ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ឲ្យ​ពលរដ្ឋ​១៨​គ្រួសារ​ក្នុង​ខេត្ត​កោះកុង​សុំ​រើផ្ទះ​សម្បែង


ពលរដ្ឋ​ប្រមាណ ​២០០​នាក់​​បាន​បិទ​ផ្លូវ​ជាតិ​លេខ​៤៨ ​ភ្ជាប់​ពី​ផ្លូវ​ជាតិ​លេខ​ ៤ ​ឆ្ពោះ​ទី​កាន់​ខេត្ត​កោះកុងកាលពីឆ្នាំ២០១២។

ពលរដ្ឋ​១៨​គ្រួសារ​ក្នុង​ស្រុក​មួយ​នៃ​ខេត្ត​កោះកុង​កំពុង​ទទូច​ឲ្យ​រដ្ឋាភិបាល​ផ្តល់​ការ​អនុញ្ញាត​ឲ្យ​ពួកគេ​បន្ត​រស់​នៅ​ក្នុង​លំនៅដ្ឋាន​របស់​ពួកគេ​ ក្រោយ​ពី​មន្ទីរ​បរិស្ថាន​ខេត្ត​នេះ​ចេញ​សេចក្តី​ជូន​ដំណឹង​ឲ្យ​ពួក​គាត់​រុះរើ​ចាក​ចេញ​ក្នុង​រយៈពេល៣០ថ្ងៃ។​

មន្ទីរ​បរិស្ថាន​នៃ​ខេត្ត​កោះកុង​បាន​ចេញ​សេចក្តី​ជូន​ដំណឹង​កាល​ពីដើម​សប្តាហ៍​ទីមួយ​នៃ​ខែ​មិថុនា​នេះ បង្គាប់​ឲ្យ​ប្រជា​ពលរដ្ឋ​ចំនួន​១៨គ្រួសារ​រុះរើ​លំនៅ​ដ្ឋាន​របស់​ខ្លួន​ ដែល​សង់​ដោយ​គ្មាន​ការ​អនុញ្ញាត​ ​ដើម្បី​បើក​ផ្លូវ​ឲ្យ​ក្រុម​ហ៊ុន​ចិនបន្ត​អភិវឌ្ឍ​គម្រោង​វិនិយោគទីក្រុង​ទេសចរណ៍ប្រណិត​មួយ​នៅ​ក្នុង​ខេត្ត​នេះ។​ នេះ​បើ​យោង​ទៅ​តាម​ការ​បញ្ជាក់​ពី​មន្រ្តី​សិទ្ធិ​មនុស្ស​អង្គការ​លីកាដូ​ និង​តំណាង​ប្រជា​ពលរដ្ឋ។​

លោក អ៊ិន គង់ជិត មន្ត្រី​អង្គការ​លីកាដូ​ បញ្ជាក់​ថា​ ប្រជា​ពលរដ្ឋ​១៨គ្រួសារ​ ដែល​រស់នៅ​ក្នុង​ភូមិ​ព្រែកស្មាច់​ ឃុំ​កោះស្តេច​ ស្រុក​គីរី​សាគរ​ ខេត្ត​កោះកុង ​បាន​ទទួល​ការ​ជូន​ដំណឹង​កាល​ពីថ្ងៃ​ទី៥​ ខែ​មិថុនា​ឲ្យ​រុះ​រើ​លំនៅដ្ឋាន​ក្នុង​រយៈ​ពេល​មួយ​ខែ ​ដោយអាជ្ញាធរ​ខេត្ត​បាន​កាត់​ដី​ក្នុង​តំបន់​នេះ​ឲ្យ​ក្រុមហ៊ុន​ Union Development Group​ ធ្វើការ​សាងសង់​អាង​ស្តុកទឹក​ និង​ទំនប់​វារី​អគ្គិសនី។​

«ខាង​មន្ទីរ​បរិស្ថាន​ខេត្ត​កោះកុង​ហ្នឹង​ គាត់​បាន​ចេញ​លិខិត​មួយ​គឺ​បង្គាប់ឲ្យ​ប្រជា​ជន​១៨​គ្រួសារ​ហ្នឹង​ឆាប់​រុះរើ​ផ្ទះ​ក្នុង​អំឡុង​ពេល​មួយ​ខែ​ចេញ​ពី​ទី​តាំង​ដី ​ដែល​ពួក​គាត់​ប្រកប​មុខ​របរ​ធ្វើ​ចម្ការ​បច្ចុប្បន្ន​នេះ​ ស្ថិត​នៅ​ចំណុច​ដំណាក់​ក្របី ​ភូមិព្រែក​ស្មាច់​ ឃុំ​កោះ​សេ្តច​ ស្រុក​គីរី​សាគរ​ ពី​ព្រោះ​ដី​ហ្នឹង​គឺ​ជា​ដី​ដែល​បាន​កាត់​ចេញ​ពី​ឧស្យាន​ជាតិ​បទុម​សាគរ​ទំហ៊ំ៩១០០ហិកតា​ប្រគល់​ឲ្យ​ទៅ​ក្រុម​ហ៊ុន​ចិន​ Union Development Group ​ដើម្បី​អនុវត្ត​គម្រោង​ធ្វើ​អាង​ស្តុក​ទឹក​ និង​ទំនប់​វារី​អគ្គិសនី»។​

