នៅសប្ដាហ៍នេះ ស្ថាប័នគ្រប់គ្រងពន្ធនាគាររបស់រាជរដ្ឋាភិបាលកម្ពុជា បានចេញបម្រាមមួយ ហាមមិនឲ្យមានការប្រើប្រាស់ប្រព័ន្ធទូរសព្ទនៅតាមមណ្ឌលអប់រំកែប្រែ និងមន្ទីរឃុំឃាំងរាជធានី ខេត្តនៅទូទាំងប្រទេស។ នេះបើយោងតាមសេចក្ដីណែនាំមួយរបស់អគ្គនាយកដ្ឋានពន្ធនាគារនៃក្រសួងមហាផ្ទៃ។
សេចក្ដីណែនាំដែលបានចេញផ្សាយដោយអង្គភាពព័ត៌មានដែលស្និទ្ធនឹងរដ្ឋាភិបាល Fresh News នៅថ្ងៃព្រហស្បតិ៍នេះ បានបញ្ជាក់ថា បម្រាមនេះ បានធ្វើឡើងដោយយោងតាមបទបញ្ជារបស់លោកនាយករដ្ឋមន្ត្រី ហ៊ុន សែន ដែលកាលពីថ្ងៃទី៤ ខែមីនាកន្លងទៅនេះ បានចេញការព្រមានជាថ្មីមិនឲ្យមានការប្រាស្រ័យទាក់ទងគ្នាតាមទូរសព្ទនៅក្នុងពន្ធនាគារ។
សេចក្ដីណែនាំរបស់លោក ចាន់ គីមសេង អគ្គនាយកអគ្គនាយកដ្ឋានពន្ធនាគារ ចុះថ្ងៃទី៤ ខែមីនា ឆ្នាំ២០១៩ បានសរសេរក្នុងន័យដើមថា អនុវត្តបទបញ្ជាដ៏ខ្ពង់ខ្ពស់របស់នាយករដ្ឋមន្ត្រីនៃប្រទេសកម្ពុជា […] អគ្គនាយកដ្ឋានពន្ធនាគារសូមធ្វើការណែនាំដល់ឯកឧត្ដម អស់លោកប្រធានមណ្ឌលអប់រំកែប្រែ និងពន្ធនាគាររាជធានី ខេត្ត៖
«បញ្ឈប់ការប្រើប្រាស់ប្រព័ន្ធទូរសព្ទ ដែលដាក់ឲ្យជនជាប់ឃុំប្រើប្រាស់ ចាប់ពីថ្ងៃទី៤ ខែមីនា ឆ្នាំ២០១៩ រហូតដល់មានបទបញ្ជាថ្មី»។
លោក ចាន់ គីមសេង ក៏បង្គាប់មេឆ្មាំពន្ធនាគារ បង្កើនការបង្ការទប់ស្កាត់រាល់ការលួចលាក់នាំទូរសព្ទចល័តចូលមណ្ឌលអប់រំកែប្រែ និងពន្ធនាគារ និងពង្រឹងការត្រួតពិនិត្យ ឆែកឆេរ ដកហូតទូរសព្ទក្នុងមណ្ឌលអប់រំកែប្រែ និងពន្ធនាគារ។
សេចក្ដីណែនាំរបស់អគ្គនាយកដ្ឋានពន្ធនាគារដដែលបានបន្តថា ក្នុងករណីឃើញទូរសព្ទដែលបម្រុងនាំចូល ឬរកឃើញទូរសព្ទក្នុងពន្ធនាគារ ត្រូវធ្វើកំណត់ហេតុដកហូតរក្សាទុក។ ចំពោះជនដែលប្រព្រឹត្តបទល្មើស ត្រូវមានវិធានការតាមផ្លូវច្បាប់ ក្នុងមាត្រា៥៧១ និងមាត្រា៦៧២នៃក្រមព្រហ្មទណ្ឌកម្ពុជា និងដាក់វិន័យតាមបទបញ្ជាផ្ទៃក្នុងរបស់ពន្ធនាគារ។
មន្ត្រីពន្ធនាគារ ក៏ត្រូវរាយការណ៍អំពីសភាពការណ៍ និងលទ្ធផលនៃការចាត់តាំងអនុវត្តសេចក្ដីណែនាំនេះ តាមរយៈរបាយការណ៍ប្រចាំថ្ងៃមកអគ្គនាយកដ្ឋានពន្ធនាគារ។
កាលពីថ្ងៃទី៤ ខែមីនា ឆ្នាំ២០១៩ លោកហ៊ុន សែន ដែលបានចូលរួមធ្វើជាអធិបតីនៅក្នុងពិធីបើកការដ្ឋានសាងសង់ហេដ្ឋារចនាសម្ព័ន្ធការពារទឹកជំនន់ និងកែលម្អប្រព័ន្ធប្រឡាយលូ ក្នុងរាជធានីភ្នំពេញ បានអំពាវនាវម្ដងទៀត ដល់ឆ្មាំគុក ឲ្យហាមឃាត់ការប្រើប្រាស់ទូរសព្ទ ដើម្បីរត់ការដោះស្រាយក្ដីនៅតុលាការ។
លោកបានថ្លែងដល់ករណីហិង្សាមួយ ដែលលោកអះអាងថា មានស្ត្រីម្នាក់បានព្យាយាមប្រើប្រាស់ទូរសព្ទ ដើម្បីរត់ការដោះស្រាយករណីនេះចេញពីពន្ធនាគារ។
