លោក Alexei Navalny ដែលជាមេដឹកនាំគណបក្សប្រឆាំងដ៏ល្បីឈ្មោះបំផុតនៅក្នុងប្រទេសរុស្ស៊ី និងអ្នកគាំទ្ររបស់លោករាប់រយនាក់ទៀត ត្រូវបានចាប់ឃុំខ្លួនកាលពីថ្ងៃសៅរ៍ម្សិលមិញ នៅចំពេលដែលមានការតវ៉ាធ្វើឡើងនៅក្នុងទីក្រុងមូស្គូ និងទីក្រុងចំនួន ៩០ ផ្សេងទៀតនៅក្នុងប្រទេសរុស្ស៊ី ដើម្បីតវ៉ាប្រឆាំងនឹងពិធីស្បថចូលកាន់តំណែងជាប្រធានាធិបតីរបស់លោក Vladimir Putin សម្រាប់អាណត្តិទី ៤ ជាប្រធានាធិបតីរបស់លោក។
ក្នុងរយៈពេលតែប៉ុន្មាននាទីប៉ុណ្ណោះបន្ទាប់ពីលោក Navalny បានធ្វើដំណើរមកដល់កន្លែងតវ៉ានៅកណ្ដាលទីក្រុងមូស្គូ លោក និងគូកនរបស់លោកម្នាក់ទៀតឈ្មោះ Nikolai Lyaskin ត្រូវគេចាប់ខ្លួន។
អង្គការឯករាជ្យ OVD-Info បានប៉ាន់ប្រមាណថា មនុស្សប្រហែល ១ ពាន់ ៣ រយនាក់ ត្រូវបានប៉ូលិសឃុំខ្លួននៅទូទាំងប្រទេស ដោយប៉ូលិសអះអាងថា ការតវ៉ាទាំងនេះគឺជាការតវ៉ា «មិនមានការអនុញ្ញាត» នោះទេ។ អង្គការនេះបានបញ្ជាក់ថា អ្នកតវ៉ាប្រហែលពាក់កណ្ដាលនៃចំនួនខាងលើនេះគឺត្រូវបានប៉ូលិសចាប់ខ្លួននៅក្នុងទីក្រុងមូស្គូ។
សកម្មជនប្រឆាំងអ្នកស្រី Svetlana Safronova ដែលបានចូលរួមនៅក្នុងការតវ៉ាក្នុងទីក្រុងមូស្គូ បានទទូចថា នៅក្រោមការដឹកនាំរបស់លោក Putin ប្រទេសរុស្ស៊ីបានក្លាយជាប្រទេសផ្ដាច់ការ។ អ្នកស្រីបញ្ជាក់ថា៖ «អ្វីល្អៗដែលចែងនៅក្នុងច្បាប់ ពួកគេមិនយកចិត្តទុកដាក់នោះទេ ហើយថែមទាំងធ្វើខុសច្បាប់ទាំងនោះទៀតផង។ ពួកគេគឺជាឧក្រិដ្ឋជន»។
ប៉ុន្តែ ក្នុងនោះក៏មានចលនាយុវជនជាតិនិយមមួយក្រុមបានរៀបចំបាតុកម្មប្រឆាំងតបនឹងការតវ៉ានេះវិញនៅក្នុងទីក្រុងមូស្គូ ដោយក្រុមនេះបានព្យាយាមរារាំងអ្នកគាំទ្ររបស់លោក Navalny មិនឲ្យចូលទៅកាន់ទីលាន Pushkinskaya។
លោក Maksim Slavin អ្នកនាំពាក្យនៃចលនាសេរីភាពជាតិ ដែលជាចលនាគាំទ្រផ្កាប់មុខចំពោះលោក Putin បាននិយាយថា សមាជិកចលនានេះបានធ្វើការតវ៉ាតបតវិញគឺដើម្បីបង្ហាញឲ្យឃើញថា អ្នកគាំទ្រលោក Putin គឺជាអ្នកតំណាងឲ្យសំឡេងពិតប្រាកដរបស់ប្រជាពលរដ្ឋ៕