លោក​បន្ត​ថា​ ប្រជា​ពលរដ្ឋ​ទាំង​១៨គ្រួសារ​ ដែល​មួយ​ចំនួន​ជា​អតីតខ្មែរក្រហម ​បាន​មក​រស់នៅ​តំបន់​នេះ​ តាំង​ពី​ពួក​គេ​បាន​ធ្វើ​សមាហរណ​កម្មនៅ​ចន្លោះ​ឆ្នាំ​១៩៩៦ ​និង​ឆ្នាំ​១៩៩៧ ​ហើយ​ពួកគេ​ក៏ធ្លាប់​ត្រូវ​បាន​អាជ្ញាធរ​បង្ខំ​ឲ្យ​ចេញ​ពី​ភូមិ​ចាស់​របស់​ពួក​គេ​ ដោយ​គ្មាន​សំណងម្តង​រួច​មក​ហើយក្នុង​តំបន់​ដដែលនេះ​នៅ​ក្នុង​ឆ្នាំ​២០១១។​

ក្រោយ​មក​ពួក​គេក៏​មក​រស់​នៅ​ទីតាំង​ ដែល​មន្ទីរ​បរិស្ថាន​ខេត្ត​ឲ្យ​រើចេញ​ម្តង​នេះ​ទៀត​ ដោយ​ពួក​គាត់​មិន​ដឹង​អំពី​ការ​សម្រេច​របស់​រដ្ឋាភិបាល ​ដែល​ធ្វើ​ឡើង​នៅ​ខែ​សីហា​ ឆ្នាំ​២០១១ ​ឲ្យ​ក្រុម​ហ៊ុន​ចិន​នេះអនុវត្ត​គម្រោង​អាង​ស្តុក​ទឹក​ និង​ទំនប់​វារី​អគ្គិសនី​នេះ​ទេ។​

«ការ​ជូន​ដំណឹង​ពី​ប្រធាន​មន្ទីរបរិស្ថាន​ខេត្ត​ហ្នឹង​បាន​ធ្វើ​ឲ្យ​គាត់​មាន​ការ​ភ័យ​ព្រួយបារម្ភ​ ហើយ​ពួក​គាត់​ចង់​រស់​នៅ​កាន់កាប់ដី​នៅ​ហ្នឹង ដើម្បី​អាស្រ័យ​ផល​បង្កបង្កើន​ផល​តទៅ​ថ្ងៃ​មុខ​ទៀត​ ព្រោះ​អី​គាត់​អត់​មាន​ដី​ឯណា​សម្រាប់​បង្កបង្កើន​ផល​ទេ»។​

ក្រុមហ៊ុន​ Union Development Group​ នេះ​ បាន​ទទួល​ដី​សម្បទាន​សេដ្ឋកិច្ច​សរុបចំនួន​៤៥១០០ហិកតាពី​រដ្ឋាភិបាល​កម្ពុជា​ ដើម្បី​សង់​ទីក្រុង​ទេសចរណ៍​ដ៏ធំ​មួយ​ ដែល​ត្រូវ​ចំណាយ​ទឹក​ប្រាក់​៣,៨ពាន់​លានដុល្លារកាល​ពី​ឆ្នាំ​២០០៨។​ គម្រោង​ទីក្រុង​ទេសចរណ៍​ដ៏​ស្គឹមស្កៃ​នេះ​គឺ​កំពុង​ដំណើរ​ការនៅ​ចំ​កណ្តាល​ឧស្យានជាតិ​បទុមសាគរ​ក្នុង​ខេត្ត​កោះកុង។​

អ្នកស្រី​ ស្រី សុផា អាយុ​៣៥​ឆ្នាំ​ តំណាង​ប្រជា​ពលរដ្ឋ​ដែល​រស់​នៅ​ជាន់​លើ​ដី​សម្រាប់​ការ​កសាង​អាង​ស្តុក​ទឹក​ និងទំនប់​វារីអគ្គិសនី​នេះ បាន​ឲ្យ​ដឹង​ថា ​ប្រជា​ពលរដ្ឋ​ទាមទារ​សុំ​បន្ត​រស់​នៅ​លើ​ដី​របស់​ពួក​គេ​បន្ត​ទៀត​ ព្រោះ​ពួកគេ​មិន​អាច​រក​ទី​តាំង​ដើម្បី​រស់​នៅ​ក្នុង​រយៈ​ពេល​៣០​ថ្ងៃ​បាន​ទេ​ ក្រោយ​ពេល​ទទួល​បាន​ការ​បង្គាប់​ពី​មន្ទីរ​បរិស្ថាន​ខេត្ត​កាល​ពី​ដើម​សបា្តហ៍​ទី​មួយ​នៃ​ខែមិថុនា​នេះ​ ឲ្យ​ពួកគាត់​ចាក​ចេញ​នោះ។​

