ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​បោះឆ្នោត​នៅ​រដ្ឋ Georgia នៅ​ថ្ងៃ​អង្គារ​នេះ នឹង​សម្រេច​ថា​តើ​គណបក្ស​ណា​នឹង​គ្រប់គ្រង​ព្រឹទ្ធសភា


ពលរដ្ឋ​ម្នាក់​ទៅ​បោះឆ្នោ​ត​មុន​កំណត់​នៅ​រដ្ឋ Georgia ដើម្បីជ្រើសរើស​សមាជិក​ព្រឹទ្ធសភា​តំណាង​រដ្ឋ​នេះ ទីក្រុង Atlanta រដ្ឋ Georgia ថ្ងៃទី១៤ ខែធ្នូ ឆ្នាំ២០២០។

ប្រធានាធិបតី​ជាប់​ឆ្នោត​ថ្មី​របស់​សហរដ្ឋ​អាមេរិក​លោក Joe Biden និង​ប្រធានាធិបតី​ជិត​ផុត​អាណត្តិ​លោក Donald Trump បាន​ជួបជុំ​ដាច់​ដោយ​ឡែក​ពី​គ្នា​ជាមួយ​នឹង​ក្រុម​អ្នក​គាំទ្រ​របស់​ពួកគេ​កាល​ពី​ថ្ងៃ​ច័ន្ទ នៅ​ក្នុង​រដ្ឋ Georgia ដែល​ជា​រដ្ឋ​មួយ​ដែល​រៀបចំ​ការ​បោះឆ្នោត​ផ្ដាច់ព្រ័ត្រ​នៅ​ថ្ងៃ​អង្គារ​នេះ​ដើម្បី​ជ្រើសរើស​សមាជិក​ព្រឹទ្ធសភា ២ រូប​តំណាង​ឲ្យ​រដ្ឋ​នេះ។ ការ​បោះឆ្នោត​នេះ​នឹង​សម្រេច​ថា​តើ​គណបក្ស​សាធារណរដ្ឋ ឬ​ក៏​គណបក្ស​ប្រជាធិបតេយ្យ​នឹង​ដឹកនាំ​ព្រឹទ្ធសភា​សហរដ្ឋ​អាមេរិក។

លទ្ធផល​នៃ​ការ​ប្រកួត​ដណ្ដើម​ការ​គ្រប់គ្រង​ព្រឹទ្ធសភា​នេះ នឹង​មាន​ឥទ្ធិពល​ខ្លាំង​ចំពោះ​ការ​អនុម័ត​ច្បាប់​នានា​សម្រាប់​រយៈពេល ២ ឆ្នាំ​ដំបូង​នៃ​អាណត្តិ​រយៈពេល ៤ ឆ្នាំ របស់​លោក Biden ក្នុង​នាម​ជា​ប្រធានាធិបតី។

លោក Biden បាន​ថ្លែង​ទៅ​កាន់​ក្រុម​អ្នក​គាំទ្រ​កាលពី​រសៀល​ថ្ងៃ​ច័ន្ទ​ថា អ្នក​បោះឆ្នោត​នៅ​ក្នុង​រដ្ឋ Georgia នឹង «ត្រៀម​សម្រេច​គោលដៅ មិន​មែន​សម្រាប់​តែ ៤ ឆ្នាំ​ខាង​មុខ​ប៉ុណ្ណោះ​ទេ ប៉ុន្តែ​គឺ​សម្រាប់​មនុស្ស​ជំនាន់​ក្រោយ​ផងដែរ»។

