មានធាតុអាកាសត្រជាក់ខ្លាំងនៅក្នុងផ្នែកកណ្តាលនិងប៉ែកខាងកើតស.រ.អា.ហើយអាកាសធាតុបែបនេះនឹងមានច្រើនថ្ងៃតទៅទៀតក្នុងឆ្នាំថ្មីខាងមុខនេះ។
ពួកអ្នកព្យាករណ៍អាកាសបានព្រមានប្រជារាស្ត្រឱ្យមានការប្រុងប្រយ័ត្នអំពីការចុះថយកម្តៅក្នុងរាងកាយនិងអំពីរបួសដោយសារត្រជាក់ខ្លាំងពេកពីព្រោះសីតុណ្ហភាពធ្លាក់ចុះដល់ក្រោមសូន្យអង្សាសេ។ សេវាកម្មជាតិខាងអាកាសធាតុNational Weather Service រាយការណ៍ថា នៅ International Falls ក្នុងរដ្ឋ Minnesota ធាតុអាកាសបានចុះដល់៣៧អង្សាក្រោមសូន្យ ដោយត្រជាក់ជាងកាលពីឆ្នាំ១៩២៤ដែលមានត្រឹមតែ៣២អង្សាក្រោមសូន្យ។
កាលពីថ្ងៃព្រហស្បតិ៍ ពលរដ្ឋក្នុងក្រុង Erie រដ្ឋ Pennsylvania បានបន្តកកាយទឹកកកផុសកម្រាស់១ម៉ែត្រកន្លះដែលបានធ្លាក់នៅទីនោះកាលពីដើមសប្តាហ៍នេះ។ពួកអ្នកព្យាករណ៍អាកាសបានទស្សន៍ទាយថា នឹងមានទឹកកកផុស២៥ស.ម. នឹងធ្លាក់មកទៀតក្នុងពេលឆាប់ៗនេះ។
ពួកអ្នកសង្កេតការខាងធាតុអាកាសនៅឯ Mount Washington Observatory ក្នុងរដ្ឋ New Hampshire បាននិយាយថាសីតុណ្ហភាពនៅទីនោះបានចុះថយដល់កម្រិតទាបបំផុតមិនធ្លាប់មានពីពេលមុន គឺ៣៧អង្សាក្រោមសូន្យ។ ពួកគេបានផ្សព្វផ្សាយវីដេអូមួយតាម Facebook ដែលបង្ហាញឱ្យឃើញអ្នកសង្កតធាតុអាកាសម្នាក់បានចាក់ទឹកពុះមួយធុងទៅក្នុងអាកាសដែលនៅទីនោះទឹកនេះបានក្លាយជាទឹកកកផុសភ្លាមៗនៅពេលមានខ្យល់ត្រជាក់បោកបក់ខ្លាំង។
ពួកសកម្មជននៅទូទាំងតំបន់នោះបានប្រញ៉ាប់ប្រញ៉ាល់ប្រមូលពួកជនអនាថាគ្មានផ្ទះសំបែងចេញពីផ្លូវនិងជួយសង្គ្រោះពួកអ្នកដំណើរដែលជាប់គាំងតាមផ្លូវ៕
