ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ថ្មី​នៃ​ប្រទេស​បារាំង​​ចូល​កាន់​តំណែង​នៅ​ពេល​មាន​វិបត្តិ​


រូបឯកសារ៖ កិច្ចប្រជុំសមាជិករដ្ឋាភិបាលថ្មី ដែលមានការចូលរួមពីប្រធានាធិបតីបារាំងលោក Emmanuel Macron លោក Jean Castex និងសមាជិកដទៃទៀតនៅវិមាន Elysee ក្នុងក្រុងប៉ារីស កាលពីថ្ងៃទី០៧ ខែកក្កដា ឆ្នាំ២០២០។

រដ្ឋាភិបាល​ថ្មី​នៃ​ប្រទេស​បារាំង​បាន​ចូល​កាន់​តំណែង​មួយ​សប្តាហ៍​ក្រោយ​ពី​គណបក្ស​សាធារណ​រដ្ឋ​ឈ្មោះ​គណបក្ស​ Republic On The Move ​របស់​លោក​ប្រធានាធិបតី ​Emmanuel Macron ​មាន​ការ​គាំទ្រ​តិច​នៅ​ក្នុង​ការ​បោះឆ្នោត​ក្នុង​មូលដ្ឋាន​ជុំ​ទីពីរ។​

មេ​ដឹកនាំ​រដ្ឋាភិបាល​នេះ​គឺ​លោក​នាយក​រដ្ឋមន្ត្រី ​Jean Castex ​ដែល​ជា​អតីត​អភិបាល​ក្រុង​មិន​សូវ​មាន​គេ​ស្គាល់​មក​ពី​តំបន់​ Pyrenees។​ លោក​មាន​ងារ​ថា​ជា​« Mr. Deconfinement ​មាន​ន័យ​ថា​ «អ្នក​មិន​បង្ខាំង»​ ក្រោយ​ពី​លោក​បាន​ចាត់​ចែង​ឲ្យ​ប្រទេស​បារាំង​ចេញ​ផុត​ពី​ការ​បិទ​ប្រទេស​ដោយសារ​ការ​រាតត្បាត​នៃ​វីរុស​កូរ៉ូណា។​ លោក​បាន​កាន់​តំណែង​នេះ​ជំនួស​លោក​ Edouard Philippine ​ដែល​ជា​វរជន​មាន​ប្រជាប្រិយភាព​ហើយ​អាច​ជា​គូ​ប្រជែង​នឹង​លោក ​Macron ​ក្នុង​ការ​បោះឆ្នោត​លើក​ក្រោយ​ផង​ដែរ។​

លោក​ Ulysse Gosset​ ដែល​ជាអ្នកអត្ថាធិប្បាយនយោបាយ​ប្រចាំ​ប៉ុស្តិ៍ទូរទស្សន៍ BMFTV នៅប្រទេសបារាំង បាន​និយាយ​ថា៖​

«លោក​ Macron ​មាន​គោលដៅ​មួយ​គឺ​ ប្រយុទ្ធ​នឹង​ដំណើរ​ធ្លាក់​ចុះ​នៃ​សេដ្ឋកិច្ច​ កែប្រែ​ប្រទេស​ធ្វើ​ឱ្យ​ប្រទេស​ជាតិ​មាន​ស្ថានភាព​ល្អ​ជាង​ពេល​សព្វ​ថ្ងៃ​នេះ​សម្រាប់​ការ​បោះឆ្នោត​ប្រធានាធិបតី​នៅ​ពេល​ខាង​មុខ»។​

លោក​ Ulysse Goss ​បាន​ថ្លែង​ទៀត​ថា៖ ​«ការងារ​របស់​នាយក​រដ្ឋមន្ត្រី​រូប​នេះគឺ​ធ្វើតាម​បញ្ជា​របស់​លោក​ Macron។​ លោក​ត្រូវ​ដោះស្រាយ​វិបត្តិ​ទាំងនេះ។​ ហើយ​គ្មាន​អ្វី​លើស​ពី​នេះ​ទេ។​ លោក ​Macron ​មិន​ចង់​មាន​នាយក​រដ្ឋមន្ត្រី​ដែល​អាច​ជា​គូ​ប្រជែង​ដូច​លោក​អតីត​នាយក​រដ្ឋមន្ត្រី ​Edouard Philippe ​ទេ»។​

