ភ្ជាប់​ទៅ​គេហទំព័រ​ទាក់ទង

ក្មេង​ស្រី​នានា​តាំង​ពី​ទារក​ឡើង​ត្រូវ​ឪពុក​ម្ដាយ​បង្ខំ​ឲ្យ​រៀបការ


លោក Parvez ឱប​កូន​ស្រី​ឈ្មោះ Sunam អាយុ​៣ឆ្នាំ ដែល​ស្លៀក​ពាក់​ឈុត​កូន​ក្រមុំ​សម្រាប់​ពិធី​ភ្ជាប់​ពាក្យ​ជាមួយ​នឹង​បង​ជីដូន​មួយ​ឈ្មោះ Nieem អាយុ​៧ឆ្នាំ នៅ​ក្នុង​ក្រុង​កាប៊ុល ប្រទេស​អាហ្វហ្គានីស្ថាន កាលពី​ថ្ងៃទី១១ ខែកក្កដា ឆ្នាំ២០១៧។

សូម្បី​តែ​មុន​ពេល​ដែល​លោក​អ្នក​អាន​ប្រយោគ​នេះ​ចប់ គឺ​មាន​ក្មេង​ស្រី​ម្នាក់​នឹង​រៀបការ​ខុស​ច្បាប់​នៅ​កន្លែង​ណា​មួយ​ក្នុង​ពិភពលោក​យើង​នេះ​ហើយ។ នេះ​បើ​យោង​តាម​ការ​ស្រាវជ្រាវ​ថ្មី​មួយ​ដែល​បាន​ផ្សព្វផ្សាយ​កាល​ពី​ពាក់​កណ្ដាល​ខែ​តុលា​កន្លង​ទៅ​នេះ។

មាន​ក្មេង​ស្រី​អាយុ​ក្រោម ១៨ ឆ្នាំ ប្រមាណ ២ ម៉ឺន​នាក់ រៀបការ​ដោយ​ខុស​ច្បាប់​ជា​រៀងរាល់​ថ្ងៃ។

ឧទាហរណ៍​ដូចជា​ករណី​ក្មេង​ស្រី​អាយុ ១២ ឆ្នាំ​ម្នាក់ ត្រូវ​បាន​បងប្អូន​ជីដូន​មួយ​របស់​នាង​ចាប់​រំលោភ និង​ត្រូវ​បាន​មីង​របស់​នាង​បង្ខំ​ឲ្យ​រៀបការ​ជាមួយ​នឹង​បងប្អូន​ជីដូន​មួយ​នោះ។ នេះ​បើ​យោង​តាម​របាយការណ៍​ខាង​លើ។

ការ​សិក្សា​ស្រាវជ្រាវ​នេះ​ត្រូវ​បាន​ចេញ​ផ្សាយ​ចំ​ទិវា​ក្មេង​ស្រី​អន្តរជាតិ​កាលពី​ថ្ងៃ​ទី ១១ ខែ​តុលា​កន្លង​ទៅ​នេះ។ អាពាហ៍ពិពាហ៍​កុមារ​គឺ​ជា​ការ​រំលោភ​សិទ្ធិ​មនុស្ស និង​ជា​ទម្រង់​មួយ​នៃ​អំពើ​ហិង្សា​លើ​ក្មេង​ស្រី។ នេះ​បើ​យោង​តាម​របាយការណ៍​របស់​អង្គការ Save the Children និង​ធនាគារ​ពិភពលោក។ ​

ក្មេងស្រី​អាយុ ១២ ឆ្នាំ​ដែល​រៀបរាប់​ខាង​លើ​បាន​និយាយ​ថា៖ «ខ្ញុំ​យំ​នៅ​ពេល​ពួកគេ​រៀបចំ​ពិធី​មង្គលការ។ មីង​របស់​ខ្ញុំ​បាន​ប្រាប់​ខ្ញុំ​ឲ្យ​ធ្វើ​តាម​អ្វី​ដែល​ប្តី​របស់​ខ្ញុំ​ប្រាប់»។ ប្ដី​របស់​នាង​មាន​អាយុ ២៣ ឆ្នាំ។

