ក្រុមអាជីវករលក់ខោអាវរងារអះអាងថា អាជីវកម្មរបស់ពួកគេមានកើនឡើងខុសធម្មតាក្នុងសប្តាហ៍នេះ ខណៈដែលអាកាសធាតុប្រែជាត្រជាក់ខុសពីឆ្នាំមុនៗដល់ក្រោម២០អង្សារ ក៏ប៉ុន្តែអ្នកជំនាញអះអាងថា សីតុណ្ហភាពនឹងកើនឡើងវិញ ហើយភ្លៀងនឹងចាប់ផ្តើមធ្លាក់នៅសប្តាហ៍ក្រោយ ក្រោមឥទ្ធិពលព្យុះទី២៧ ឈ្មោះ តាំប៊ីន (Tembin) ។
នៅពេលកំពុងរវល់លក់ខោអាវ អ្នកស្រី ហួត គឹមហឿន អាយុ៥៥ឆ្នាំ អ្នកលក់ខោអាវចម្រុះគ្រប់ប្រភេទម្នាក់ នៅផ្សារធំថ្មី បាននិយាយថា ឆ្នាំនេះគាត់លក់ខោអាវរងារដាច់ជាងរាល់ឆ្នាំ នៅពេលអាកាសធាតុចាប់ផ្តើមត្រជាក់។
«ឆ្នាំនេះត្រជាក់ខ្លាំង ត្រជាក់ជាងរាល់ឆ្នាំ ហើយអាវរងារលក់ដាច់ជាងរាល់ឆ្នាំ»។
កំពុងវក់វីលក់អាវរងារបណ្តើរ និងបម្រើអតិថិជនរបស់ខ្លួនបណ្តើរ លោក ឯម ដែន វ័យ៣៤ឆ្នាំ បានប្រាប់ VOA ថា ឆ្នាំនេះត្រជាក់ចម្លែកខុសធម្មតា ហើយមានប្រជាពលរដ្ឋបានសំរុកមកទិញខោអាវការពារភាពត្រជាក់នេះពីគ្រប់ទិសទី។
លោកបានរ៉ាយរ៉ាប់ប្រាប់ VOA ទាំងសប្បាយចិត្តថា៖
«ឆ្នាំនេះវាប្លែក! ប្លែកយ៉ាងម៉េច? វាត្រជាក់ខុសប្លែកពីឆ្នាំទៅ! ឆ្នាំទៅវាត្រជាក់ល្មមៗទេ! បើឆ្នាំទៅយើងអាចពាក់អាចសាមញ្ញធម្មតាហ្នឹង។ មានអីត្រជាក់ដល់ថ្នាក់ហ្នឹង? សូម្បីតែនៅផ្សារថ្មីក៏ប្លែកដែរ ឆ្នាំហ្នឹង។ មនុស្សច្រើន គេមកទិញខោអាវរងារ មកពីគ្រប់ទិសទី»។
តូបលក់ខោអាវនៅទីធ្លាខាងមុខនៃផ្សារធំថ្មី នៅរសៀលថ្ងៃពុធ និងពេញមួយសប្តាហ៍នេះ ពោរពេញដោយភាពមមាញឹកដូចថ្ងៃចុងសប្តាហ៍ ដោយមានប្រជាពលរដ្ឋកម្ពុជាគ្រប់ស្រទាប់វណ្ណៈ ជាច្រើនកំពុងឈររើស និងទិញខោអាវរងារដើម្បីការពារភាពត្រជាក់ជាមួយនឹងសីតុណ្ហភាពស្ថិតនៅត្រឹមប្រហែល២០អង្សារ។
អ្នកស្រី ឈិម ច្រិប ដែលរស់នៅក្នុងទីក្រុងភ្នំពេញ កំពុងរើសអាវក្រៅការពារភាពត្រជាក់ជាច្រើន ដើម្បីទិញទុកឲ្យកូនៗនិងសាច់ញាតិរបស់អ្នកស្រី។ អ្នកស្រីបាននិយាយថា អ្នកស្រីមិនដែលទិញអាវរងារនោះទេ កាលពីឆ្នាំមុនៗ ទើបតែឆ្នាំនេះប៉ុណ្ណោះដែលអាកាសធាតុមានភាពខុសប្លែកខ្លាំង។
អ្នកស្រីបានប្រាប់ VOA ទាំងសើចថា៖
«ថ្ងៃនេះវាប្លែក។ វារងារប្លែក។ រាល់ឆ្នាំវាអត់ដែលរងារអីចឹងទេ។ ទើបតែឥឡូវវារងារ»។
លោក ឯម ដែន អាជីវករលក់ខោអាវនៅផ្សារធំថ្មី បានបន្តប្រាប់ VOA ថា ជាធម្មតា លោកលក់តែខោអាវសាមញ្ញៗស្តើងៗរាល់ឆ្នាំ។ លោកមិនដែលប្តូរមកលក់ខោអាវរងារពេលអាកាសធាតុចុះត្រជាក់ទេ ទើបតែឆ្នាំនេះប៉ុណ្ណោះ។
