រដ្ឋាភិបាលកម្ពុជាបានបន្តដាក់ចេញនូវវិធានការបន្ថែមដើម្បីបន្តគ្រប់គ្រងផលប៉ះពាល់លើវិស័យសំខាន់ៗ៣រួមមាន វិស័យវាយនភណ្ឌ វិស័យអាកាសចរណ៍និងវិស័យទេសចរណ៍ នៅជុំទី១០ រយៈពេល៣ខែ ក្នុងការស្តារសេដ្ឋកិច្ចកម្ពុជាក្នុងអំឡុងនិងក្រោយនៃវិបត្តិជំងឺឆ្លងកូវីដ១៩។
ជាមួយនឹងវិធានការស្រោចស្រង់សេដ្ឋកិច្ចបន្ថែមនេះសហជីពមួយចំនួនដែលការពារប្រយោជន៍កម្មករនិងអ្នករកទទួលទាននៅក្នុងវិស័យសេដ្ឋកិច្ចក្រៅប្រព័ន្ធបានអំពាវនាវឲ្យរដ្ឋាភិបាលដំឡើងប្រាក់ឧបត្ថម្ភបន្ថែមទៀត ដើម្បីឆ្លើយតបទៅនឹងតម្លៃទំនិញដែលបានកើនឡើងនៅទីផ្សារ។
បើតាមសេចក្តីប្រកាសព័ត៌មានមួយចេញផ្សាយនៅថ្ងៃទី២៨ ខែតុលា ឆ្នាំ២០២១ស្តីពី«វិធានការបន្ថែមដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចនៅក្នុងបរិការណ៍នៃវិបត្តិ, ការស្តារនិងជំរុញកំណើនសេដ្ឋកិច្ចកម្ពុជាក្នុងអំឡុងនិងក្រោយពីវិបត្តិនៃជំងឺកូវីដ-១៩» រាជរដ្ឋាភិបាលសម្រេចដាក់ចេញនូវវិធានការបន្ថែមសម្រាប់ជុំទី១០។
ក្នុងផែនការជុំទី១០នេះរដ្ឋាភិបាលមានគោលបំណង ទីមួយបន្តកាត់បន្ថយផលប៉ះពាល់នៃវិបត្តិនៃជំងឺកូវីដ-១៩ មលលើស្ថានភាពសង្គម-សេដ្ឋកិច្ចក៏ដូចជាការដាក់ចេញនិងអនុវត្តវិធានការទ្រទ្រង់និងស្តារអាជីវកម្មនិងធុរកិច្ចឲ្យងើបឡើងវិញក្នុងបរិបទនៃការបើកឡើងវិញជាបណ្តើរៗនូវសកម្មភាពសង្គម-សេដ្ឋកិច្ចតាមគន្លងប្រក្រតីភាពថ្មីនិងទីពីរ បន្តសុពលភាពនៃវិធានការដែលបានដាក់ចេញនាពេលកន្លងមក។
បើតាមផែនការជុំទី១០ដដែលនេះកម្មករ-និយោជិតក្នុងវិស័យចំនួន២ រួមមានវិស័យកាត់ដេរ-វាយនភណ្ឌ និងវិស័យទេសចរណ៍ ដែលបំពេញលក្ខណៈវិនិច្ឆ័យនិងលក្ខខណ្ឌនៃការព្យួរកិច្ចសន្យាការងារនឹងទទួលបានប្រាក់ឧបត្ថម្ភចំនួន ៤០ ដុល្លារអាមេរិកដូចៗគ្នាក្នុង១ខែ ពីសំណាក់រដ្ឋាភិបាលកម្ពុជា។ ប៉ុន្តែដោយឡែក ម្ចាស់សហគ្រាស អាជីវកម្មក្នុងវិស័យទេសចរណ៍ក៏ត្រូវរួមចំណែកតាមគោលការណ៍ស្ម័គ្រចិត្តនិងតាមលទ្ធភាពជាក់ស្តែងក្នុងការផ្តល់ប្រាក់ឧបត្ថម្ភបន្ថែមដល់និយោជិតរបស់ខ្លួន។
ចំណែកកម្មករកម្មការិនីបម្រើការក្នុងវិស័យកាត់ដេរនឹងទទួលបានប្រាក់បន្ថែមចំនួន៣០ ដុល្លារអាមេរិកក្នុង១ខែពីនិយោជកដែលជាម្ចាស់រោងចក្រ-សហគ្រាស ក្នុងរយៈពេលបីខែដូចគ្នាបន្តទៅមុខទៀតចាប់ពីខែតុលា ដល់ខែធ្នូ ឆ្នាំ២០២១សម្រាប់ជុំទី៧ សរុបស្មើនឹង៧០ដុល្លារអាមេរិកក្នុង១ខែ។