«អាពាហ៍ពិពាហ៍​កុមារ​ជា​ការ​អនុវត្ត​បង្ក​ឲ្យ​មាន​គុណវិបត្តិ​មួយ ដែល​ប៉ះពាល់​មិន​ស្មើ​ភាព​គ្នា​ចំពោះ​ក្មេង​ស្រី​រាប់​លាន​នាក់​ជា​រៀងរាល់​ឆ្នាំ។ វា​ប៉ះពាល់​ជា​អវិជ្ជមាន​ដល់​សុខភាព ការ​អប់រំ និង​ឱកាស​នៅ​ក្នុង​ជីវិត​របស់​ក្មេង​ស្រី​ទាំង​នោះ»។

របាយការណ៍​ខាង​លើ​បាន​បញ្ជាក់​ថា ក្មេងស្រី និង​ក្មេង​ប្រុស ដែល​រៀបការ​ក្រោម​អាយុ ១៨ ឆ្នាំ មិន​ទាន់​ត្រៀម​ខ្លួន​រួចរាល់​សម្រាប់​ការ​រៀបការ ការ​រួមភេទ ឬ​ការ​បន្ត​ពូជ​នោះ​ទេ ហើយ​ពួកគេ​កម្រ​បាន​បញ្ចប់​ការ​សិក្សា​ថ្នាក់​អនុវិទ្យាល័យ​ណាស់។ ជា​រឿយៗ អាពាហ៍ពិពាហ៍​កុមារ​ជា​ការ​ចាប់​បង្ខំ និង​កើត​ឡើង​ចំពោះ​កុមារី​វ័យ​ក្មេងៗ និង​បុរស​ចាស់ៗ ដោយ​មិន​មាន​ការ​យល់ព្រម​ពី​សាម៉ី​ខ្លួន។

ប្រទេស​ភាគ​ច្រើន​បាន​កំណត់​យក​អាយុ ១៨ ឆ្នាំ ជា​អាយុ​ទាប​បំផុត​សម្រាប់​ក្មេង​ស្រី​ដែល​អាច​រៀបការ​បាន ប៉ុន្តែ​រដ្ឋាភិបាល​នៅ​តែ​មាន​ឧបសគ្គ​ក្នុង​ការ​អនុវត្ត​ច្បាប់​នេះ ដោយសារ​តែ​វា​មាន​លក្ខណៈ​ខុស​គ្នា​ពី​ច្បាប់​វប្បធម៌ និង​សាសនា។ នៅ​តាម​បណ្ដា​ប្រទេស​ជាច្រើន​ក្នុង​ពិភពលោក ក្មេង​ស្រី​អាច​រៀបការ​ក្រោម​អាយុ ១៨ ឆ្នាំ បាន ប្រសិនបើ​ឪពុក​ម្ដាយ​របស់​ពួក​គេ ឬ​តុលាការ​យល់ព្រម។

អ្នកស្រី Carolyn Miles នាយិកា​អង្គការ Save the Children បាន​និយាយ​ថា នេះ​ជា​កត្តា​ចម្បង​ដែល​ជំរុញ​ឲ្យ​មាន​អាពាហ៍ពិពាហ៍​កុមារ​ខុស​ច្បាប់។

អ្នកស្រី Carolyn Miles បាន​ប្រាប់​កម្មវិធី VOA Student Union ថា កត្តា​មួយ​ទៀត​ដែល​ជំរុញ​ឲ្យ​មាន​អាពាហ៍ពិពាហ៍​កុមារ​កើត​ឡើង គឺ​ផ្នត់​គំនិត​របស់​ឪពុក​ម្ដាយ​ចំពោះ​កូនស្រី​របស់​ពួកគេ។

អ្នកស្រី​បាន​និយាយ​ថា ការណ៍​ដែល​ឪពុក​ម្ដាយ​រៀបការ​កូនស្រី​របស់​ខ្លួន​មុន​ពេល​ដែល​កូន​រី​ខ្លួន​អាច​ត្រៀម​ខ្លួន​រួច​រាល់​សម្រាប់​ការ​រៀបការ គឺ​ដោយសារ​តែ​ស្ត្រី​ត្រូវ​បាន​គេ​ឲ្យ​តម្លៃ​ផ្នែក​សេដ្ឋកិច្ច​ទាប​ជាង​បុរស។ ឪពុកម្តាយ​ជា​ទូទៅ​វិនិយោគ​លើ​ការ​អប់រំ​របស់​កូន​ប្រុស​ជាង​កូន​ស្រី ដោយ​ធ្វើ​ឲ្យ​មាន​ការ​គាប​សង្កត់​លើ​ស្ត្រី​ដដែល​ជា​ដដែល។

