សាលារៀននៅស្រុក២ក្នុងរដ្ឋ Texas មិនស្តាប់តាមបទបញ្ជារបស់អភិបាលរដ្ឋលោក Greg Abbott ដែលហាមប្រាមមិនឲ្យរដ្ឋបាលមូលដ្ឋានចេញគោលការណ៍តម្រូវឲ្យពាក់ម៉ាសនោះទេ ស្របពេលដែលរដ្ឋនៅភាគនិរតីសហរដ្ឋអាមេរិកមួយនេះប្រឈមនឹងការហក់ឡើងខ្ពស់នៃចំនួនអ្នកឆ្លងជំងឺកូវីដ១៩នោះ។
លោក Michael Hinojosa ប្រធានមន្ទីរអប់រំក្នុងទីក្រុង Dallas រដ្ឋ Texas បានប្រកាសនៅថ្ងៃច័ន្ទថា សិស្ស និងគ្រូទាំងអស់ត្រូវពាក់ម៉ាស។ ការប្រកាសនេះកើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រធានមន្ទីរអប់រំសាលរដ្ឋក្នុងទីក្រុង Houston ក្នុងរដ្ឋTexasដែរ ដែលជាស្រុកដែលមានសាលារៀនជាច្រើនក្នុងរដ្ឋនេះ បានប្រកាសថា លោកនឹងស្នើឲ្យគណៈអភិបាលស្រុកដើម្បីដាក់ចេញវិធានការតម្រូវឲ្យពាក់ម៉ាស។
ប្រធានគណៈអភិបាលស្រុក Dallas លោកចៅក្រម Clay Jenkins បានដាក់ពាក្យបណ្តឹងប្រឆាំងបទបញ្ជានីតិប្រតិបត្តិរបស់អភិបាលរដ្ឋ Texas ដែលមិនចេញវិធានការតម្រូវឲ្យពាក់ម៉ាសនោះ។
ដូចរដ្ឋ Texas ដែរ រដ្ឋ Florida កំពុងប្រឈមការហក់ឡើងជាថ្មីនៃការឆ្លងជំងឺកូវីដ១៩ ដោយ៤០%នៃចំនួនគ្រែអ្នកជំងឺក្នុងបន្ទប់សង្គ្រោះមានអ្នកជំងឺកូវីដ១៩។
សារព័ត៌មាន The New York Times រាយការណ៍ថា សហរដ្ឋអាមេរិកនៅពេលនេះមានអ្នកឆ្លងជំងឺកូវីដ១៩ប្រចាំថ្ងៃជាមធ្យមជាង១០ម៉ឺននាក់ដែលជាតួលេខខ្ពស់បំផុត ចាប់តាំងពីខែកុម្ភៈមក។
អ្នកជំនាញផ្នែកសុខភាពថា ការកើនឡើងថ្មីនេះគឺមកពីការរាលដាលនៃវីរុសកូរ៉ូណាប្រភេទដែលតា(delta)ដែលឆ្លងខ្លាំងនិងការធ្លាក់ចុះនៃចំនួនជនជាតិអាមេរិក ដែលចង់ចាក់វ៉ាក់សាំង។ ភាគច្រើននៃករណីជំងឺកូវីដ១៩ថ្មីគឺជាកុមារតូចៗដែលមិនទាន់អាចចាក់វ៉ាក់សាំងបាន។ នេះបើតាមកាសែត The New York Times៕