ពាក់ព័ន្ធនឹងការបង់ពន្ធប្រចាំខែរបស់អាជីវកម្មផ្នែកសេវាកម្មក៏ត្រូវបានបន្តលើកលែងរយៈពេល៣ខែទៀតផងដែរគឺគិតចាប់ពីខែតុលាដល់ខែធ្នូ ចំពោះម្ចាស់សណ្ឋាគារផ្ទះសំណាក់ ភោជនីយដ្ឋានភ្នាក់ងារទេសចរណ៍ទាំងឡាយណាដែលបានចុះបញ្ជីជាមួយអគ្គនាយកដ្ឋានពន្ធដារនិងមានសកម្មភាពអាជីវកម្មក្នុងរាជធានីភ្នំពេញខេត្តសៀមរាប ខេត្តព្រះសីហនុខេត្តកែប ខេត្តកំពត ក្រុងបាវិត និងក្រុងប៉ោយប៉ែត។
សម្រាប់វិធានការបន្តជួយវិស័យអាកាសចរណ៍វិញ រដ្ឋបន្តលើកលែងការបង់ពន្ធអប្បរមា(Minimum Tax) ដល់ក្រុមហ៊ុនអាកាសចរណ៍ដែលបានចុះបញ្ជីនៅកម្ពុជានិងបន្តអនុគ្រោះចំពោះការបង់ប្រាក់ជំពាក់លើកម្រៃអាកាសចរណ៍ស៊ីវិលដោយពន្យាររយៈពេល៣ ខែបន្ថែមទៀត ចាប់ពីខែតុលាដល់ខែធ្នូ ឆ្នាំ២០២១ ។
ប្រធានសហភាពការងារកម្ពុជាលោក អាត់ ធន់យល់ថាចំពោះគោលការណ៍របស់រដ្ឋាភិបាលដែលសម្រេចផ្តល់ប្រាក់ជំនួយសង្គមដល់កម្មករក្នុងរយៈពេល៣ខែបន្តទៀតនេះជាការប្រសើរប៉ុន្តែលោកកត់សម្គាល់ថាហាក់នៅមានកម្រិតតិចតួចនៅឡើយបើប្រៀបធៀបនឹងតម្រូវការចាយវាយរបស់កម្មករដែលលោកសង្កេតឃើញថាការចំណាយរបស់កម្មករបានកើនដល់ចន្លោះពី២៥០ ដុល្លារ ដល់៣០០ដុល្លារអាមេរិកក្នុងមួយខែ។
លោកប្រាប់វីអូអេនៅថ្ងៃសុក្រនេះថា៖ «គាត់ទទួលបានត្រឹម៧០ ដុល្លារ ទៅ៤០ដុល្លារនោះគិតថាជាចំនួនតិចពេកដែលពួកគាត់ពិបាកក្នុងការចាយហើយនិងផ្គត់ផ្គង់ការងារប្រចាំថ្ងៃ។ គាត់អាចដោះស្រាយបានតែអាហារឬក៏ស្នាក់នៅតិចតួចប៉ុណ្ណោះឬក៏មិនគ្រប់ផងអាហារហ្នឹងប៉ុន្តែចំណាយផ្សេងៗរួមទាំងតម្រូវការសង្គមរួមទាំងបំណុលអីផ្សេងៗគឺនៅតែជាឧបសគ្គ»។
លោកក៏បានស្នើឲ្យរដ្ឋាភិបាលដំឡើងប្រាក់ឧបត្ថម្ភដល់កម្មករទាំងអស់ដល់១៩៤ ដុល្លារអាមេរិកនិងស្នើឲ្យពង្រីកវិធានការផ្តល់ប្រាក់ឧបត្ថម្ភដល់អ្នកបម្រើការងារក្នុងវិស័យដែលរងផលប៉ះពាល់នានាក្នុងនោះមានវិស័យអាកាសចរណ៍ វិស័យទេសចរណ៍វិស័យសំណង់ជាដើមគួរទទួលប្រាក់ឧបត្ថម្ភដូចគ្នាដែរ។
លោកបន្ថែមថា៖ «ខ្ញុំយល់ឃើញថាការផ្តល់នេះគួរតែផ្តល់ឲ្យកម្មករទាំងអស់គ្នាទូទាំងប្រទេសហើយគួរតែផ្តល់យ៉ាងហោចណាស់ក៏បានត្រឹម១៩២ ដុល្លារ ហើយ១៩៤[ដុល្លារ]អី តាមប្រាក់ឈ្នួលអប្បរមាថ្មី» ។