លោកបាននិយាយថា៖
«ទើបឆ្នាំហ្នឹង! អីចឹងមួយជួរហ្នឹងគឺផ្អើលលក់អីចឹងទាំងអស់ហ្មង! លក់ខោអាវរងារច្រើន»។
ជាមួយគ្នានោះដែរ លោកនាយករដ្ឋមន្រ្តី ហ៊ុន សែន កាលពីថ្ងៃទី២០ ខែធ្នូ កន្លងទៅ ក៏បានថ្លែងប្រាប់ឲ្យប្រជាជនខ្មែរថែរក្សាសុខភាព និងពាក់ខោអាវក្រាស់ៗ ខណៈ ធាតុអាកាសចុះត្រជាក់ខ្លាំង។ លោកថា ជាង៩០ភាគរយបានពាក់អាវរងារដើម្បីការពារភាពត្រជាក់ ដែលធ្វើឲ្យអាជីវករលក់អាវរងារកំពុងត្រូវប៉ាន់។
ថ្លែងក្នុងពិធីជួបជុំជាមួយកម្មករ កម្មការិនីរោងចក្រកាត់ដេរ និងដោយមានពាក់អាវរងារខ្លួនឯងផងនោះ លោក ហ៊ុន សែន បានមានប្រសាសន៍ថា៖
«ហើយឥឡូវនេះ អ្នកដែលលក់អាវរងារគឺត្រូវប៉ាន់ខ្លាំងណាស់។ ប៉ុន្តែនៅសល់តែប៉ុន្មានថ្ងៃទៀតទេ ក៏វានឹងផុតរលត់ដែរ»។
យោងតាមការឱ្យដឹងរបស់ក្រសួងធនធានទឹកនិងឧតុនិយម ការចុះត្រជាក់ជាលើកទីពីរនៅចុងឆ្នាំ២០១៧នេះ គឺត្រជាក់ជាងបណ្តាឆ្នាំកន្លងមក ហើយការធ្លាក់ចុះត្រជាក់នេះនៅបន្តទៀតរហូតដល់សប្តាហ៍ខាងមុខ ពេលដែលភ្លៀងនឹងចាប់ផ្តើមធា្លក់។
ថ្លែងប្រាប់ VOA តាមទូរសព្ទនៅថ្ងៃសុក្រនេះ លោក ចាន់ យុត្ថា អ្នកនាំពាក្យ ក្រសួងធនធានទឹក និងឧតុនិយម មានប្រសាសន៍ក្នុងន័យដើមថា៖
«បាទ អឺអ្វីដែលយើងបានជួបប្រទះកន្លងមក ជាពិសេសការចុះត្រជាក់លើកទីពីរនេះ គឺវាត្រជាក់ជាងបណ្តាឆ្នាំកន្លងមក បាទ។ ហើយមិនទាន់ផុតទេ ដោយសារតែយើងមិនទាន់ផុតរដូវរំហើយ។ អីចឹងទេ ការត្រជាក់នេះនៅមានបន្តទៀតបាទ»។
អ្នកនាំពាក្យរូបនេះថា ភ្លៀងនឹងចាប់ផ្តើមធ្លាក់នៅសប្តាហ៍ក្រោយ ដោយសារឥទ្ធិពលព្យុះនៅប្រទេសវៀតណាម បន្ទាប់ពីសីតុណ្ហភាពនឹងត្រឡប់ទៅត្រឹម២៣ ឬ២៤អង្សារ។
លោក ចាន់ យុត្ថា បានមានប្រសាសន៍ថា៖
«ព្យុះនេះនឹងធ្វើដំណើរមកតំបន់ដីសណ្តទន្លេមេគង្គក្នុងប្រទេសវៀតណាម អីចឹងទេវាធ្វើឲ្យមានភ្លៀង។ ភ្លៀងមានរយៈពេលពីរបីថ្ងៃដែរ ចាប់ពី២៦ដល់២៨ បាទ»។
ក្រសួងធនធានទឹកនិងឧតុនិយមបានឱ្យដឹងក្នុងចេញសេចក្តីជូនដំណឹងចេញផ្សាយនៅសប្តាហ៍នេះថា ធាតុអាកាសត្រជាក់ខ្លាំងនឹងបន្តគ្របដណ្តប់លើព្រះរាជាណាចក្រកម្ពុជាត្រឹមថ្ងៃទី២១ខែធ្នូនេះ ហើយចាប់ពីថ្ងៃទី២២ដល់៣១ធ្នូ សីតុណ្ហភាពអប្បបរមានឹងកើនមកត្រឹមរង្វង់២៣អង្សារទៅ២៤អង្សារ លើកលែងតែខេត្តមួយចំនួនគឺខេត្តប៉ៃលិន ព្រះវិហារ ស្ទឹងត្រែង មណ្ឌលគិរី និងខេត្តរតនគិរី៕
