ការិយាល័យទទួលបន្ទុកត្រួតពិនិត្យថវិការបស់សភាហៅកាត់ថា CBO បានធ្វើការសន្និដ្ឋានកាលពីថ្ងៃចន្ទថា ការបិទផ្នែកខ្លះនៃរដ្ឋាភិបាលអាមេរិកដ៏យូរបំផុតមិនដែលធ្លាប់មាន បានធ្វើឲ្យសេដ្ឋកិច្ចប្រទេសខាតអស់៣ពាន់លានដុល្លារ។ CBO បាននិយាយថាការវាយតម្លៃរបស់ខ្លួនអំពីផលប៉ះពាល់នៃការបិទរដ្ឋាភិបាលរយៈពេល៣៥ថ្ងៃទៅលើសេដ្ឋកិច្ចអាមេរិកដែលជាប្រទេសមានសេដ្ឋកិច្ចធំជាងគេក្នុងពិភពលោកបានបង្ហាញថា អាមេរិកបានខាតបង់សេដ្ឋកិច្ចគិតជាទឹកប្រាក់ចំនួន៣ពាន់លានដុល្លារនៅអំឡុងពេលបិទរដ្ឋាភិបាលចាប់តាំងពីថ្ងៃទី២២ខែធ្នូ ឆ្នាំ២០១៨ និងបានខាតបង់ចំនួន៨ពាន់លានដុល្លារនៅអំឡុងពេលបិទនៅក្នុងខែមករា។
ទោះជាយ៉ាងណាក៏ដោយ CBO បានឲ្យដឹងថា បុគ្គលិករដ្ឋាភិបាលសហព័ន្ធចំនួន៨សែននាក់ដែលត្រូវបានបញ្ឈប់ពីការងារឬធ្វើការដោយមិនទាន់បានទទួលប្រាក់ខែនៅក្នុងអំឡុងពេលបិទរដ្ឋាភិបាលនឹងទទួលបានប្រាក់ខែវិញនៅប៉ុន្មានថ្ងៃខាងមុខនេះ ហើយប្រតិបត្តិការនានារបស់រដ្ឋាភិបាលនឹងត្រឡប់មកដំណើរការដូចធម្មតាឡើងវិញ។ CBO បានប៉ាន់ប្រមាណថាការចំណាយរបស់សហព័ន្ធប្រមាណ១៨ពាន់លានដុល្លារដែលត្រូវបានពន្យាពេលនៅអំឡុងបិទរដ្ឋាភិបាលប៉ុន្តែការចំណាយនានាទំនងជានឹងត្រឡប់មកដូចធម្មតាឡើងវិញរហូតលុះត្រាតែមានការបិទម្តងបន្ទាប់ពី៣សប្តាហ៍បន្ទាប់ទៅទៀតនេះ។
ប្រធានាធិបតីអាមេរិកលោក Donald Trump និងមេដឹកនាំសភាខាងគណបក្សប្រជាធិបតេយ្យនិងគណបក្សសាធារណរដ្ឋបានព្រមព្រៀងគ្នាបញ្ចប់ការបិទរដ្ឋាភិបាល និងបង្កើតគណកម្មការដែលចូលរួមទាំងពីរគណបក្ស ដើម្បីចរចាគ្នាអំពីសំណើសន្តិសុខព្រំដែនរវាងអាមេរិក-ម៉ិកស៊ិក៕
