បណ្ដាមេដឹកនាំនៃក្រុមប្រទេស G-7 បានបញ្ចប់កិច្ចប្រជុំកំពូលរបស់ខ្លួននៅរមណីយដ្ឋាន Carbis Bay ប្រទេសអង់គ្លេស កាលពីថ្ងៃអាទិត្យ ដោយបានសន្យាផ្តល់វ៉ាក់សាំងកូវីដ១៩ ជាង ១ ពាន់លានដូសដល់បណ្តាប្រទេសក្រីក្រ និងបានរិះគន់ប្រទេសចិនអំពីបញ្ហាមួយចំនួន។
នាយករដ្ឋមន្ត្រីចក្រភពអង់គ្លេសលោក Boris Johnson បានប្រាប់អ្នកយកព័ត៌មានថា វ៉ាក់សាំងទាំងនោះនឹងត្រូវចែកចាយតាមវិធីដោយផ្ទាល់ផងនិងតាមរយៈគម្រោង COVAX ផង។ គម្រោង COVAX គឺជាកម្មវិធីដែលគាំទ្រដោយអង្គការសហប្រជាជាតិដែលផ្គត់ផ្គង់វ៉ាក់សាំងកូវីដ១៩ ដល់បណ្តាប្រទេសដែលមានប្រាក់ចំណូលទាបនិងមធ្យម។
សេចក្តីថ្លែងការណ៍រួមដែលបានចេញផ្សាយនៅពេលបញ្ចប់កិច្ចប្រជុំកំពូលរបស់ក្រុមប្រទេស G-7 បានបញ្ជាក់ថា បណ្ដាមេដឹកនាំក្រុមប្រទេស G-7 «នឹងលើកកម្ពស់គុណតម្លៃរបស់យើង ដែលក្នុងនោះរួមមានទាំងការអំពាវនាវដល់ប្រទេសចិនឲ្យគោរពសិទ្ធិមនុស្សនិងសេរីភាពជាមូលដ្ឋាននានា ជាពិសេសទាក់ទិននឹងតំបន់ Xinjiang ហើយនឹងសិទ្ធិ សេរីភាព និងស្វ័យភាពកម្រិតខ្ពស់សម្រាប់ទីក្រុងហុងកុងដែលមានចែងនៅក្នុងសេចក្តីប្រកាសរួមរវាងប្រទេសចិននិងចក្រភពអង់គ្លេសផងដែរ»។ សេចក្ដីប្រកាសរួមរវាងចិននិងចក្រភពអង់គ្លេសនេះចង់សំដៅលើកិច្ចព្រមព្រៀងឆ្នាំ ១៩៩៧ ដែលអង់គ្លេសបានប្រគល់ទីក្រុងហុងកុងឲ្យចិនជាអ្នកគ្រប់គ្រងវិញ។
រដ្ឋាភិបាលក្រុងប៉េកាំងបានរងការចោទប្រកាន់ថាបានប្រព្រឹត្តិការរំលោភសិទ្ធិមនុស្សធ្ងន់ធ្ងរលើជាតិសាសន៍ភាគតិចអ៊ុយហ្គ័រ (Uyghur) នៅតំបន់ Xinjiang និងការរំលោភបំពានផ្សេងៗទៀតនៅក្នុងទីក្រុងហុងកុង។
បណ្ដាមេដឹកនាំនៃក្រុមប្រទេស G-7 ក៏បានអំពាវនាវឲ្យមានការស៊ើបអង្កេតបន្ថែមផងដែរលើប្រភពនៃ ជំងឺកូវីដ១៩ ដោយបានបញ្ជាក់ដូច្នេះថា៖ «យើងក៏អំពាវនាវផងដែរឲ្យមានការសិក្សាស្រាវជ្រាវដំណាក់កាលទី ២ ដែលដឹកនាំដោយអង្គការសុខភាពពិភពលោក (WHO) ដើម្បីរកប្រភពជំងឺកូវីដ១៩ ឲ្យបានទាន់ពេលវេលា មានតម្លាភាព ដឹកនាំដោយអ្នកជំនាញ និងផ្អែកលើវិទ្យាសាស្ត្រ»៕
