ភ្ជាប់​ទៅ​គេហទំព័រ​ទាក់ទង

រដ្ឋាភិបាល​កម្ពុជា​រងកា​ររិះគន់​ក្នុង​ការ​ទទួល​យក​ជនភៀស​ខ្លួន​អូស្រ្តាលី


ជន​ភៀសខ្លួន​​​ដែល​ស្វះស្វែង​រក​សិទ្ធិ​ជ្រក​កោណ​កំពុង​ត្រូវ​គេ​នាំ​​ពី​យន្តហោះ​ទៅ​កាន់​​រថយន្ត​ក្រុង​នៅ​ក្រោយ​ពួក​គេ​ទើប​មក​ដល់​កោះ​ណូរូ​កាល​ពី​ថ្ងៃ​ទី​១៤ ខែ​កញ្ញា ឆ្នាំ​២០១២។ ប្រទេស​អូស្ត្រាលី​បាន​ផ្តល់ថវិកា​ជា​ច្រើន​ដល់​ប្រទេស​ណូរូ​ចាប់​តាំង​ពី​ឆ្នាំ​២០១២​មក នៅ​ពេល​កោះ​នេះ​បាន​ក្លាយ​ជា​កន្លែង​សំខាន់​សម្រាប់​គោលនយោបាយ​ដ៏​ចម្រូងចម្រាស់​ទាក់ទង​នឹង​ជន​សុំ​សិទ្ធិ​ជ្រក​កោណ។ កោះ​ណូរូ​មាន​​មណ្ឌល​ឃុំ​ខ្លួន​ដែល​អាច​ដាក់​មនុស្ស​បាន​ដល់​១.៥០០​នាក់ សម្រាប់​បុរស​ស្ត្រី​និង​កុមានរ​ពី​​​តំបន់​មជ្ឈិមបូព៌ា​ អាហ្វ្រិក និង​អាស៊ី។​​ (REUTERS/Rod Henshaw)

អ្នក​វិភាគ​ឯករាជ្យ​ និង​សកម្មជន​សិទ្ធិ​មនុស្ស​សម្តែង​ក្តីព្រួយ​បារម្ភ និងសោក​ស្តាយ​ នៅក្រោយ​ពេល​រដ្ឋាភិបាល​កម្ពុជា​សម្រេចទទួល​យក​ជនភៀស​ខ្លួន​៤​រូបពី​កោះណូរូ (Nauru)តាម​កិច្ច​ព្រម​ព្រៀង​ជាមួយ​នឹង​ប្រទេស​អូស្ត្រាលី។​

ពួកគេ​ស្នើ​ឱ្យ​រដ្ឋាភិបាល​ពិចារណា​ម្តងទៀត​ មុននឹងទទួល​យក​ជន​ភៀសខ្លួន​បន្ថែម​ទៀត បន្ទាប់​ពី​ជន​បួន​នាក់​ដែល​រដ្ឋាភិបាល​បាន​សម្រេច​ទទួល​យក​ក្នុង​ពេល​ថ្មីៗ​នេះ។​

លោក បណ្ឌិត​ កែម ឡី អ្នក​ស្រាវ​ជ្រាវ​កិច្ចការ​អភិវឌ្ឍន៍សង្គម​ បាន​មានប្រសាសន៍ថា​៖

«ខ្ញុំ​យល់​ថា​គួរ​ឲ្យសោក​ស្តាយ​មិនគួរ​រដ្ឋាភិបាល​ដើរបញ្ច្រាស​ទិស​ ឬក៏​ចរន្ត​ពលរដ្ឋ​ភាគច្រើន​មិនចង់​ឲ្យ​ទទួល​យក​ ទីមួយ។ ទីពីរ រដ្ឋាភិបាល​មិនគួរ​ដើរ​បញ្ច្រាស​ ស្តង់ដាគោរព​សិទ្ធិ​មនុស្ស ​នៅពេល​ដែល​ Human Rights Watch នៅពេល​ការិយាល័យខាង​សិទ្ធិ​មនុស្ស​កម្ពុជា​អង្គការ​សហប្រជាជាតិ​ បានបដិសេដ​មិន​ទទួល​យក​ ហើយ​មិនសហការ​។ ហើយ​ខ្ញុំគិតថា​ រដ្ឋា​ភិបាល​អាចពិចារណា​ម្តង​ទៀត​ទាន់​មាន​ចំនួន​តិច​ បើសិន​ជាមាន​ចំនួន​កាន់​តែ​ច្រើន​ឡើង​ៗ​ ហើយ​នៅពេល​ដែល​មាន​បញ្ហា​ចាំ​ទទួល​សុំ​ទោស​អា​ហ្នឹង​គឺជ្រុល​ពេល​»។

