ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

គណបក្ស​កុម្មុយនីស្ត​បារាំង​មាន​បំណង​ចូលរួម​ក្នុង​ការ​ប្រជែង​យក​តំណែង​ប្រធានាធិបតី


រូបឯកសារ៖ បេក្ខជន​ប្រធានាធិបតី​ដែល​គេ​រំពឹង​ទុក​ពី​គណបក្ស​កុម្មុយនីស្ត​បារាំង​គឺ​លោក Fabien Roussel ថ្លែង​សុន្ទរកថា​ទៅ​កាន់​អ្នក​គាំទ្រ​នៅ​ក្រុង Caudan ប្រទេស​បារាំង ថ្ងៃទី២៣ ខែមីនា ឆ្នាំ២០២១។

បេក្ខជន​ប្រធានាធិបតី​ដែល​គេ​រំពឹង​ទុក​ពី​គណបក្ស​កុម្មុយនីស្ត​បារាំង​គឺ​លោក Fabien Roussel។ លោក​គឺ​ជា​អតីត​អ្នក​កាសែត​ដែល​មាន​ភាព​ល្បីល្បាញ​ចំពោះ​ការ​រស់នៅ​បែប​ស្តុកស្តម្ភ​ និង​ជា​អ្នក​នេសាទ​បែប​កម្សាន្ត​អារម្មណ៍។ លោក​បាន​ដឹកនាំ​គណបក្ស​នេះ​ចាប់តាំង​ពី​ឆ្នាំ២០១៨​មក។ លោក​មាន​ការ​គាំទ្រ​ខ្លាំង​នៅ​ក្នុង​កិច្ចប្រជុំ​គណបក្ស ទោះបី​ជា​មូលដ្ឋាន​របស់​គណបក្ស​នេះ​ត្រូវ​សម្រេច​គាំទ្រ​បេក្ខភាព​របស់​លោក​នៅ​ខែ​ក្រោយ​ក៏​ដោយ។​

លោក Roussel បាន​ប្រកាស​កាលពី​ថ្ងៃទី១១ ខែមេសា ពី​គម្រោង​របស់​លោក​ដើម្បី​ឈរ​ឈ្មោះ​ជា​បេក្ខជន​ប្រធានាធិបតី។ លោក​ថា លោក​ចង់​ផ្តល់​កម្មវិធី​នៃ​ក្តី​សង្ឃឹម​ដល់​ប្រជាជន​បារាំង មិន​មែន​គ្រាន់​តែ​យក​ឈ្នះ​ការ​រាតត្បាត​ជំងឺ​កូវីដ១៩​ប៉ុណ្ណោះ​ទេ ប៉ុន្តែ​ថែម​ទាំង​ដោះស្រាយ​បញ្ហា​គ្មាន​ការងារ​ធ្វើ ភាពក្រីក្រ និង​វិសមភាព​ផង​ដែរ។

គណបក្ស​កុម្មុយនីស្ត​ដែល​មាន​អាយុ​មួយ​សតវត្សរ៍​របស់​បារាំង​នេះ​ធ្លាប់​មាន​កម្លាំង​នយោបាយ​យ៉ាង​ខ្លាំងក្លា។ នៅ​ក្នុង​ទសវត្សរ៍​ ១៩៧០ គណបក្ស​នេះ​ជា​គណបក្ស​ឆ្វេង​និយម​ដ៏​មាន​អំណាច​បំផុត​នៅ​ក្នុង​ប្រទេស ដែល​មាន​ការ​គាំទ្រ​ប្រមាណ ២០%។ គណបក្ស​នេះ​ក៏​បាន​គ្រប់គ្រង​ទីក្រុង​ដែល​មាន​ប្រជាជន ដែល​មាន​ជា​វណ្ណៈ​កម្មករ​ជាច្រើន​នៅ​ជុំវិញ​ទីក្រុង​ប៉ារីស​ ដែល​ត្រូវ​បាន​គេ​ដាក់​ឈ្មោះ​ក្រៅ​ផ្លូវ​ការ​ថា តំបន់​ក្រវាត់​ក្រហម និង​មាន​ផ្លូវ​ដែល​ត្រូវ​បាន​ដាក់​ឈ្មោះ​តាម​បុគ្គល​កុម្មុយនីស្ត​មួយ​ចំនួន​ដូចជា លោក កាល់ម៉ាក្ស៍ និង​លោក​លេនីន​ជា​ដើម។

