ភ្ជាប់​ទៅ​គេហទំព័រ​ទាក់ទង

​រដ្ឋាភិបាល​ស្នើ​អង្គការ​សមាជិក​សភា​អាស៊ាន​ឲ្យ​គោរព​គោលការណ៍​អាស៊ាន​


រូបភាព​ដំបូង​នៃ​គេហទំព័រ​របស់​អង្គការ​តំណាងរាស្ត្រ​អាស៊ាន​ដើម្បី​សិទ្ធិមនុស្ស ដែល​បង្ហាញ​ពី​របាយការណ៍​ថ្មី​មួយ​ស្តី​ពី​ស្ថានភាព​នយោបាយ​នៅ​កម្ពុជា។ (រូប​ដក​ស្រង់​ចេញ​ពី​គេហទំព័រ)

អង្គការ​សមាជិក​សភា​អាស៊ាន​ ដើម្បី​គោរព​សិទ្ធិ​មនុស្ស​ បាន​ចេញ​របាយការណ៍​មួយ​ដែល​មាន​ចំណង​ជើង​ថា ​«ប្រផ្នូល​នៃការ​ស្លាប់​លទ្ធិ​ប្រជាធិប​តេយ្យ៖​ ការ​វាយ​ប្រហារ​ទៅ​លើ​តំណាង​រាស្ត្រ​និង​ការគំរាម​កំហែង​មក​លើ​ស្ថាប័ន​នា​នា​របស់​កម្ពុជា»។​

​រដ្ឋាភិបាល​កម្ពុជា​ បាន​ស្នើ​អង្គការ​សមាជិក​សភា​អាស៊ាន​ ដើម្បី​សិទ្ធិ​មនុស្ស​ (ASEAN Parliamentarians for Human Rights)​ ឲ្យ​គោរព​គោលការណ៍​ មិន​ជ្រៀតជ្រែក​កិច្ច​ការ​ផ្ទៃក្នុង​របស់​ប្រទេស​សមាជិក​អាស៊ាន។​ នេះ​បើ​តាម​សេចក្តី​ប្រកាស​ព័ត៌មាន​របស់​ក្រសួង​ការ​បរទេស​ និង​សហប្រតិបត្តិការ​អន្តរជាតិ​ដែល​ VOA​ ទទួល​បាន​នៅ​ថ្ងៃ​ពុធ​នេះ។​

ការ​ស្នើ​របស់​រដ្ឋាភិបាល​កម្ពុជា​ ធ្វើ​ឡើង​ពីរថ្ងៃ​ ក្រោយ​ពី​អង្គការ​សមាជិក​សភា​អាស៊ាន​ ដើម្បី​គោរព​សិទ្ធិ​មនុស្ស​ បាន​ចេញ​របាយការណ៍​មួយ​ដែល​មាន​ចំណង​ជើង​ថា ​«ប្រផ្នូល​នៃការ​ស្លាប់​លទ្ធិ​ប្រជាធិប​តេយ្យ៖​ ការ​វាយ​ប្រហារ​ទៅ​លើ​តំណាង​រាស្ត្រ​និង​ការគំរាម​កំហែង​មក​លើ​ស្ថាប័ន​នា​នា​របស់​កម្ពុជា»។​

របាយកាណ៍​នោះ​ បាន​ឲ្យ​ដឹង​ថា​ បី​ឆ្នាំ​កន្លង​មក​នេះ​ មាន​តំណាងរាស្ត្រ​ចំនួន​ ១៥​រូប​ ត្រូវ​បាន​រក​ឃើញ​ថា ជា​ជន​រងគ្រោះ​នៃ​បទ​ចោទ​ប្រកាន់​បទ​ព្រហ្មទណ្ឌ​ និង​នីតិវិធី​របស់​តុលាការ​ ដែល​ជា​ ការ​វាយប្រហារ​ដោយ​តុលាការ​ទៅ​លើ​ក្រុម​ អ្នក​ប្រឆាំង​នៅ​កម្ពុជា។​ របាយការណ៍​ ក៏​បាន​បញ្ជាក់​ថា​ ការ​វាយដំ​លើ​តំណាងរាស្ត្រ​គណបក្ស​សង្គ្រោះជាតិ​ចំនួន​ពីរ​រូប​ដោយ​ក្រុម​អ្នក​គាំទ្រ​គណបក្ស​កាន់​អំណាច​ បាន​បង្កើត​បរិយាកាស​ភ័យ​ខ្លាច​នៅ​កម្ពុជា។​