លោក វន់ ពៅប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ(IDEA) ថ្លែងថារដ្ឋាភិបាលគួរតែពិចារណាផ្តល់ប្រាក់ឧបត្ថម្ភដើម្បីឆ្លើយតបទៅនឹងការចំណាយដែលមានតុល្យភាពជាមួយតម្លៃទំនិញទីផ្សារយ៉ាងហោចណាស់ឲ្យបានចន្លោះពី១០០ ទៅ១៥០ ដុល្លារក្នុងមួយខែ។ លោកក៏បានស្នើឲ្យរដ្ឋគិតគូរផ្តល់ប្រាក់ឧបត្ថម្ភទៅដល់អ្នកសេដ្ឋកិច្ចក្រៅប្រព័ន្ធផងដែរ។
លោកនិយាយថា៖«អ្នករម៉កអ្នកម៉ូតូឌុប អ្នករត់តាក់ស៊ីអ្នកធ្វើការងារនៅក្នុងសេវាកម្សាន្តអីជាដើមគួរតែជួយដល់វិស័យនឹងផងដែរព្រោះឆ្អឹងខ្នងនៃសេដ្ឋកិច្ចជាតិមិនមែនពឹងតែវិស័យវាយនភណ្ឌទេចំណែកឯប្រជាពលរដ្ឋធ្វើការក្នុងវិស័យផ្សេងៗទៀតក៏ជាឆ្អឹងខ្នងសេដ្ឋកិច្ចដែលប្រសិនបើអ្នកទាំងនោះបាត់បង់ប្រាក់ចំណូលជួបវិបត្តិអន្តរាយទាក់ទងទៅនឹងជីវភាពប្រចាំថ្ងៃនោះរឹតតែធ្វើឲ្យសេដ្ឋកិច្ចយ៉ាប់ថែមទៀត ។ ចឹងរដ្ឋគួរតែពិនិត្យមើលចំណុចហ្នឹងផងដែរក្រៅពីវិស័យផ្សេងៗក្រៅពីកាត់ដេរវាយនភណ្ឌ»។
លោកជំរុញឲ្យអាជ្ញាធរសហការជាមួយអង្គការសង្គមស៊ីវិលក្នុងការធ្វើប័ណ្ណក្រីក្រជូនដល់ប្រជាពលរដ្ឋគ្រប់ៗគ្នាទៅតាមសង្កាត់ ខណ្ឌនានាដើម្បីធានាដល់ការទទួលសាច់ប្រាក់ជំនួយសម្រាប់ពលរដ្ឋងាយរងគ្រោះក្នុងវិបត្តិកូវីដនេះ។
ប្រធាននាយកដ្ឋានសុខុមាលភាពសង្គមនៃអគ្គនាយកដ្ឋានបច្ចេកទេសក្រសួងសង្គមកិច្ចអតីតយុទ្ធជន និងយុវនីតិសម្បទាលោកឈួរ សុបញ្ញា បានប្រាប់វីអូអេនៅថ្ងៃសុក្រនេះថា ការអនុវត្តវិធានការឧបត្ថម្ភសាច់ប្រាក់ជូនដល់កម្មករ-និយោជិត នឹងត្រូវអនុវត្តពីថ្ងៃទី២៥ ខែតុលា ទៅដល់ថ្ងៃទី២៤ ខែមករា ឆ្នាំ២០២២។
លោកបានបន្ថែមថាថា៖ «ចំពោះការបើកលុយឲ្យតែគាត់ធ្វើប័ណ្ណ[ប័ណ្ណក្រីក្រ] ហើយ ប័ណ្ណហ្នឹងនៅខេត្តណាក៏ដោយប័ណ្ណហ្នឹងនៅមណ្ឌលគិរី រតនគិរី ក៏ដោយព្រៃវែងក៏ដោយស្វាយរៀងក៏ដោយគាត់មកបើកកន្លែងណាក៏បានដែរនៅភ្នំពេញក៏បានគាត់មកបើកនៅខេត្តគាត់ក៏បាន។ ចឹងការបើកលុយផ្ទៀងផ្ទាត់ដើម្បីទទួលបានអត្ថប្រយោជន៍ពីរដ្ឋាភិបាលគឺអត់ចាំបាច់ចាំនៅទីតាំងដែលចេញប័ណ្ណទេ»។
បើគិតត្រឹមថ្ងៃទី២៤ ខែតុលា ឆ្នាំ២០២១នេះរដ្ឋបានចំណាយអស់ទឹកប្រាក់ប្រមាណ ៤៧០លានដុល្លារក្នុងការបើកប្រាក់ជូនពលរដ្ឋដែលមានប័ណ្ណក្រីក្រដែលមកទល់ពេលនេះពលរដ្ឋដែលមានប័ណ្ណក្រីក្របានថយចុះមកនៅត្រឹមប្រមាណជាង៦៨ ម៉ឺនគ្រួសារ។ នេះបើតាមលោកឈួរ សុបញ្ញា៕
