បន្ទាប់ពីតុលាការបារាំងកាលពីថ្ងៃព្រហស្បតិ៍បានកាត់ក្តីថាចុងចោទ៥១នាក់មានទោសក្នុងរឿងក្តីដាក់ថ្នាំសន្តំនិងរំលោភ ជនរងគ្រោះអ្នកស្រី Gisele Pelicot បានថ្លែងថារឿងក្តីនេះគឺជា «រឿងដ៏សែនលំបាកឈឺផ្សារមួយ» ប៉ុន្តែអ្នកស្រីមិនដែលស្តាយក្រោយដាក់ឱ្យរឿងក្តីនេះជារឿងក្តីសាធារណៈនោះទេ។
ក្រោយសវនការរយៈពេល៤ខែនៅទីក្រុង Avignon ភាគអាគ្នេយ៍ប្រទេសបារាំង អតីតស្វាមីរបស់អ្នកស្រី Pelicot អស់រយៈពេល៥០ឆ្នាំគឺលោក Dominique Pelicot វ័យ៧២ឆ្នាំ ត្រូវបានកាត់ទោសឱ្យជាប់ពន្ធនាគារអតិបរមា២០ឆ្នាំ។
កាលពីខែកញ្ញា លោកបានសារភាពទោសកំហុសថាបានដាក់ថ្នាំភរិយារបស់លោក ហើយរំលោភពេលបាត់បង់ស្មារតី និងបានហៅអ្នកដែលលោកមិនដែលស្គាល់មកចូលរួមជាមួយលោករំលោភភរិយារបស់លោកអស់រយៈពេល១០ឆ្នាំ។
អង្គចៅក្រម៥នាក់បានប្រគល់សហចុងចោទ៥០នាក់របស់អ្នកស្រី Pelicot ដែលជាបុរសមានអាយុពី២៧ឆ្នាំដល់៧៤ឆ្នាំ ឱ្យជាប់ពន្ធនាគារពី៣ដល់២០ឆ្នាំ។
នៅក្នុងអត្ថាធិប្បាយដំបូងៗរបស់អ្នកស្រីក្រោយការកាត់ក្តីនេះ អ្នកស្រី Gisele Pelicot បានប្រាប់ក្រុមអ្នកសារព័ត៌មានថាអ្នកស្រីគិតដល់កូនៗ៣នាក់របស់អ្នកស្រីនិងចៅៗផងដែរ «ព្រោះពួកគេជាអ្នកជំនាន់ក្រោយ។ អ្នកស្រីតតាំងរឿងក្តីនេះក៏ដោយសារពួកគេដែរ»។
អ្នកស្រីបានថ្លែងថា អ្នកស្រីក៏គិតដល់ក្រុមគ្រួសារដទៃទៀតដែលរងគ្រោះដោយ«សោកនាដកម្មបែបនេះ»។ ចុងបញ្ចប់អ្នកស្រីនិយាយថា «ខ្ញុំគិតដល់ជនរងគ្រោះដែលមិនត្រូវបានគេទទួលស្គាល់ដែលជាញឹកញាប់រឿងរ៉ាវមិនត្រូវបានគេដឹងឮ។ ខ្ញុំចង់ឱ្យអ្នកដឹងថាយើងបានឆ្លងកាត់រឿងរ៉ាវលំបាកដូចគ្នា»។
ចាប់តាំងពីរឿងក្តីនេះបានចាប់ផ្តើមឡើងកាលពីខែកញ្ញា អ្នកស្រី Pelicot បានក្លាយជានិមិត្តរូបស្ត្រីក្លាហាន និងមានអ្នកគាំទ្ររបស់អ្នកស្រីជាច្រើននាក់រង់ចាំនៅខាងក្រៅតុលាការ៕