នៅ​តំបន់​ខ្លះ​នៃ​ប្រទេស​អេត្យូពី ការ​អនុវត្ត​នូវ​ការ​ច្រឹប​ស្បែក​ប្រដាប់​ភេទ​ក្មេង​ស្រី ឬ​ហៅ​កាត់​ជា​ភាសា​អង់គ្លេស​ថា FGM/C គឺ​ជា​រឿង​សាមញ្ញ​មួយ ដើម្បី​ធ្វើ​ឲ្យ​ក្មេង​ស្រី​មាន​ភាព​គ្រប់គ្រាន់​អាច​រៀបការ​បាន។

«ការ​អនុវត្ត FGM/C ត្រូវ​បាន​គេ​មើល​ឃើញ​ថា ជា​លក្ខខណ្ឌ​តម្រូវ​ឲ្យ​ធ្វើ​មុន​នឹង​អាច​រៀប​អាពាហ៍ពិពាហ៍​បាន ដែល​ការ​អនុវត្ត​នេះ​មិន​ត្រឹម​តែ​ដើម្បី​ការពារ​ព្រហ្មចារីយ៍​នោះ​ទេ ក៏​ប៉ុន្តែ​ដើម្បី​បង្កើន​គុណធម៌​ដែល​អ្នក​អភិរក្ស​និយម​ចាត់ទុក​ថា​មាន​លក្ខណៈ​ជា​មនុស្ស​ស្រី​ពិត​ប្រាកដ ដែល​គេ​និយម​ទូទៅ​ផង​ដែរ។ គុណធម៌​ទាំង​នេះ​គឺ​លក្ខណៈ​សម្បត្តិ​ក្នុង​នាម​ជា​ភរិយា និង​ជា​ម្តាយ»។ នេះ​បើ​យោង​តាម​ការ​បញ្ជាក់​របស់​អង្គការ Girls Not Brides ដែល​ជា​កិច្ច​សហប្រតិបត្តិការ​សាកល​មួយ​របស់​អង្គការ​ជាង​៨០០ មក​ពី​ប្រទេស​ចំនួន​ជាង ៩៥ «ដែល​ប្ដេជ្ញា​បញ្ចប់​អាពាហ៍ពិពាហ៍​កុមារ និង​ជំរុញ​ឲ្យ​ក្មេង​ស្រី​បំពេញ​សក្តានុពល​របស់​ពួកគេ»។

អ្នកស្រី Carolyn Miles បាន​បញ្ជាក់​នៅ​ក្នុង​សេចក្ដី​ជូន​ដំណឹង​មួយ​ថា៖ «យើង​នឹង​មិន​អាច​ឃើញ​ពិភពលោក​មួយ ដែល​ក្មេង​ប្រុស និង​ក្មេង​ស្រី​មាន​ឱកាស​ទទួល​បាន​ជោគជ័យ​នៅ​ក្នុង​ជីវិត​ដូច​គ្នា​នោះ​ទេ ដរាប​ណា​យើង​លុប​បំបាត់​អាពាហ៍ពិពាហ៍​កុមារ​ចោល។ នៅ​ពេល​ក្មេង​ស្រី​រៀបការ​នៅ​អាយុ​ក្មេង​ពេក តួនាទី​របស់​គេ​ក្នុង​នាម​ជា​ភរិយា និង​ជា​ម្តាយ​ម្នាក់​នឹង​ដាក់​បន្ទុក​លើ​រូប​គេ។ នាង​ទំនង​ជា​នឹង​ឈប់​រៀន ហើយ​អាច​នឹង​មាន​ផ្ទៃ​ពោះ និង​រង​ការ​រំលោភ​បំពាន​ផង​ដែរ»។

ប៉ុន្តែ អ្នកស្រី​បាន​បន្ថែម​ថា មិន​ត្រឹម​តែ​ផ្នត់​គំនិត​របស់​ឪពុក​ម្ដាយ​ចំពោះ​កូនស្រី​របស់​ពួកគេ​នោះ​ទេ​ដែល​ត្រូវ​ផ្លាស់ប្តូរ​នោះ ភាព​លម្អៀង​ដែល​ក្មេង​ប្រុស​មាន​ចំពោះ​មិត្តភ័ក្ដិ​ស្រីៗ​របស់​ពួកគេ និង​ចំពោះ​សមាជិក​គ្រួសារ​ត្រូវ​តែ​ផ្លាស់ប្តូរ​ឲ្យ​បាន​ប្រសើរ​ជាង​នេះ​ផង​ដែរ។

