន្ត្រី​ក្រប​ខណ្ឌ​និង​មន្ត្រី​ជាប់​កិច្ច​សន្យា​ ត្រូវ​បាន​គ្រោង​ចំនួន​ជាង​៧​លាន​លាន​រៀល​ស្មើ​នឹង​ជិត​២ពាន់​លាន​ដុល្លារ​សហរដ្ឋ​អាមេរិក៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG