លោក Joe Biden បេក្ខជនប្រធានាធិបតីសហរដ្ឋអាមេរិកពីគណបក្សប្រជាធិបតេយ្យ ថ្លែងថា លោកមានផែនការមួយ ដើម្បីជួយសហរដ្ឋអាមេរិកប្រយុទ្ធនឹងការបន្តរាតត្បាតនៃជំងឺកូវីដ១៩។
លោក Biden ថ្លែងយ៉ាងដូច្នេះ កាលពីយប់ថ្ងៃព្រហស្បតិ៍ ក្នុងអំឡុងសន្និបាតជាតិតាមអនឡាញរបស់គណបក្សប្រជាធិបតេយ្យ ដើម្បីទទួលយកការតែងតាំងរបស់គណបក្ស ដើម្បីឈរជាបេក្ខជនប្រធានាធិបតី។ លោក Biden ថា ផែនការរបស់លោក រួមមានបទបញ្ជាថ្នាក់ជាតិឲ្យមានការពាក់ម៉ាស់នៅទូទាំងប្រទេស និងការធ្វើតេស្តរកកូវីដ១៩ ដែលឲ្យលទ្ធផលភ្លាមៗ។ ផែនការរបស់លោកក៏នឹងជំរុញឲ្យមានការផលិតសម្ភារៈពេទ្យកាន់តែច្រើន នៅសហរដ្ឋអាមេរិកផងដែរ។
លោក Biden ថា លោកនឹងធានាឲ្យសាលារៀននានាមានអ្វីគ្រប់យ៉ាង ដើម្បីអាចបើកដំណើរការឡើងវិញ ដោយសុវត្ថិភាពនិងប្រកបដោយប្រសិទ្ធភាព។
សហរដ្ឋអាមេរិកនៅតែមានចំនួនអ្នកឆ្លង និងអ្នកស្លាប់ពីជំងឺកូវីដ១៩ច្រើនជាងគេក្នុងពិភពលោក ដោយគិតត្រឹមថ្ងៃសុក្រ មានអ្នកឆ្លងសរុបជាង ៥លាន ៥សែននាក់ និងអ្នកស្លាប់ជាង ១៧ម៉ឺន ៤ពាន់នាក់។
ក្នុងរឿងដាច់ដោយឡែកមួយ ប្រទេសហ្វីលីពីន កាលពីថ្ងៃសុក្រ បានរាយការណ៍ករណីឆ្លងកូវីដ១៩ថ្មីចំនួនជាង ៤.៧៨៦ ដែលធ្វើឲ្យអ្នកឆ្លងសរុបនៅក្នុងប្រទេសនេះ បានកើនដល់ជាង ១៨២.០០០នាក់ ហើយចំនួនអ្នកស្លាប់ ៥៩នាក់ ដែលធ្វើឲ្យអ្នកស្លាប់សរុបកើនដល់ ២.៩៤០នាក់។ រដ្ឋមន្ត្រីសុខាភិបាលហ្វីលីពីនលោក Francisco Duque បានថ្លែងថា ជំងឺកូវីដ១៩កាន់តែឆ្លងខ្លាំង ដោយសារវីរុសដែលបង្កជំងឺនេះបានវិវត្តទៀត។
នៅជុំវិញពិភពលោកនៅពេលនេះ វីរុសកូរ៉ូណាបានឆ្លងដល់មនុស្សជាង ២២,៧លាននាក់ និងបានសម្លាប់ជីវិតមនុស្សប្រមាណជិត ៨០០.០០០នាក់។ នេះបើតាមតួលេខពីសាកលវិទ្យាល័យ Johns Hopkins៕