«គាត់​ថា​ បងប្អូន​មិន​អាច​រស់​ទីនេះ​បាន​ទៀត​ទេ ​ព្រោះអី​កន្លែង​នេះ​រដ្ឋាភិបាល​បាន​ជួល​ឲ្យ​ទៅ​ក្រុម​ហ៊ុន​ Union ​ធ្វើ​ស្តុក​ទឹក​ និង​អាង​ទឹក​វារី​អគ្គិសនី​ហើយ។ ​អញ្ចឹង​ពួក​ខ្ញុំ​ថា ​បើ​ធ្វើ​ក៏​ធ្វើ​ទៅ​ ហើយ​ឲ្យ​ពួក​ខ្ញុំ​ចេញ​អញ្ចឹង រយៈពេល​៣០​ថ្ងៃ​អញ្ចឹង​ ឲ្យ​ពួក​ខ្ញុំ​ទៅ​នៅ​ឯណា​ បើ​ពួក​ខ្ញុំ​អត់​ផ្ទះ​ផង​ហ្នឹង!»​

អ្នកស្រី​បាន​សុំឲ្យ​សាធារណជន​ និង​ប្រព័ន្ធ​ផ្សព្វផ្សាយ​ចុះ​ទៅ​ពិនិត្យ​ទី​កន្លែង​រស់​នៅ​របស់​អ្នក​ភូមិ​ផ្ទាល់​ ដែល​បាន​កាប់​គាស់​ដីធ្លី​ យក​ដីដាំ​ដំណាំ​ និង​សង់​លំនៅដ្ឋាន៖​

«គាត់​យក​កំហឹង​ថា ​ពួក​ខ្ញុំហ្នឹង​រុករាន​ដី​ព្រៃ។ ខ្ញុំ​ទទួល។​ កូន​ចៅ​ក្រ។ ​កូន​អត់​ដី​នៅ​ អត់​ផ្ទះ​សម្បែង​នៅ។ ​រុករាន​មែន! ​ទទួល​ខ្លួន​ខុស! ​ថា ​កូន​ចៅ​បាន​ធ្វើខុស!​ រុករាន​ ព្រោះ​តែ​កូន​ចៅ​អត់​ហ្នឹង​ហើយ​បាន​ជា​កូនចៅ​មក​កាប់​គាស់​នឹង​កម្លាំងញើស​ឈាម​ អត់​មាន​ប្រើ​កម្លាំង​ម៉ាស៊ីន​ទេ។ ​កូន​ចៅ​ប្រើ​ដៃ​សុទ្ធ។ ​បើ​បងប្អូន​មិន​ជឿ​ អ្នក​កាសែត​មិន​ជឿ​ ចុះ​មក​ថត​មក! ​តើ​បង​ប្អូន​ខ្ញុំប្រើ​នឹង​កម្លាំង​ដៃឬ​អត់?»​

លោក​ ម៉ន​ ផល្លា ​ប្រធាន​មន្ទីរបរិស្ថាន​ខេត្ត​កោះកុង​ បានឲ្យ​ដឹង​ថា ​ប្រជា​ពលរដ្ឋ​ទាំង​អស់​នោះ​ ទើប​រំលោភ​ចូល​ដី​នេះ​ក្នុង​ខែ​មិនា​កន្លង​ទៅ ហើយ​លោក​បានការពារ​ផង​ដែរ​នូវការ​អនុញ្ញាត​របស់​រដ្ឋាភិបាល​លើ​គម្រាង​វិនិយោគ​របស់​ក្រុម​ហ៊ុន​ចិន​មួយ​នេះ។​

«គោល​ការណ៍​រដ្ឋាភិបាល​គេ​ត្រូវ​ការ​វិនិយោគ​ដើម្បី​អភិវឌ្ឍសេដ្ឋកិច្ច​ជាតិ។​ អាហ្នឹង​រឿង​របស់​រដ្ឋា​ភិបាល​ទេ​តើ​ បង»។​

VOA ​ពុំអាច​ធ្វើការ​ទំនាក់​ទំនង​ជួប​លោក​ Wang Chao ​ដែល​ជា​នាយក​ផ្នែក​ទំនាក់​ទំនង​របស់​ក្រុមហ៊ុន​ Union Development Group​ បាន​ទេ​ ដោយសារ​ទូរស័ព្ទ​លើតុ​របស់​លោក​រោទិ៍​ តែ​គ្មាន​អ្នក​ទទួល៕

XS
SM
MD
LG