សព្វ​ថ្ងៃនេះ​ គណបក្ស​នេះ​ជា​ស្រមោល​នៃ​អតីតកាល​របស់​ខ្លួន ទោះ​បី​ជា​គណបក្ស​នេះ​ស្ថិត​ក្នុង​ចំណោម​គណបក្ស​កុម្មុយនីស្ត​នៅ​ទូទាំង​អឺរ៉ុប​ដែល​មាន​សមាជិក​នៅ​ក្នុង​សភា​អឺរ៉ុប​ក្តី។ នៅ​ក្នុង​ប្រទេស​បារាំង បេក្ខជន​ស្តាំ​និយម និង​កណ្តាល​និយម​បាន​ដណ្តើម​យក​តំបន់ «ក្រវាត់​ក្រហម» នៅ​ក្នុង​ទីក្រុង​ប៉ារីស ហើយ​គណបក្ស​កុម្មុយនីស្ត​នៅ​ពេល​នេះ​គ្រប់គ្រង​តំបន់​តែ​មួយ​ប៉ុណ្ណោះ​នៅ​បារាំង។

លោកស្រី Marie-George Buffet បេក្ខជន​ប្រធានាធិបតី​ចុងក្រោយ​របស់​គណបក្ស​នេះដែល​គេ​រំពឹង​ថា​ឈ្នះ​ការ​បោះឆ្នោត​ទទួល​បាន​សំឡេង​ឆ្នោត​គាំទ្រ​តិច​ជាង​ ២% នៃ​សំឡេង​ឆ្នោត​សរុប​នៅ​ក្នុងការ​បោះឆ្នោត​កាល​ពី​ឆ្នាំ២០០៧។ លោក Roussel ត្រូវ​បាន​បោះឆ្នោត​ជ្រើសរើស ដោយសារ​តែ​ការ​អំពាវនាវ​របស់​លោក​ដើម្បី​ឈរ​ឈ្មោះ​ម្តង​ទៀត។

លោក Jean Petaux អ្នក​វិភាគ​នយោបាយ​ថា ការ​សម្រេច​ចិត្ត​របស់​លោក Roussel ស្ទើរ​តែ​ជា​ការ​សម្រេច​សម្រាប់​គណបក្ស​រួច​ទៅ​ហើយ។ ប្រសិនបើ​គណបក្ស​កុម្មុយនីស្ត​មិន​ដាក់​បេក្ខជន​ឲ្យ​ឈរ​ឈ្មោះ​ទេ​នោះ​ ពួកគេ​អាច​នឹង​មិន​មាន​វត្តមាន​ទៀត​នោះ​ទេ។ ប្រសិនបើ​ពួកគេ​ដាក់ នោះ​ពួកគេ​អាច​នឹង​រង​ភាព​អាម៉ាស់​ដោយ​សារ​ការ​ចាញ់​ឆ្នោត។

ទិដ្ឋភាព​ក្នុង​ពេល​ខាង​មុខ​ដ៏​ខ្លី​មិន​អំណោយផល​នោះ​ទេ។ កិច្ចប្រជុំ​មួយ​មាន​គោលបំណង​បង្រួបបង្រួម​អ្នក​ឆ្វេង​និយម​បារាំង​ដែល​មាន​ការ​បែកបាក់ រាប់​ចាប់​ពី​គណបក្ស​បៃតង ដល់​លោក Jean-Luc Melenchon មេដឹកនាំ​ឆ្វេង​និយម​ជ្រុល រហូត​ដល់​អ្នកស្រី Anne Hidalgo អភិបាល​ក្រុង​ប៉ារីស​មក​ពី​គណបក្ស​សង្គម​និយម។ អ្នក​គាំទ្រ​សង្ឃឹម​ថា នឹង​ស្វែងរក​បេក្ខជន​តែ​មួយ​រូប​សម្រាប់​ការ​ប្រជែក​យក​តំណែង​ប្រធានាធិបតី​នៅ​ឆ្នាំ​ក្រោយ។ ប៉ុន្តែ​លោកMelenchon ដែល​ជា​តួអង្គ​ដ៏​មាន​ឥទ្ធិពល​មួយ​រូប​និយាយ​ថា លោក​នឹង​មិន​ចូលរួម​នោះ​ទេ។​

