រដ្ឋាភិបាលកម្ពុជាបានអនុញ្ញាតឲ្យប្រជាពលរដ្ឋអាចទៅហាត់ប្រាណ និងលេងកីឡាតាមទីធ្លាសាធារណៈ នៅតាមរាជធានីខេត្តនិងនៅក្នុងបរិវេណពហុកីឡាដ្ឋានជាតិអូឡាំពិកក្នុងរាជធានីភ្នំពេញ ខណៈដែលមានការចុះបង្រ្កាបក្លឹបកម្សាន្ត និងកន្លែងខារ៉ាអូខេមួយចំនួន។
ការបើកឲ្យដំណើរការឡើងវិញនូវសកម្មភាពហាត់ប្រាណ និងលេងកីឡាតាមទីធា្លសាធារណៈនៅទូទាំងប្រទេសនេះធ្វើឡើង ខណៈចំនួនអ្នកឆ្លងជំងឺកូវីដ១៩ដែលធ្វើដំណើរចូលប្រទេសកម្ពុជាតាមយន្តហោះនៅបន្តកើនឡើងរហូតដល់២២៦នាក់ គិតត្រឹមថ្ងៃអង្គារនេះ។ រដ្ឋាភិបាលក៏បានសម្រេចផ្អាកការជើងយន្តហោះពីប្រទេសម៉ាឡេស៊ីនិងឥណ្ឌូនេស៊ីផងដែរ។
សេចក្តីប្រកាសរបស់លោក ហង់ ជួន ណារ៉ុន រដ្ឋមន្ត្រីក្រសួងអប់រំ ចុះថ្ងៃទី២៨ ខែកក្កដានេះឲ្យដឹងថា លោកនាយករដ្ឋមន្ត្រី ហ៊ុន សែន បានអនុញ្ញាតឲ្យដំណើរឡើងវិញនូវសកម្មភាពហាត់ប្រាណ និងលេងកីឡាតាមទីធា្លសាធារណៈនៅទូទាំងប្រទេស និងនៅពហុកីឡាដ្ឋានជាតិអូឡាំពិក«លើកលែងតែសកម្មភាពហាត់ប្រាណតាមក្លឹបកីឡា ដែលប្រើប្រាស់សម្ភារៈរួមគ្នា»។
ជាវិធានការទប់ស្កាត់ការឆ្លងជំងឺកូវីដ១៩ ក្រោយការបើកឲ្យមានសកម្មភាពលើកកម្ពស់សុខភាពឡើងវិញនេះ ក្រសួងអប់រំបានស្នើឲ្យទីកន្លែងហាត់ប្រាណ និងលេងកីឡាទាំងអស់ត្រូវបន្ត«រក្សាអនាម័យជាប្រចាំដោយលាងសម្អាតដៃនឹងសាប៊ូ ទឹកអាល់កុលដែលសម្លាប់មេរោគ ពាក់ម៉ាស់និងវាស់កម្តៅរក្សាគម្លាតសុវត្ថិភាពបុគ្គល ដោយរក្សាចម្ងាយពីម្នាក់ទៅម្នាក់យ៉ាងតិច១,៥ម៉ែត្រ។ ទីកន្លែងហាត់ប្រាណ និងកន្លែងលេងកីឡាត្រូវបាញ់ថ្នាំសម្លាប់មេរោគនិងធ្វើអនាម័យជាប្រចាំ»។
កាលពីថ្ងៃទី២១ ខែកក្កដារដ្ឋាភិបាលកម្ពុជាក៏បានអនុញ្ញាតឲ្យគ្រឹះស្ថានសិក្សាឯកជនដែលមានស្តង់ដារខ្ពស់ ចំនួន២០ស្ថិតក្នុងរាជធានីភ្នំពេញ ក្រុងសៀមរាប និងក្រុងបាត់ដំបងដំណើរការឡើងវិញក្នុងអំឡុងខែសីហា។ នេះជាការអនុវត្តសម្រាប់ដំណាក់កាលទីមួយ។
ដោយឡែក រដ្ឋាភិបាលបន្តហាមឃាត់មិនឲ្យសេវាកម្មផ្តល់ការកម្សាន្តមួយចំនួនបានដំណើរការឡើងវិញរួមមានកឹ្លបកម្សាន្តពេលរាត្រី និងហាងខារ៉ាអូខេជាដើម។ ក្លឹបកម្សាន្តពេលរាត្រីនិងហាងខារ៉ាអូខេ ត្រូវរដ្ឋាភិបាលស្នើឲ្យប្រែក្លាយទៅជាភោជនីយដ្ឋានដើម្បីបង្កើតការងារឡើងវិញ។