ចំណែក​ឯ​លោក​ អំ សំអាត​ ប្រធាន​ការិយាល័យ​បច្ចេក​ទេស​នៃអង្គការ​សិទ្ធិ​មនុស្ស​លីកាដូ​ បាន​សម្តែង​ក្តីបារម្ភ​ និង​មិនសាទរ​ចំពោះ​ការ​សម្រេច​របស់​រដ្ឋា​ភិបាល​កម្ពុជា​នោះ​ឡើយ​ ដោយ​សារ​តែ​ប្រទេស​កម្ពុជា​នៅមាន​បញ្ហា​រ៉ាំរ៉ៃ​ជាច្រើន ​ដែល​មិន​ត្រូវបាន​ដោះ​ស្រាយ​ជូនពលរដ្ឋ​របស់​ខ្លួន​នា​ពេលបច្ចុប្បន្ន​នេះ​ ដូចជា​វិបត្តិដី​ធ្លី ​និង​កង្វះ​ការងារ​ធ្វើ​ក្នុង​ស្រុក។

លោក​និយាយ​ថា៖ «យើង​មើល​ទៅ​លើ​បញ្ហា​ដីធ្លី​ ប្រជាពលរដ្ឋ​យើងកំពុង​មានបញ្ហា​ទាក់​ទង​នឹង​ទំនាស់​ដីធ្លី​ ហ្នឹងច្រើនហើយ​មិន​ទាន់​បាន​ដោះ​អ្វី​ស្រួល​បួល​ ហើយ​ទីពីរ​មុខរបរ​នៅក្នុង​កម្ពុជា​យើង​បានន័យ​ថា ​ទីផ្សារ​ការងារ​ក៏នៅ​តែ​ចង្អៀត​ ប្រជាពលរដ្ឋ​យើង​ជាច្រើន​បាន​ចេញ​ទៅ​ធ្វើការ​ក្រៅ​ប្រទេស​ ហើយ​រដ្ឋាភិបាល​ក៏អំពាវនាវ​ទៅ​បរទេស​ ដើម្បី​ទទួល​យក​ប្រជាពលរដ្ឋខ្មែរទៅធ្វើការផង​ទៀត​។ ចុះបើយើង​ទទួល​ពួកគេ​មក? យើង​ត្រូវទទួលរ៉ាប់​រង​បញ្ហា​ដីធ្លី​ បញ្ហា​សង់​លំនៅដ្ឋាន វត្តអារ៉ាម​សាលា​រៀន ​ហើយ​កាន់​ជំនឿ​សាសនាដែលខុសៗ​គ្នា​ទៀត​»​។​

លោក​បន្ថែម​ថា៖ «អញ្ចឹង​តើ​កម្ពុជាយើង​ដល់​ពេល​ដែល​យើង​ត្រូវ​ទទួលពួក​គេអត់? ហើយ​បើសិន​ជា​កូន​ខ្លួន​ឯង​ យើង​មិនទាន់រៀប​ចំឲ្យ​បានល្អ១០០%​ផង​ ហើយ​យើង​ទទួល​កូន​គេមក​ចិញ្ចឹម​ទៀត​តើ​វាប៉ះពាល់​ អី្វ​ដល់​គេ?​»។

រាជរដ្ឋា​ភិបាល​កម្ពុជា​បាន​សម្រេច​ក្នុង​សប្តាហ៍​នេះ​ទទួលជន​ភៀស​ខ្លួន​បួន​នាក់​ មកតាំង​ទីលំនៅ​អចិន្ត្រៃយ៍​នៅប្រទេស​កម្ពុជា។ នេះ​បើតាម​ការ​បញ្ជាក់​របស់​លោក ​ខៀវ សុភ័គ​ អ្នកនាំពាក្យ​ក្រសួង​មហាផ្ទៃ​ ប៉ុន្តែ​លោក​ពុំទាន់​អាច​បញ្ជាក់​បាន​ទេ ​ចំពោះ​ការមក​ដល់​របស់​ជនភៀស​ខ្លួន​ទាំងបួន​រូបនេះ។

ជនភៀសខ្លួន​ទាំងបួនរូប​ ដែលបាន​ទទួល​សិទ្ធិ​ជាជនភៀស​ខ្លួនពី​រដ្ឋាភិបាល​ប្រទេស​អូស្រ្តាលី ​ហើយ​ត្រូវ​មក​កម្ពុជា​ក្នុង​ពេល​ឆាប់ៗ​ខាងមុខ​នោះ​មាន​ម្នាក់​ជា​ជនជាតិ​ រ៉ូហ៊ីងយ៉ាង​ (Rohingya) ​និង​បី​នាក់​ផ្សេង​ទៀត​ជាជន​ជាតិ​អ៊ីរ៉ង់។

