ប្រទេសបារាំងនិងប្រទេសអង់គ្លេសកាលពីថ្ងៃចន្ទ បានយល់ព្រមទទួលយកជនភៀសខ្លួនរាប់ម៉ឺននាក់ពីភូមិភាគមជ្ឈឹមបូព៌ាដែលខ្ទិចខ្ទាំដោយសារសង្គ្រាម ក៏ប៉ុន្តែតួលេខនៃជនភៀសខ្លួនដែលប្រទេសទាំងពីរនេះបានយល់ព្រមយកនោះមានតិចជាងចំនួនក្រុមជនចំណាកស្រុកដែលធ្វើដំណើរទៅកាន់ប្រទេសអាល្លឺម៉ង់ដើម្បីកសាងជីវភាពថ្មី។
លោកប្រធានាធិបតីបារាំង Francois Hollande បានមានប្រសាសន៍ថា ប្រទេសលោកនឹងទទួលជនភៀសខ្លួន២៤.០០០នាក់ក្នុងរយៈពេល២ឆ្នាំខាងមុខ ចំណែកឯលោកនាយករដ្ឋមន្ត្រីអង់គ្លេស David Cameron បានមានប្រសាសន៍ថា ជនភៀសខ្លួនស៊ីរី២០.០០០នាក់មកពីជំរំក្នុងប្រទេសតួកគី ហ្សកដានី និងប្រទេសស៊ីរីនឹងមកតាំងលំនៅដ្ឋានក្នុងប្រទេសអង់គ្លេសក្នុងរយៈពេល៥ឆ្នាំខាងមុខ។លោក Cameron បាននិយាយថា ពួកកុមារនិងពួកក្មេងៗកំព្រាដែលងាយធ្វើឱ្យឈឺចាប់នឹងមានអាទិភាពជាងជនឯទៀតៗ។
ទ្វីបអឺរ៉ុបបានតស៊ូដោះស្រាយវិបត្តិជនចំណាកស្រុកធំបំផុតក្នុងទ្វីបនេះ ចាប់តាំងពីសង្គ្រាមលោកលើកទីពីរមកដោយប្រទេសហុងគ្រី នៅជួរមុខក្នុងការខិតខំរារាំងពួកជនទេសន្តរប្រវេសន៍ទាំងនេះកុំឱ្យទៅកាន់ប្រទេសអាល្លឺម៉ង់និងបណ្តារប្រទេសក្នុងតំបន់ស្កែនឌីណាវ (Scandinavia) ដែលមានធនធានច្រើនជាងខ្លួន។ទោះជាយ៉ាងនេះក៏ដោយ ក៏ជនភៀសខ្លួនរាប់ពាន់នាក់បានចូលទៅក្នុងប្រទេសអាល្លឺម៉ង់ដែលនៅទីនោះ អាជ្ញាធរនិងពួកអ្នកស្រុកក្នុងមូលដ្ឋានបានស្វាគមន៍ពួកគេដោយបានផ្តល់ម្ហូបអាហារ ទឹកនិងល្បែងក្មេងលេងសម្រាប់ក្រុមកុមារផងដែរ។
អាជ្ញាធរអាល្លឺម៉ង់បាននិយាយថា ជនភៀសខ្លួន៨សែននាក់ដែលស្វះស្វែងរត់គេចខ្លួនចេញពីសង្គ្រាមនិងភាពទីទាល់ក្រនៅក្នុងប្រទេសពួកគេអាចតាំងលំនៅដ្ឋាននៅក្នុងប្រទេសអាល្លឺមង់បាននៅមុនដំណាច់ឆ្នាំនេះ។
លោកស្រីអធិការបតីអាល្លឺម៉ង់ Angela Merkel បានប្រកាសថា៖ «ប្រទេសអាល្លឺម៉ង់បានក្លាយទៅជាប្រទេសមួយដែលមនុស្សច្រើននាក់នៅឯប្រទេសក្រៅ ភ្ជាប់ជាមួយសេចក្តីសង្ឃឹម»៕