កម្លាំងនគរបាលជាតិនិងអាជ្ញាធរមានសមត្ថកិច្ចពាក់ព័ន្ធនានាត្រូវគេរាយការណ៍ថា បានចុះទៅពិនិត្យនិងបង្ក្រាបទីតាំងកម្សាន្តមួយចំនួនដែលបានប្រើប្រាស់ស្លាកយីហោជាភោជនីយដ្ឋាន តែផ្តល់សេវាខារ៉ាអូខេក្នុងក្រុងតាខ្មៅ ខេត្តកណ្តាល និងនៅខណ្ឌចំការមន រាជធានីភ្នំពេញ។
លោកនាយឧត្តមសេនីយ៍ឆាយ គឹមខឿន អ្នកនាំពាក្យរបស់អគ្គស្នងការដ្ឋាននគរបាលជាតិ ប្រាប់វីអូអេនៅថ្ងៃអង្គារនេះថា រដ្ឋាភិបាលនៅបន្តដាក់បម្រាមមិនឲ្យក្លឹបកម្សាន្ត និងខារ៉ាអូខេដំណើរការទេ។លោកបន្តថា កម្លាំងនគរបាលនឹងចុះទៅបង្ក្រាបទីតាំងក្លឹបកម្សាន្តនិងខារ៉ាអូខេណា ដែលល្មើសបម្រាមនេះ។
«ខាងកងកម្លាំងខ្ញុំ គ្រាន់តែអនុវត្តច្បាប់ទេ។ បើខុសគេហៅសុំដើម្បីជាកងកម្លាំង ដើម្បីការពារអ្នកអនុវត្តច្បាប់ ប៉ុណ្ណឹង។តែអ្នកដាក់ពិន័យដាក់អី ដាក់អី អ្នកអនុវត្តច្បាប់ ពាក់ព័ន្ធជាមួយភោជនីយដា្ឋន ជាមួយនឹងទេសចរណ៍ ហ្នឹង អាហ្នឹងរឿងរបស់ខាងមន្ទីរទេសចរណ៍ ឬរបស់ក្រសួងទេសចរណ៍ទេតើ»។
អ្នកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា យល់ថា រដ្ឋាភិបាលកំពុងតែខិតខំទប់ស្កាត់មិនឲ្យមានការឆ្លងជំងឺកូវីដ១៩ទៅដល់សហគមន៍។
ទោះយ៉ាងណា អ្នកការពារសិទ្ធិស្ត្រីបម្រើការងារក្នុងវិស័យសេវាកម្សាន្តរូបនេះ កត់សម្គាល់ថាស្ត្រីដែលធ្វើការក្នុងវិស័យសេវាកម្សាន្តរងផលវិបាកខាងហិរញ្ញវត្ថុ ដែលការណ៍នេះអាចធ្វើឲ្យពួកធ្លាក់ចុះក្រោមបន្ទាត់នៃភាពក្រីក្រ។ អ្នកស្រីអះអាងថា ស្ត្រីដែលធ្វើការក្នុងវិស័យសេវាកម្សាន្តមិនត្រូវបានរដ្ឋាភិបាលយកចិត្តទុកដាក់ដូចកម្មករក្នុងវិស័យកាត់ដេរ និងវិស័យទេសចរណ៍ ហើយស្ត្រីទាំងនោះ ក៏ត្រូវបានផាត់ចេញពីកម្មវិធីផ្តល់សាច់ប្រាក់របស់រដ្ឋាភិបាលសម្រាប់គាំទ្រដល់ការរស់នៅរបស់ពលរដ្ឋដែលងាយរងគ្រោះ និងទីទ័លក្រផងដែរ។