បើ​យោង​តាម​ការ​ស្ទង់​មតិ​របស់​អង្គការ Save the Children ២ ភាគ ៣ នៃ​ក្មេង​ប្រុស​ថ្នាក់​ទី៤​នៅ​តាម​តំបន់​ខ្លះ​នៃ​ប្រទេស​សេរ៉ាឡេអូន និង​កូឌីវ័រ បាន​និយាយ​ថា ពួកគេ​ជឿ​ថា ក្មេង​ប្រុស​មាន​ភាព​ឆ្លាតវៃ​ជាង​ក្មេងស្រី។ ក្មេង​ប្រុស​ថ្នាក់​ទី ៤ ជិត ៤០ ភាគរយ នៅ​ក្នុង​សហរដ្ឋ​អាមេរិក​ក៏​យល់​ដូច​គ្នា​នេះ​ដែរ។ឪពុកម្តាយ​របស់​សិស្ស​ថ្នាក់​ទី ៤ នៅ​ក្នុង​សហរដ្ឋ​អាមេរិក​បាន​និយាយ​ថា ឪពុក​គឺ​ជា​មេ​គ្រួសារ។

អ្នកស្រី Carolyn Miles បាន​និយាយ​ថា អាពាហ៍ពិពាហ៍​កុមារ​អាច​កាត់​បន្ថយ​បាន ប្រសិន​បើ​ច្បាប់​ត្រូវ​បាន​គេ​អនុវត្ត និង​រឹតបន្តឹង។ ឪពុក​ម្ដាយ​នានា​គួរតែ​លើក​ទឹកចិត្ត​កូន​ស្រី​របស់​ខ្លួន​ឲ្យ​ទទួល​បាន​ឱកាស​អប់រំ និង​ឱកាស​សេដ្ឋកិច្ច។

ក្មេង​ស្រី​អាយុ ១២ ឆ្នាំ​ដែល​បាន​រៀបរាប់​ខាង​លើ បាន​រត់គេច​ពី​ការ​បង្ខាំង​ធ្វើ​បាប​របស់​ប្ដី និង​មីង​របស់​នាង ដោយ​មាន​ការ​ជួយ​ពី​ពូ​របស់​នាង។ នៅ​ទី​បំផុត នាង​បាន​ទៅ​រស់នៅ​ក្នុង​ផ្ទះ​សុវត្ថិភាព​មួយ​ដែល​ឧបត្ថម្ភ​ដោយ​អង្គការ Save the Children នៅ​ក្នុង​ទីក្រុង​ដាកា ប្រទេស​សេណេហ្គាល់ ដែល​មាន​ទីតាំង​នៅ​តំបន់​ភាគ​ខាង​លិច​នៃ​ទ្វីប​អាហ្វ្រិក។

នា​ពេល​នោះ នាង​មាន​អាយុ ១២ ឆ្នាំ និង​មាន​ផ្ទៃ​ពោះ ៥ ខែ។

ឥឡូវ​នេះ នាង​មាន​កូន​ម្នាក់​ឈ្មោះ Aida។ នាង​បាន​បញ្ចប់​វគ្គ​សិក្សា​ផ្នែក​កាត់​ដេរ ដោយ​មាន​ជំនួយ​ពី​អង្គការ Save the Children នេះ។

ការ​លុប​បំបាត់​អាពាហ៍ពិពាហ៍​កុមារ​ឲ្យ​បាន​ត្រឹម​ឆ្នាំ ២០៣០ គឺ​ជា​គោលដៅ​មួយ​ក្នុង​ចំណោម​គោលដៅ​ទាំង​អស់​នៃ​ការ​អភិវឌ្ឍ​ប្រកប​ដោយ​ចិរភាព​របស់​អង្គការ​សហប្រជាជាតិ៕

ប្រែ​សម្រួល​ដោយ ប៊ុន ប៉េងហ៊ុយ

XS
SM
MD
LG