ការណ៍​នេះ​ បញ្ជាក់​យ៉ាង​ច្បាស់​ថា ​កិច្ចខិត​ខំ​នា​នា​របស់​គណបក្ស​កាន់​អំណាច​ដើម្បី​ធ្វើ​ឲ្យ​គណបក្ស​ជំទាស់ចុះខ្សោយ​នៅ​មុន​ការ​បោះឆ្នោត​ឃុំ ​សង្កាត់​ និង​បោះឆ្នោត​ជាតិ​ដ៏​សំខាន់​នៅ​ឆ្នាំ​ ២០១៧​ និង​ឆ្នាំ​២០១៨​ កំពុង​ធ្វើ​ឲ្យ​ខូច​មុខងារ​ និង​ ស្ថាប័ន​គ្រឹះ​នៃ​អភិបាលកិច្ច​បែប​ប្រជាធិបតេយ្យ។​

សេចក្តី​ប្រកាស​ព័ត៌មាន​របស់​ក្រសួង​ការបរទេស​ ចុះ​នៅ​ថ្ងៃ​ទី​ ២២​ ខែ​មីនា​នេះ​ បាន​បញ្ជាក់​ថា​ អង្គការ​សមាជិក​សភា​អាស៊ាន​ដើម្បី​សិទ្ធិ​មនុស្ស ​ជា​ក្រុម​តូច​មួយ​នៃ​អតីត​ និង​ជា​សមាជិក​សភា​បច្ចុប្បន្ន ​របស់​បណ្តា​ប្រទេស​សមាជិក​អាស៊ាន​ និង​ពុំ​ត្រូវ​បាន​ទទួល​ស្គាល់​ ជា​អង្គភាព​របស់​អាស៊ាន​នោះ​ទេ។​

ក្រសួង​ការបរទេស​បាន​បន្ត​ថា​ របាយការណ៍​របស់​ APHR ​គ្រាន់​តែ​បាន​ឆ្លុះ​បញ្ចាំង​ពី​ទស្សនៈ​ ខ្មៅ​ងងឹត​របស់​បុគ្គល​មួយចំនួនតូច​ ដែល​ពុំ​បាន​យោងលើ​ការពិត​ ជាក់ស្តែង​និង​មិន​អាច​ជឿ​បាន​នោះ​ឡើយ។​

តាម​សេចក្តី​ប្រកាស​ព័ត៌មាន​របស់​ក្រសួង​ការបរទេស​ បាន​បញ្ជាក់​ក្នុង​ន័យ​ដើម​យ៉ាង​ដូច្នេះ​ថា៖​

«សំខាន់​ជាង​នេះទៀត​ ចំាបាច់​ត្រូវ​រំលឹក​លោក​ Charles Santiago​ ដែល​ជា​សមាជិក​សភា​នៃ​ប្រទេស​ម៉ាឡេស៊ី​ និង​ជាប្រធាន​នៃ​ក្រុម​នេះ ត្រូវ​គោរព​អោយ​បាន​ត្រឹមត្រូវ​ចំពោះ​គោលការណ៍​ពិសិដ្ឋ​របស់​អាស៊ាន​ស្តីពី​ ការ​មិន​ជ្រៀតជ្រែក​ចូល​កិច្ចការ​ ផ្ទៃ​ក្នុង​ របស់​រដ្ឋ​សមាជិក​ អាស៊ាន»។​

​VOA ​មិន​ទាន់​អាច​ទាក់​ទង​លោក​ ជុំ សុន្ទរី​ អ្នក​នាំពាក្យ​នៃ​ក្រសួង​ការបរទេស​ ដើម្បី​សុំ​សេច​ក្តី​អធិប្បាយ​បន្ថែម​នៅ​ថ្ងៃ​ពុធ​នេះ។​

ក៏ប៉ុន្តែ​ លោក​ សុខ ឥសាន​ អ្នក​នាំពាក្យ​នៃ​គណបក្ស​ប្រជាជន​កម្ពុជាបាន​ច្រានចោល​របាយការណ៍​ របស់​អង្គ​ការ​សមាជិក​សភា​អាស៊ាន​ ដើម្បី​សិទ្ធិ​មនុស្ស​ ដោយ​លោក​បាន​អះអាងថា​ អង្គការ​នេះ​បាន​ព្យាយាម​លើក​យក​បញ្ហា​ចាស់ៗ​ ដែល​បាន​កើត​ឡើង​រួច​មក​ហើយ​ មក​បន្ត​វាយ​ប្រហារ​លើ​គណបក្ស​កាន់​អំណាច។​