«អ៊ីចឹងយើងមើលឃើញថា រាជរដ្ឋាភិបាលបានដើររំលងទៅលើរឿងគោលការណ៍របស់ខ្លួនដែលលើកឡើងថាមិនទុកនរណាម្នាក់ចោល។ អ៊ីចឹងពលរដ្ឋជាច្រើន ត្រូវបានទុកពួកគាត់ចោលនៅពេលដែលស្ថានភាពពិបាកហើយ គ្រោះអាសន្នទៀត ហើយបាត់ចំណូលទៀត។ ហើយអ្នកខ្លះ អាចនឹងប្រឈមការរើសអើងបាត់បង់ការងារ ទៅទៀត។ អ៊ីចឹងធ្វើឲ្យពួកគាត់ហ្នឹងរស់ក្នុងស្ថានភាពមួយលំបាកណាស់លំបាកហើយគឺលំបាកនៅក្នុងស្ថានភាពសេដ្ឋកិច្ចខ្លាំងតែម្តងការហូបចុក ការរស់នៅហ្នឹង។អ៊ីចឹងរាជរដ្ឋាភិបាលហ្នឹងអត់បានក្រឡេកមើលពួកគាត់ថា ជាផ្នែកមួយនៅក្នុងការជំរុញឲ្យមានសេដ្ឋកិច្ចកន្លងមកទេ»។
អ្នកស្រីទេពផល្លីនបន្ថែមថាស្ត្រីដែលធ្វើការក្នុងវិស័យសេវាកម្មកម្សាន្តក៏អាចប្រឈមនឹងការធ្លាក់ចូលក្នុងការជួញដូរក្នុងសម័យទំនើបតាមការប្រថុយប្រថានចំណាកស្រុកទៅក្រៅប្រទេសនៅពេលស្ថានភាពជំងឺកូវីដ១៩បានធូរស្បើយ ដោយសារពួកគេមានបំណុលច្រើនក្នុងពេលបាត់បង់ការងារ និងប្រាក់ចំណូល។ អ្នកស្រីបន្តថា ស្ត្រីគ្មានការងារធ្វើបានងាកទៅរកប្រាក់តាមវិធីផ្សេងៗដូចជា ស៊ីឈ្នួលបោកសម្លៀកបំពាក់តាមផ្ទះបកខ្ទឹម លាងចានតាមហាងគុយទាវ ឬជួយលក់បាយឲ្យគេ ដើម្បីយកមកបង់ថ្លៃផ្ទះជួល និងអាហារហូបចុកប្រចាំថ្ងៃ។
បើតាមសេចក្តីប្រកាសរបស់ទីស្តីគណៈរដ្ឋមន្ត្រីចុះថ្ងៃទី៣ ខែកក្កដា រដ្ឋាភិបាលអនុញ្ញាតឲ្យអាជីវកម្មក្លឹបកម្សាន្ត និងខារ៉ាអូខេនៅរាជធានីភ្នំពេញ និងនៅតាមបណ្តាខេត្តប្រែក្លាយទៅជាភោជនីយដ្ឋាន ដើម្បីចូលរួមសកម្មភាពសេដ្ឋកិច្ច និងផ្តល់ការងារឡើងវិញ។ដើម្បីបានដំណើរការអាជីវកម្មក្នុងនាមជាភោជនីយដ្ឋានម្ចាស់ក្លឹបកម្សាន្ត និងខារ៉ាអូខេត្រូវស្នើសុំលិខិតអនុញ្ញាតអាជីវកម្មពីរដ្ឋបាលរាជធានីខេត្ត និងត្រូវគោរពឲ្យបានម៉ឺងម៉ាត់នូវវិធាននៃក្រសួងសុខាភិបាលក្នុងការទប់ស្កាត់ការរីករាលដាលនៃជំងឺកូវីដ១៩។
រដ្ឋាភិបាលក៏បានអនុញ្ញាតឲ្យបើកដំណើរការឡើងវិញបណ្តាកាស៊ីណូនៅភ្នំពេញ គឺកាស៊ីណូណាហ្គាវើលនិងកាស៊ីណូនៅខេត្តព្រះសីហនុ ក្រុងប៉ោយប៉ែត ខេត្តបន្ទាយមានជ័យ តាមតំបន់ព្រំដែន និងទីតាំងផ្សេងទៀត ដោយឲ្យម្ចាស់កាស៊ីណូត្រូវចុះកិច្ចព្រមព្រៀងឬអនុស្សរណៈជាមួយក្រសួងសុខាភិបាល ឬមន្ទីរសុខាភិបាលលើការអនុវត្តវិធានរបស់ក្រសួងសុខាភិបាល ដើម្បីដាក់បុគ្គលិកឲ្យធ្វើការវិញនិងជាការជួយឲ្យសេដ្ឋកិច្ចងើបឡើងវិញផងដែរ៕
