រដ្ឋាភិបាលប្រទេសអាល្លឺម៉ង់លើកឡើងថា ខ្លួនជឿជាក់ថាមេដឹកនាំប្រឆាំងរុស្សីលោក Alexei Navalny អាចជាគោលដៅនៃការវាយប្រហារដោយថ្នាំបំពុល។
ថ្លែងប្រាប់អ្នកសារព័ត៌មានក្នុងសន្និសីទសារព័ត៌មានមួយកាលពីថ្ងៃចន្ទ លោក Steffen Seibert អ្នកនាំពាក្យរបស់លោកស្រី Angela Merkel អធិការបតីអាល្លឺម៉ង់លើកឡើងថា វាមាន«លទ្ធភាពច្រើន» ដែលថាអ្នកនយោបាយប្រឆាំងក្នុងប្រទេសរុស្សីលោក Alexei Navalny ត្រូវបានគេដាក់ថ្នាំបំពុលនោះ និងថាហេតុដូច្នេះហើយ ទើបការពារលោក Navalny ជារឿងដ៏ចាំបាច់មួយ។
លោក Navalny ដែលធ្វើដំណើរតាមជើងយន្តហោះពីតំបន់ស៊ីបេរី ទៅកាន់ទីក្រុងមូស្គូកាលពីថ្ងៃព្រហស្បតិ៍សបា្តហ៍មុន បានធ្លាក់ខ្លួនឈឺ និងបង្ខំឲ្យយន្តហោះដែលគាត់កំពុងជិះនោះ ត្រូវចុះចតជាបន្ទាន់មួយក្នុងទីក្រុង Omsk នៃតំបន់ស៊ីបេរី។ ជំនួយការរបស់លោក Navalny និយាយថា លោក Navalny បានពិសាតែខ្មៅនៅហាងកាហ្វេមួយក្នុងព្រលានយន្តហោះ។
អ្នកគាំទ្រលោក Navalny ជឿជាក់ថា គឺតែខ្មៅនោះហើយដែលត្រូវបានគេដាក់ជាតិពុលនៅក្នុងនោះ។ លោក Navalny ជាអ្នករិះគន់ដ៏សកម្មម្នាក់ទៅលើប្រធានាធិបតីរុស្សីលោក Vladimir Putin។
ភរិយាលោក Navalny គឺលោកស្រី Yulia Navalnaya និងជំនួយការម្នាក់ បានមកមើលលោក Navalny នៅក្នុងមន្ទីរពេទ្យ Charite ក្នុងទីក្រុងប៊ែរឡាំងនៃប្រទេសអាល្លឺម៉ង់ កាលពីថ្ងៃអាទិត្យ។ លោក Navalny កំពុងស្ថិតក្នុងស្ថានភាពសន្លប់មិនដឹងខ្លួន និងដកដង្ហើមតាមប្រព័ន្ធឧបករណ៍ជំនួយដង្ហើម។
មុនការសម្រេចចិត្តកាលពីថ្ងៃសុក្ររបស់រដ្ឋាភិបាលក្រុងមូស្គូឲ្យបញ្ជូនលោក Navalny មកព្យាបាលក្នុងទីក្រុងប៊ែរឡាំងប្រទេសអាល្លឺម៉ង់ អ្នកនាំពាក្យវិមានក្រឹមឡាំងរបស់រុស្សីលោក Dmitry Peskov លើកឡើងថា រដ្ឋាភិបាលរុស្ស៊ី នឹងជួយជ្រោមជ្រែងក្នុងការបញ្ជូនលោក Navalny មកព្យាបាលក្នុងប្រទេសអាល្លឺម៉ង់ និងជូនពរលោកឲ្យឆាប់ជាសះស្បើយ។
អ្នកនាំពាក្យរូបនេះក៏បាននិយាយផងដែរថា រដ្ឋាភិបាលរុស្សីនឹងស៊ើបអង្កេតរឿងនេះ ប្រសិនបើមានរបាយការណ៍ពីខាងជំនាញជាតិពុលថា លោក Navalny ពិតជាត្រូវបានគេបំពុលមែននោះ៕