«ការ​លើក​យក​រឿង​ឧប្បទេវហេតុ​ មាន​អំពើ​ហិង្សា​លើ​សមាជិក​ពីរ​រូប​នៅ​ក្នុង​គណបក្ស​ប្រឆាំង​ហ្នឹង​វា​រំលង​បាន​ ពីរ​ បី​ឆ្នាំ​ ទៅ​ហើយ​ ដូច្នេះ​ហើយ​ គាត់​នឹង​ជាអ្នក​សន្សំ​រឿង​ទេ។​ រឿង​វា​ផុត​រលត់​បាត់​ទៅ​ហើយ​ តុលាការ​បាន​ចាត់ការ​នីតិវិធី​ ចប់​សព្វគ្រប់​អស់​ទៅ​ហើយ។​ បាទ​អញ្ចឹង!​យើង​យល់​ថា​ នេះ​ជា​ចេតនា​ទុច្ចរិត​មួយ​របស់​ក្រុម​ប្រឆាំង​ដែល​មាន​ខ្សែ​រយៈ​ទាំង​ក្នុង​ ​ទៅ​ក្រៅ​ប្រទេស»។​

លោក​ សុខ ឥសាន​ បាន​បន្ថែម​ថា​ របាយការណ៍​របស់​អង្គការ​សមាជិក​សភា​អាស៊ាន​ គឺ​ជា​ទស្សនៈ​របស់​ក្រុម​ប្រឆាំង​តែ​ប៉ុណ្ណោះ។​

​អ្នក​នាំ​ពាក្យ​រូប​នេះ​ថ្លែង​ប្រាប់​ VOA ថា៖

«ខ្ញុំ​យល់​ថា​ អង្គការ​សមាជិក​អាស៊ាន​នេះ​ គឺ​ថា​ សុទ្ធតែ​ប្រមូលផ្តុំ​ដោយ​ពួក​ប្រឆាំង​ទេ!​ សុទ្ធ​តែ​សភា​ចេញពី​គណបក្ស​ប្រឆាំង។ ​អញ្ចឹង​គាត់​គ្មាន​វិសាលភាព​ ​ទម្ងន់​អី​ ដាក់​មក​លើ​ រាជរដ្ឋាភិបាល​កម្ពុជា​ ឬ​មួយ​គណបក្ស​កាន់​អំណាច​នៅ​កម្ពុជា​ទេ»។​

លោក​ Charles Santiago​ ប្រធាន​អង្គការ​សមាជិក​សភា​អាស៊ាន​ ដើម្បី​សិទ្ធិមនុស្ស​ បាន​បញ្ជាក់​ប្រាប់​ VOA ​តាមរយៈ​សារ​អេឡិចត្រូនិក​ ឬ​អ៊ីម៉េល​ថា​ រដ្ឋាភិបាល​កម្ពុជា​ មិន​មាន​បំណង​ ធ្វើ​តាម​អនុសាស​ន៍​នា​នា​ ដើម្បី​ធានា​ដល់​សុវត្ថិភាព​របស់​តំណាងរាស្ត្រ។​

លោក​ថ្លែង​បន្ត​ថា​ អង្គការ​សមាជិក​សភា​អាស៊ាន​ មិន​បាន​រំលោភ​បំពាន​គោលការណ៍​មិន​ជ្រៀតជ្រែក​របស់​អាស៊ាន​នោះ​ទេ។​

លោក​បាន​ពន្យល់​ក្នុង​ន័យ​ដើម​ថា៖

«យើង​មិនត្រូវ​បាន​ចង​ភ្ជាប់​ដោយ​គោលការណ៍​មិន​ជ្រៀតជ្រែក​នោះ​ទេ។​ តែ​ដោយ​បទដ្ឋាន​អន្តរជាតិ​ នា​នា​ ក្នុង​នោះ​រួម​មាន​ អនុសញ្ញា​ និង​សិទ្ធិសញ្ញា​ ដែល​រដ្ឋាភិបាល​ប្រទេស​សមាជិក​អាស៊ាន​ពេញចិត្ត​នឹង​ការចុះហត្ថលេខា​ ក្នុង​នោះ​មាន​ប្រទេស​កម្ពុជា។​ ប្រសិន​បើ​រដ្ឋាភិបាល​កម្ពុជា​ មាន​បញ្ហា​រស់នៅ​ជា​មួយ​ ការគោរព​សិទ្ធិ​មនុស្ស​ និង​ការសន្យា​ខាង​ប្រជាធិបតេយ្យ​ដែល​បាន​សរសេរ​ក្នុង​ឯកសារ​ទាំងនេះ​ ពួក​គេ​គួរចេញ​សេចក្តី​ថ្លែងការណ៍​ ដែល​និយាយ​ថា​ ពួកគេ​មិន​យល់​ព្រម​នឹង​ធម្មនុញ្ញ​អាស៊ាន​នោះទេ»។​