លោក​នាយ​ឧត្តម​សេនីយ៍ ​ខៀវ សុភ័គ ​អ្នកនាំពាក្យ​ក្រសួង​មហាផ្ទៃ​បាន​លើកឡើង​ថា​ រដ្ឋាភិបាលនឹងពិនិត្យ ​និង​ពិចារណា​លើ​លទ្ធភាព​នៃ​ការទទួល​យក​ជនភៀស​ខ្លួនបន្ថែមទៀត​ ក្នុងចំនួន​មួយ​មាន​កម្រិត​ដែល​អាច​ឲ្យ​រដ្ឋា​ភិ​បាលរ៉ាប់​រងបាន។​

លោកបន្ថែមថា៖ «ក្នុងចំណោម​រាប់​ពាន់​នាក់​មាន​បួននាក់​ យើង​ឈរ​លើ​គោល​ការណ៍​ស្ម័គ្រ​ចិត្ត​ទេ​ហ្នឹង​ សង្ឃឹម​ថា​ យើង​ក៏មិនល្ងង់​ខ្លៅ​រហូត​ទៅ​ដល់​រាប់​ពាន់​រាប់​ម៉ឺននាក់​មក​នៅស្រុក​យើង​ដែរ​»។

ចំពោះ​ការរិះគន់​ពីអ្នកវិភាគ​ឯករាជ្យ​ និង​សកម្មជន​សិទ្ធិមនុស្ស​ ដែល​ថាកម្ពុជា​ជា​ប្រទេសក្រីក្រទទួល​យកជន​ទាំងបួននាក់​នេះ​ ប៉ុន្តែបែរ​ជាចាប់​បញ្ជូនចេញ​វិញ​នូវ​ ជនជាតិ​វីហ្គ័រ​ភាគ​តិចចិន ​និង​ជនជាតិ​ម៉ុងតាញ៉ា​វៀតណាម​ កាល​ពីពេល​កន្លងមក​ លោកនាយឧត្តមសេនីយ៍​ពន្យល់​ថា៖

«ជាការត្រឹម​ត្រូវហើយ​ ធម្មតា​កិច្ច​ការ​ធ្វើ​អ្វីវាមាន​ដូច​ក្នុង​ឆាក​ល្ខោន​អញ្ចឹង​វា​មាន​ ទាល់តែមាន​អ្នកទិតៀន​អី​បានវាទៅជា​ឆាក​ល្អ​មើល ហើយ​យើង​ទៅ​ធ្វើ​តែ​ឯង​អញ្ចឹង​ ធ្វើតែ​ឯង​ម៉េច​កើត​ ត្រូវ​តែ​មានប្រជាធិបតេយ្យ​ ត្រូវ​តែមាន​អញ្ចឹងហើយ​»។

រដ្ឋាភិបាល​ប្រទេស​កម្ពុជាបាន​ចុះអនុស្សារណៈ​យោគយល់​ជាមួយ​រដ្ឋាភិបាល​ប្រទេស​អូស្រា្តលី​នៅ​ក្នុងឆ្នាំ​២០១៤ ដើម្បី​ទទួល​យកជនភៀស​ខ្លួនជាង​១ពាន់នាក់​ដែលសុំ​សិទ្ធិជ្រកកោន​នៅក្នុង​ប្រទេស​អូស្ត្រាលី ដែលត្រូវ​អាជ្ញាធរ​ប្រទេស​នេះ​ដាក់​ឲ្យរស់​នៅក្នុង​ជំរុំ​នៅលើ​ប្រទេសដែន​កោះ​ណូរូ។

កិច្ចព្រម​ព្រៀងនេះ​គឺត្រូវបាន​ធ្វើឡើង​ជាថ្នូរ​នឹង​អ្វី​ដែលគេ​ពណ៌នា​ថា​ ជាកម្មវិធី​ជំនួយ​ដែលមាន​ទឹក​ប្រាក់ជាង៣០លាន​ដុល្លារ​ពី​ប្រទេសអូស្ត្រាលី​វិញ។ កិច្ចព្រម​ព្រៀង​ទទួល​ និងបញ្ជូន​ជនភៀស​ខ្លួនពី​កោះណូរូ​នេះ​ ទទួល​រង​ការ​រិះគន់​យ៉ាងខ្លាំង​ពី​អង្គការ​សិទ្ធិ​មនុស្ស​ជាតិ​ និង​អន្តរជាតិ​ ដោយ​អះ​អាងថា ​វាបាន​រំលោភ​អនុសញ្ញា​ជនភៀស​ខ្លួនរបស់​អង្គការ​សហ​ប្រជាជាតិ​។ ជាងនេះ​ទៀត​ ពួកគេ និយាយថា​ប្រទេសដ៏ក្រីក្រ​មួយនេះ​ នៅមានបញ្ហា​ប្រឈម​ជាច្រើន​ដូចជា​ អំពើ​ពុករលួយ​ ភាពក្រីក្រ​ ស្ថាប័ន​តុលាការ​នៅមិនទាន់​ឯករាជ្យ​ អំពើ​និទណ្ឌភាព និង​ទំនាស់​ដីធ្លី​ដ៏ច្រើន៕

XS
SM
MD
LG