កាលពីថ្ងៃអាទិត្យ មន្ត្រីក្នុងរដ្ឋGeorgia បានច្រានចោលការអះអាងរបស់លោកប្រធានាធិបតី Donald Trump ខាងគណបក្សសាធារណរដ្ឋដែលថាលោក Joe Biden ដែលជាគូប្រជែងរបស់លោកខាងគណបក្សប្រជាធិបតេយ្យបានឈ្នះការបោះឆ្នោតនៅក្នុងរដ្ឋ Georgia ដោយសារការលួចបន្លំ។
លោក Brad Raffensperger មន្ត្រីកំពូលទទួលបន្ទុកកិច្ចការបោះឆ្នោតនៅក្នុងរដ្ឋ Georgia បានបញ្ជាក់ក្នុងកម្មវិធី «This Week» របស់ទូរទស្សន៍ ABC News ថា ក្នុងនាមជាសមាជិកគណបក្សសាធារណរដ្ឋអភិរក្សនិយមម្នាក់ លោកខកចិត្តដែលលោក Trump បានចាញ់ឆ្នោតនៅរដ្ឋ Georgia ក៏ប៉ុន្តែប្រជាពលរដ្ឋបានសម្តែងមតិនៅក្នុងការបោះឆ្នោតនេះហើយ «យើងមិនឃើញមានអ្វីដែលនឹងកែប្រែឆន្ទៈរបស់ប្រជាពលរដ្ឋបានទេ»។
កាលពីថ្ងៃសៅរ៍ លោក Trump បានទូរស័ព្ទទៅរកអភិបាលរដ្ឋ Georgia លោក Brian Kemp ដោយបានជំរុញឲ្យលោក Kemp កោះប្រជុំសភារបស់រដ្ឋ Georgia ដើម្បីឲ្យសមាជិកសភាប្រើអំណាចច្រានចោលលទ្ធផលបោះឆ្នោត និងតែងតាំងអង្គបោះឆ្នោតដែលអាចគាំទ្រលោក។ នេះបើយោងតាមសេចក្ដីរាយការណ៍របស់កាសែត The Washington Post។
ប៉ុន្តែ លោក Kemp បានបដិសេធសំណើរបស់លោក Trump៕