របាយការណ៍​ស្តីពី​ប្រផ្នូល​នៃ​ការ​ស្លាប់​លទ្ធិប្រជាធិបតេយ្យនៅ​កម្ពុជា​ របស់អង្គ​ការ​សមាជិក​សភា​អាស៊ាន​ ដើម្បី​សិទ្ធិ​មនុស្ស​ ត្រូវ​បាន​ធ្វើ​ឡើង​ ក្រោយ​ពី​គណបក្សកាន់​អំណាច​ ស្នើ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ។​ សេចក្តី​ស្នើ​ច្បាប់​នេះ​ មាន​គោល​បំណង​ចម្បង​ក្នុង​ការ​រំលាយ​គណបក្ស​នយោបាយ​ដែល​មាន​មេដឹកនាំ​ប្រព្រឹត្ត​បទ​ល្មើស​ធ្ងន់ធ្ងរ។​

លោក​ Charlse Santiago​ ប្រធាន​អង្គការ​សមាជិក​សភា​អាស៊ាន​ ដើម្បី​សិទ្ធិមនុស្ស​ បាន​ថ្លែង​នៅ​ក្នុង​សេចក្តី​ថ្លែងការណ៍​ដាច់​ដោយឡែក​មួយ​ មុនការ​ចេញ​របាយការណ៍​ស្តីពី​ប្រផ្នូល​នៃ​ការ​ស្លាប់​លទ្ធិ​ប្រជាធិប​តេយ្យនៅ​កម្ពុជា​នេះ​ ក្នុង​ន័យ​ដើម​ថា៖​

«ការ​អនុម័ត​សេចក្តី​ស្នើច្បាប់​នេះ​ នឹង​បង្ហាញ​អំពី​ការ​ស្លាប់​នៃ​លទ្ធិ​ប្រជាធិបតេយ្យ​នៅ​ក្នុង​ប្រទេស​កម្ពុជា។​ យើង​កំពុង​និយាយ​អំពីការ​ផ្លាស់ប្តូរ​ដែល​នឹង​ប្រែក្លាយ​ប្រទេស​នេះ​ ទៅ​ជា​រដ្ឋ​ដែល​មាន​គណបក្ស​តែមួយ​ ហើយ​នឹង​ធ្វើ​ឲ្យ​ប៉ះពាល់​ដល់​ភាពស្រប​ច្បាប់​នៃ​ការបោះឆ្នោត​ ដែល​នឹង​មក​ដល់​នា​ប៉ុន្មាន​ខែ​ខាង​មុខ»។​

ក្រសួង​ការបរទេស​ បាន​ថ្លែង​ការពារ​សេចក្តី​ស្នើ​វិសោធនកម្ម​ ដោយ​បាន​បញ្ជាក់​ក្នុង​ន័យ​ដើម​ថា៖​

«ក៏​ដូច​នៅ​តាម​បណ្តា​ប្រទេស​ប្រកាន់​លទ្ធិប្រជាធិប​តេយ្យ​នា​នា​ដែរ​ ច្បាប់​ដែល​បាន​ធ្វើ​វិសោធនកម្ម​នេះ​ មាន​គោល​បំណង​ទប់ស្កាត់​រាល់​ការ​រំលោភ​បំពាន​ដែល​មិនស្រប​ទៅ​តាម​គោលការណ៍​គ្រឹះ​នៃ​លទ្ធិ​ប្រជាធិបតេយ្យ​ ដូច​ជា​ការញុះញង់ ឲ្យ​មានសម្អប់​ខាង​ជាតិសាសន៍ ​ការ​បង្ខូច​កេរ្តិ៍ឈ្មោះ​ និង​ការបំផ្លិច​បំផ្លាញ​ដល់​គ្រឹះ​សង្គម​របស់​ប្រជាជាតិ​ជា​ដើម»។​

អ្នក​ឃ្លាំមើល​ស្ថានភាព​សិទ្ធិ​មនុស្ស​នៅ​កម្ពុជា​ បាន​និយាយ​ថា​ ការ​គោរព​សិទ្ធិ​មនុស្ស​ និង​ការ​អនុវត្ត​លទ្ធិ​ប្រជាធិបតេយ្យ​នៅ​កម្ពុជា​ ធ្លាក់ចុះ​ធ្ងន់ធ្ងរ​នៅ​គ្រា​ដែល​ស្ថានភាព​នយោបាយ​បន្ត​តាន​តឹង​ និង​មុន​ពេល​រៀបចំ​ការ​បោះឆ្នោត៕​


XS
SM
MD
LG