ទោះ​បី​ជា​ក្រុម​ឆ្វេង​និយម​រួបរួម​គ្នា​ក៏​ដោយ ក៏​អ្នក​អត្ថាធិប្បាយ​នយោបាយ​ថា ការ​ដែល​លោក Roussel ត្រូវ​បាន​ជ្រើសរើស​មិន​ទំនង​នឹង​កើត​ឡើង​ទេ។ ប្រសិន​បើ​លោក Roussel សម្រេច​ឈរ​ឈ្មោះ​ដោយ​ខ្លួន​ឯង នោះ​នឹង​ធ្វើ​ឱ្យ​ក្រុម​ឆ្វេង​និយម​កាន់​តែ​បែកបាក់​ថែម​ទៀត។

ទោះ​ជា​ជ្រើស​យក​ជម្រើស​ណា​ក៏​ដោយ ក៏​ឱកាស​សម្រាប់​គណបក្ស​កុម្មុយនីស្ត និង​ក្រុម​ឆ្វេង​និយម​ផ្សេង​ទៀត​មាន​តិចតួច​ណាស់។ ការ​ស្ទង់​មតិ​របស់​វិទ្យាស្ថាន IFOP នៅ​ពាក់​កណ្តាល​ខែ​មេសា​បង្ហាញ​ថា លោក​ប្រធានាធិបតី Emmanuelle Macron និង​លោកស្រី Marine Le Pen មេដឹកនាំ​ស្តាំ​និយម​ជ្រុល​នាំ​មុខ​ក្នុង​ការ​បោះឆ្នោត​នៅ​ឆ្នាំ​ក្រោយ។ ការ​ស្ទង់​មតិ​បង្ហាញ​ថា មិន​មាន​បេក្ខជន​ឆ្វេង​និយម​ណា​មួយ​អាច​ទទួល​បាន​សំឡេង​ឆ្នោត​គាំទ្រ​លើស​ពី ១៣% នៃ​សំឡេង​ឆ្នោត​សរុប​នោះ​ទេ ហើយ​លោក Roussel នឹង​ទទួល​បាន​តែ ២.៥% សំឡេង​ប៉ុណ្ណោះ។

លោក Petaux ថា វា​ជា​ស្ថានភាព​ដែល​អាច​នឹង​មិន​កើត​ឡើង ដោយសារ​តែ​វិបត្តិ​វីរុស​កូរ៉ូណា​បាន​ធ្វើ​ឱ្យ​ប្រជាជន​បារាំង​មួយ​ចំនួន​ចង់​ទទួល​បាន​នូវ​អ្វីៗ​ថ្មី​ដែល​គណបក្ស​កុម្មុយនីស្ត​បាន​សន្យា​ជា​យូរ​មក​ហើយ ដូចជា​ការ​ត្រឡប់​ទៅ​រក​រដ្ឋ​ដែល​មាន​ការ​ការពារ​វិញ​ជាដើម។ ប៉ុន្តែ​ទោះ​បី​ជា​ក្នុង​ចំណោម​វណ្ណៈ​កម្មករ​ក្តី ក៏​គណបក្ស​នេះ​បាន​បាត់បង់​ការ​គាំទ្រ​ទៅ​ហើយ។ មនុស្ស​ជាច្រើន​បាន​ប្តូរ​ទៅ​គាំទ្រ​គណបក្ស National Rally ដែល​ជា​គណបក្ស​ស្តាំ​និយម​ជ្រុល​របស់​លោកស្រី Le Pen វិញ៕

XS
SM
MD
LG