លោក​ Gerard Darmanin ​រដ្ឋមន្ត្រី​ថ្មី​នៃ​ក្រសួង​មហាផ្ទៃ​នាំ​ឱ្យ​មាន​ការ​រំជើប​រំជួល។​លោក​មាន​អាយុ​៣៥​ឆ្នាំ​ដែល​ធ្វើ​ឲ្យ​លោក​ជា​រដ្ឋមន្ត្រី​ក្រសួង​មហាផ្ទៃ​មាន​វ័យ​ក្មេង​ជាង​គេ​ក្នុង​ប្រព័ន្ធ​រដ្ឋាភិបាល​សាធារណ​រដ្ឋ​បារាំង​ហៅ​ថា Fifth Republic ​បង្កើត​ដោយ​លោក​ Charles de Gaulle ។​ លោក​បាន​ចូល​កាន់​តំណែង​នៅ​ពេល​កង​កម្លាំង​ប៉ូលិស​បាក់​ទឹកចិត្ត​ ហើយ​ប្រឈម​នឹង​ការ​ចោទ​ប្រកាន់​ពី​ការ​រើស​អើង​ខាង​ពូជ​សាសន៍​និង​អំពើ​ហិង្សា។​

លោក ​Gerard Darmanin ​ក៏​ប្រឈម​នឹង​ការ​ស៊ើប​អង្កេត​ដំបូង​មួយ​អំពី​ការ​ចោទ​ប្រកាន់​ពី​បទ​រំលោភ​សេព​សន្ធវៈ​ដែល​ការិយាល័យ​របស់​លោក ​Macron ​និយាយ​ថា​ មិន​នាំ​ឱ្យ​មាន​ឧបសគ្គ​ដល់​ការ​តែងតាំង​ឱ្យ​លោក​កាន់​តំណែង​នេះ​ទេ។​

សហជីព​ប៉ូលិស​គ្មាន​ប្រតិកម្ម​អំពី​ចៅហ្វាយ​នាយ​ថ្មី​របស់​ពួក​គេ​ទេ។​ ក៏​ប៉ុន្តែ​ពួក​អ្នក​ការពារ​ស្ត្រី​បាន​ធ្វើ​បាតុកម្ម​នៅ​ខាង​មុខ​វិមាន​ប្រធានាធិបតី ​Elysee។​

លោក​ Eric Dupond-Moretti ​រដ្ឋ​មន្ត្រី​ថ្មី​នៃ​ក្រសួង​យុត្តិធ៌ម​ក៏​មាន​រឿង​ចម្រូង​ចម្រាស​ដែរ។ លោក​ល្បី​ឈ្មោះ​ជា​មេធាវី​ម្នាក់​ដែល​ចូល​ចិត្ត​ប្រឈ្លោះ​ដោយ​លោក​បាន​ការពារ​ពួក​ជាតិ​និយម ​Corse ពួក​អ្នក​នយោបាយ​អាហ្វ្រិក​ និង​លោក​ Julien Assange ​អ្នក​បង្កើត​បណ្តាញ​ Wikileaks។ ​មេ​ដឹកនាំ​ម្នាក់​នៃ​សហជីព​ពួក​ចៅក្រម​បាន​រិះគន់​ការ​តែងតាំង​លោក ​ Eric Dupond-Moretti ​ថា​ជា​ «ការ​ប្រកាស​សង្គ្រាម» ​ប្រឆាំង​នឹង​ប្រព័ន្ធ​តុលាការ។​

ការ​រុះ​រើ​រដ្ឋាភិបាល​ដោយ​លោក ​Macron ​ប្រឈម​នឹង​សម្ពាធ​ឱ្យ​មាន​សកម្ម​ភាព​ខាង​បរិស្ថាន​នៅ​ក្រោយ​គណបក្ស​ Greens Party ​មាន​ការ​គាំទ្រ​ច្រើន​នៅ​ក្នុង​ការ​បោះឆ្នោត​ក្រុង។​ លោក​ស្រី​ Barbara Pompili​ ជា​សហ​អ្នក​បង្កើត​គណបក្ស​ការ​ពារ​បរិស្ថាន​នេះ​និង​ជា​រដ្ឋ​លេខាធិការ​សម្រាប់​កិច្ចការ​ជីវចម្រុះ។ ​ក៏​ប៉ុន្តែ​លោក​ស្រី​មិន​មាន​ឥទ្ធិពល​ទេ​ហើយ​លោកស្រី​នឹង​ប្រឈម​នឹង​ការ​ពិនិត្យ​ពិច័្ចយ​អំពី​របៀប​លោកស្រី​ដោះស្រាយ​ការ​កាត់​បន្ថយ​ការ​បញ្ចេញ​ឧស្ម័ន​កាបោន​ក្នុង​បរិយាកាស​និង​គោល​ដៅ​ខាង​បរិស្ថាន​ឯ​ទៀតៗ។​

ប្រែសម្រូល​ដោយ​លោក​ ឈឹម សុមេធ​

តួលេខនៃករណីឆ្លងជំងឺកូវីដ១៩

XS
SM
MD
LG