ចំណែក​ឯ​លោក Trump វិញ បាន​ជួបជុំ​ក្រុម​អ្នក​គាំទ្រ​កាល​ពី​ល្ងាច​ថ្ងៃ​ច័ន្ទ នៅ​ក្នុង​ទីក្រុង Dalton ដែល​ជា​មូលដ្ឋាន​គាំទ្រ​គណបក្ស​សាធារណរដ្ឋ​ខ្លាំងក្លា​នៅ​ភាគ​ខាង​ជើង​នៃ​រដ្ឋ Georgia។ លោក​បាន​បន្ត​ការ​រិះគន់​ប្រឆាំង​នឹង​មន្ត្រី​បោះឆ្នោត​នៅ​ក្នុង​រដ្ឋ Georgia ដែល​បដិសេធ​មិន​ព្រម​ស្វែងរក​សន្លឹក​ឆ្នោត​ឲ្យ​បាន​គ្រប់គ្រាន់​ឲ្យ​លោក ដើម្បី​អាច​ប្រែ​ក្រឡាស់​លទ្ធផល​បោះឆ្នោត​នៅ​ក្នុង​រដ្ឋ​នោះ​បាន ដែល​កន្លង​មក លទ្ធផល​ដែល​បាន​ប្រកាស​ជា​ផ្លូវការ​បាន​បង្ហាញ​ថា លោក Joe Biden ជា​អ្នក​ឈ្នះ។

លោក Trump បាន​និយាយ​ថា៖ «គ្មាន​ផ្លូវ​ដែល​យើង​ចាញ់​នៅ​ក្នុង​រដ្ឋ Georgia ឡើយ។ ...ខ្ញុំ​មាន​ការ​បោះ​ឆ្នោត​ពីរ​លើក​កន្លង​មក [នៅ​ក្នុង​រដ្ឋ​នេះ]។ ខ្ញុំ​បាន​ឈ្នះ​ទំាង​ពីរ​លើក»។

ជាថ្មី​ម្ដង​ទៀត លោក Trump បាន​ថ្លែង​ដោយ​គ្មាន​មូលដ្ឋាន​ថា ការ​បោះឆ្នោត​ប្រធានាធិបតី​កន្លង​មក​មាន​ការ «លួច​បន្លំ»។ លោក​បាន​ជំរុញ​អ្នក​គំាទ្រ​គណបក្ស​សាធារណរដ្ឋ​ឲ្យ​ចេញ​ទៅ​បោះឆ្នោត​ឲ្យ​បេក្ខជន​សមាជិក​ព្រឹទ្ធសភា​ខាង​គណបក្ស​សាធារណរដ្ឋ ២ រូប ឲ្យ​បាន​ច្រើន​កុះករ​សម្រាប់​ការ​បោះឆ្នោត​នៅ​ថ្ងៃ​អង្គារ​នេះ។

លោក Trump បាន​និយាយ​ថា៖ «គណបក្ស​ប្រជាធិបតេយ្យ​កំពុង​ព្យាយាម​ប្លន់​យក​សេតវិមាន។ អ្នក​មិន​ត្រូវ​អនុញ្ញាត​ឲ្យ​ពួកគេ​ធ្វើ​ដូច្នេះ​ទេ។ អ្នក​រឹតតែ​មិន​អាច​ឲ្យ​ពួកគេ​ប្លន់​យក​ព្រឹទ្ធសភា​សហរដ្ឋ​អាមេរិក​ទៅ​ទៀត។ អ្នក​មិន​ត្រូវ​ឲ្យ​រឿង​នេះ​កើត​ឡើង​នោះ​ឡើយ។

ការ​បោះឆ្នោត​នៅ​ថ្ងៃ​អង្គារ​នេះ គឺ​ជា​ការ​បោះឆ្នោត​ផ្ដាច់ព្រ័ត្រ​ជ្រើសរើស​សមាជិក​ព្រឹទ្ធសភា ២ រូប​តំណាង​រដ្ឋ Georgia។ នៅ​ក្នុង​ការ​ប្រកួត​លើក​នេះ លោក Jon Ossoff និង​លោក Raphael Warnock ខាង​គណបក្ស​ប្រជាធិបតេយ្យ នឹង​ប្រជែង​ជាមួយ​នឹង​លោក David Perdue និង​អ្នកស្រី Kelly Loeffler ដែល​ជា​សមាជិក​ព្រឹទ្ធសភា​កំពុង​កាន់​តំណែង​ខាង​គណបក្ស​សាធារណរដ្ឋ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG