ភ្ជាប់​ទៅ​គេហទំព័រ​ទាក់ទង

បារាំង​នឹង​ជួល​កម្លាំង​សន្តិសុខ​២៦៨០​បន្ថែម​ដើម្បី​ប្រឆាំង​ក្រុម​ជ្រុល​និយម


ទាហាន​បារាំង​ដើរ​ល្បាត​នៅ​មុខ​វិហារ​ Notre Dame ក្នុង​ទីក្រុង​ប៉ារីស​ជា​ផ្នែក​មួយ​នៃ​ការបន្តឹង​សុវត្ថិភាព​បន្ទាប់​ពី​ការវាយ​ប្រហារ​របស់​ក្រុម​ជ្រុល​និយម​ឥស្លាម​ កាល​ពី​ថ្ងៃ​ទី​២០ ខែ​មករា ឆ្នាំ​២០១៥។

លោក​នាយករដ្ឋ​មន្រ្តី​បារាំង Manuel Valls ​មាន​ប្រសាសន៍​ថា ​បារាំង​នឹង​បង្កើត​តំណែង​សន្តិសុខ​ថ្មី​ចំនួន​២៦៨០ក្នុង​រយៈ​ពេល​៣​ឆ្នាំ​បន្ទាប់​ទៀត ​ដើម្បី​ជួយ​ប្រយុទ្ធ​នឹង​ការគំរាម​នៃ​លទ្ធិ​ជ្រុល​និយម​អ៊ីស្លាម។

​លោកValls​បាន​ប្រកាស​វិធានការ​ថ្មីនេះ​នៅ​ថ្ងៃ​ពុធ​បន្ទាប់​ពី​ជំនួប​ប្រចាំ​សប្តាហ៍របស់​គណៈ​រដ្ឋមន្រ្តី ​ដោយ​លោក​បាន​និយាយ​ថា ​រដ្ឋាភិបាល​ទីក្រុង​ប៉ារីស​នឹង​ចំណាយ​ប្រាក់​ជិត​៥០០​លានដុល្លារ​លើ​កិច្ច​ខំ​ប្រឹងប្រែង ​ដើម្បី​ធ្វើ​ឲ្យ​ប្រសើរ​ឡើង​នូវ​ការប្រយុទ្ធ​ប្រឆាំង​ភេរវកម្ម​ បន្ទាប់​ពី​ការវាយ​ប្រហារ​ដ៏​ប្រល័យ​នៅ​ក្នុង​ប្រទេស​បារាំង​កាល​ពី​ដើម​ខែ​នេះ។

​នៅ​ថ្ងៃ​ពុធ​នេះ​ដែរ ​ក្រុម​អ្នក​ស៊ើប​អង្កេត​បារាំង​បាន​និយាយ​ថា ​ពួកគេ​បាន​ចោទ​ប្រកាន់​មនុស្ស​៤​នាក់​នៅ​ក្នុង​ការទាក់​ទិន​ទៅ​នឹង​ការវាយ​ប្រហារ​ទៅ​លើ​ហាង​លក់​គ្រឿង​ទេស​សម្រាប់​អាហារ​ជន​ជាតិ​ជ្វីស​នៅ​តំបន់​ភាគ​ខាង​កើត​នៃ​ទីក្រុង​ប៉ារីស​ដែល​បាន​ធ្វើ​ឲ្យ​មនុស្ស​៤​នាក់​ស្លាប់។

រដ្ឋ​អាជ្ញា​បាន​និយាយ​នៅ​ថ្ងៃ​ពុធ​នេះ​ថា ​ក្រុម​បុរស​ដែល​រង​ការចោទ​ប្រកាន់​ទាំង​នោះ ​មាន​ចំណង​ទាក់ទង​ជាមួយ​ Amedy Coulibaly ដែល​បាន​សម្លាប់​មនុស្ស៤នាក់​នៅ​ក្នុង​ការចាប់​មនុស្ស​ធ្វើ​ជា​ចំណាប់​ខ្មាំង​នៅ​ហាង​លក់​គ្រឿង​ទេស​សម្រាប់​អាហារ​ជន​ជាតិ​ជ្វីស​កាល​ពី​ថ្ងៃ​ទី​៩​ខែមករា។ មួយ​ថ្ងៃ​មុន​ហេតុ​ការណ៍​នេះ​បាន​កើត​ឡើង ​ជន​នោះ​បាន​សម្លាប់​ប៉ូលីស​ស្រី​ម្នាក់​។​

បុរស​ទាំង​៤​នាក់​នោះ ​ត្រូវ​បាន​គេ​សង្ស័យ​ពី​ការផ្តល់​ការគាំទ្រ​ដល់ Coulibaly ដែល​ក្រោយ​មក​ត្រូវ​បាន​ប៉ូលីស​សម្លាប់៕

XS
SM
MD
LG