«អារឿងប្រើប្រាស់ប្រព័ន្ធចេញពីពន្ធនាគារនេះ វានៅតែមានបន្ត ហើយរត់ការដើម្បីយករួចខ្លួនតើសូកប៉ាន់អ្នកណា? វាយក្បាលអាអ្នកហ្នុង វាយក្បាលអាអ្នកហ្នុង រត់ការអាហ្នឹងដូចជា បទល្មើសហិង្សាស្អីនោះ វាយគេ វាយគេ មកជាប់គុក ហើយឥឡូវកំពុងរត់ការ ហើយកូននោះប្រាប់ថា ម៉ាក់ កុំនិយាយតាមទូរសព្ទ គាត់មិនជឿកូនថា អញនៅតែនិយាយ វាគ្មានអាណាចាប់អញ។ ចាប់បានទេ»។
VOA មិនទាន់អាចសុំការអធិប្បាយភ្លាមៗពីលោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃបានទេនៅថ្ងៃព្រហស្បតិ៍នេះ ដោយលោកអះអាងថាលោកជាប់មានរវល់ក្នុងកិច្ចប្រជុំ។
លោក អំ សំអាត ប្រធានការិយាល័យបច្ចេកទេសស៊ើបអង្កេតរបស់អង្គការសិទ្ធិមនុស្សលីកាដូ (Licadho) មានប្រសាសន៍ប្រាប់ VOA ថា ការហាមមិនឲ្យប្រើប្រាស់ទូរសព្ទចល័តក្នុងបន្ទប់ពន្ធនាគារ គឺអាចជាការអនុវត្តទូទៅនៅតាមពន្ធនាគាររបស់ប្រទេសមួយចំនួន។
យ៉ាងណាក្ដី លោកថា ការប្រើប្រាស់ទូរសព្ទសាធារណៈនៅក្នុងពន្ធនាគារ មិនអាចត្រូវបានហាមឃាត់នោះទេ ព្រោះការហាមនេះ អាចបំពានសិទ្ធិរបស់អ្នកជាប់ឃុំក្នុងការប្រាស្រ័យទាក់ទងជាមួយក្រុមគ្រួសារសាច់ញាតិ។
«ទាក់ទងនឹងទូរសព្ទសាធារណៈរបស់ពន្ធនាគារវិញដែលដាក់សម្រាប់ឲ្យអ្នកទោសគាត់ អ្នកជាប់ឃុំហ្នឹងគាត់ទាក់ទងទៅក្រុមគ្រួសារ ឬក៏អីហ្នុង អាហ្នុងខ្ញុំគិតថា មិនគួរនឹងត្រូវមានការទេអាហ្នុង ព្រោះអាហ្នុងវាគ្រាន់តែថាដាក់ជាសាធារណៈហើយ មន្ត្រីពន្ធនាគារហ្នឹង គាត់នៅហ្នឹងទៀត។ អ៊ីចឹងបើសិនជាអ្នកដែលជាប់ឃុំហ្នឹងគាត់និយាយអីខុស មន្ត្រីពន្ធនាគារហ្នឹងហាមហើយ មិនឲ្យប្រើប្រាស់បាន។ អាហ្នុងព្រោះ កាលណាបើគាត់ត្រូវការទាក់ទងទៅសាច់ញាតិឲ្យមកសួរសុខទុក្ខ ឬក៏គាត់ត្រូវការអីមួយចាំបាច់សម្រាប់គាត់ ឬក៏គាត់ជូនដំណឹងពីអីមួយដែលជារឿងផ្ទាល់ខ្លួនរបស់គាត់ ដែលសុំឲ្យគ្រួសារជួយអី បើយើងបិទទៅ តើគាត់ទាក់ទងគ្រួសារតាមវិធីណា?»។
ទាក់ទិនការប្រើប្រាស់ទូរសព្ទនៅក្នុងពន្ធនាគារនេះ លោកហ៊ុន សែន ក៏ធ្លាប់ប្រតិកម្មខ្លាំងៗកាលពីឆ្នាំ២០១៨ ទៅនឹងអ្នកនយោបាយគណបក្សប្រឆាំងមួយរូបគឺលោក មាជ សុវណ្ណារ៉ា ដែលជាប្រធានផ្នែកព័ត៌មានរបស់គណបក្សសង្គ្រោះជាតិជាគណបក្សដែលត្រូវបានតុលាការខ្មែររំលាយចោលកាលពីឆ្នាំ២០១៧។
នាគ្រានោះលោកនាយករដ្ឋមន្ត្រី ហ៊ុន សែន បានបញ្ជាឲ្យសមត្ថកិច្ចដកហូតទូរសព្ទពីលោក មាជ សុវណ្ណារ៉ា ភ្លាមៗ បន្ទាប់ពីលោកបានចោទលោក មាជ សុវណ្ណារ៉ា មន្ត្រីជាន់ខ្ពស់គណបក្សប្រឆាំងថា បានប្រើប្រាស់ទូរសព្ទធ្វើនយោបាយចេញពីក្នុងពន្ធនាគារ៕
