ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បុរស​៤​នាក់​នៅ​ភ្នំពេញ​ត្រូវ​បាន​បាញ់​ស្លាប់​ក្នុង​ផែន​ការ​ចាប់​ជំរិត​ដែល​ប៉ូលិស​ដឹង​មុន


កម្លាំង​កង​រាជ​អាវុធហត្ថ​ឈរនៅមុខទ្វារចូលក្នុងគេហដ្ឋានរបស់ភូមិគ្រិះមួយ ដែល​ឧក្រិដ្ឋជន​៤​នាក់​បាន​បង្កើត​​ផែន​ការ​ចូល​ជំរិត​​និង​ប្លន់​សម្លាប់​ ​ក្នុង​បុរី​អង្គរ​ភ្នំពេញ ​ខណ្ឌ​សែន​សុខ រាជធានី​ភ្នំពេញ កាលពីថ្ងៃទី១ ខែមីនា ឆ្នាំ២០២១។ (រូបថតដោយបញ្ជាការដ្ឋានកងរាជអាវុធហត្ថរាជធានីភ្នំពេញ)

បុរស​៤​នាក់​ត្រូវ​បាន​បាញ់​សម្លាប់​កាល​ពី​ថ្ងៃ​ច័ន្ទ​ ក្នុង​គម្រោង​ចាប់​ជំរិត​ទារ​ប្រាក់​ចំនួន​ ១​ លាន​ដុល្លារ​នៅ​រាជធានី​ភ្នំពេញ ក្រោយ​កម្លាំង​សមត្ថកិច្ច​បាន​ដឹង​មុន រួច​រៀប​ចំ​គម្រោង​ស្ទាក់​បាញ់។

កម្លាំង​កង​រាជ​អាវុធហត្ថ​ដែល​ដឹកនាំ​ប្រតិបត្តិការ​នោះ​បាន​ឲ្យ​ដឹង​ថា ​ឧក្រិដ្ឋជន​ ៤ ​នាក់​ បាន​បង្កើតផែន​ការ​ចូល​ជំរិតនិង​ប្លន់​សម្លាប់​ក្នុង​ភូមិ​គ្រឹះ​មួយ ​ក្នុង​បុរី​អង្គរ​ភ្នំពេញ ក្នុង​ខណ្ឌ​សែន​សុខ រាជធានី​ភ្នំពេញ។ នេះ​បើ​យោង​ទៅ​តាម​ទំព័រ​ហ្វេសប៊ុក​របស់​កង​រាជ​អាវុធហត្ថ​រាជធានី​ភ្នំពេញ។

កង​រាជ​អាវុធ​ហត្ថ​បញ្ជាក់​ថា ​កម្លាំង​បាន​រៀប​ផែន​ការ​រង់​ចាំ​ជន​ដៃ​ដល់​ចូល​អន្ទាក់​វិញ​អស់​រយៈ​ពេល​ ៤ ​ថ្ងៃ​មក​ហើយ មុន​ថ្ងៃ​កើត​ហេតុ។ កង​រាជ​អាវុធ​ហត្ថ​មិន​បាន​បញ្ជាក់​ថា ​តើ​ពួកគេទទួល​ព័ត៌មាន​អំពី​ផែន​ការ​ចាប់​ជំរិត​និង​ប្លន់​នេះ​ពី​អ្នក​ណា​នោះ​ទេ។

ផែន​ការ​នោះ​ត្រូវ​បាន​ធ្វើ​ឡើង​ កាល​ពី​ថ្ងៃ​ទី​១ ខែ​មីនា វេលា​ម៉ោង​ប្រមាណ​ ១១ ​ព្រឹក។

ពាក់ព័ន្ធ​នឹង​ការ​បាញ់​សម្លាប់​ជន​ប្រព្រឹត្ត​នៅកន្លែង​កើត​ហេតុ លោក អេង ហ៊ី អ្នក​នាំ​ពាក្យកង​រាជ​អាវុធហត្ថ​បាន​ថ្លែង​ប្រាប់​ VOA​ នៅ​ថ្ងៃ​អង្គារ​នេះ​ថា សមត្ថកិច្ច​បានបាញ់​ប្រហារតប​ត «ជា​ការ​ការពារ​ខ្លួន» ដោយ​សារ​ក្រុម​ដៃ​ដល់​ក៏​មាន​អាវុធ​ផង​ដែរ។

លោក​មាន​ប្រសាសន៍​ថា៖ «ស្ថានភាព​ដោយសារ​តែ​បុគ្គល​ជា​ជន​សង្ស័យ ​គឺ​គាត់​បាញ់​មក​លើ​សមត្ថកិច្ច។ អញ្ចឹង​ស្ថានភាព​នោះ​ គឺ​យើង​ត្រូវ​មាន​ការ​តប​ត​និង​ការ​ការ​ពារ​ខ្លួន​ស្រប​ច្បាប់​របស់​កម្លាំង​សមត្ថកិច្ច»។

នៅ​ពេល​សួរ​បញ្ជាក់​សេចក្តី​លម្អិត​ជុំវិញ​ករណី​បង្ក្រាប​ខាង​លើ​លោក អេង ហ៊ី មាន​ប្រសាសន៍​ថា ​មេ​បញ្ជាការ​រាជ​ធានី​ភ្នំពេញ​កំពុងរៀប​ចំ​ចេញ​ជា​របាយ​ការណ៍​លម្អិត។

វីដេអូ​ចុះ​បង្រ្កាប​និង​បាញ់​ប្រហារ​នោះ​ត្រូវ​បាន​បង្ហោះ​នៅ​លើ​បណ្តាញ​សង្គម​ហ្វេសប៊ុក និង​បាន​បង្ហាញ​ត្រួសៗ​ពី​សកម្មភាព​រៀបចំ​ដើម្បី​ចាត់​ការ និង​សកម្មភាព​បាញ់​ប្រហារ​ពី​សំណាក់​សមត្ថកិច្ច​មក​លើ​ក្រុម​ឧក្រិដ្ឋជន។

បន្ទាប់​ពី​ការ​បង្រ្កាប​នេះ មាន​ព័ត៌មាន​លេច​ឡើង​តាម​បណ្តាញ​សង្គម ដោយ​មាន​ការ​បង្ហាញ​កាត​អត្ត​សញ្ញាណ​របស់​បុគ្គល​ម្នាក់​នៅ​ក្នុង​ចំណោម​ក្រុម​ឧក្រិដ្ឋជន ដែល​កម្លាំង​សមត្ថកិច្ច​អះអាង​ថា​ជា​មេ​ខ្លោង ថា​ ជា​មន្រ្តី​ទី​បញ្ជា​ការ​អង្គរក្ស។ យ៉ាង​ណាក្តី លោក អេង ហ៊ី អ្នក​នាំ​ពាក្យ​កងរាជ​អាវុធហត្ថ បាន​បញ្ជាក់​ថា ​ទី​បញ្ជាការ​ដ្ឋាន​អង្គរក្ស​បាន​បដិសេធ​ថា ​បុគ្គល​រូប​នោះ​មិន​មាន​ឈ្មោះ​នៅ​ក្នុង​អង្គភាព​នោះ​ទេ។

បញ្ជាការ​ដ្ឋាន​កង​អង្គរក្ស​ក៏​បាន​ចេញ​លិខិត​មួយ​ច្បាប់​បដិសេធ​ឈ្មោះ​នេះ និង​ថា​បុគ្គល​ឈ្មោះ​ អ៊ឹម សុវណ្ណារិទ្ធ ប្រើប្រាស់ «បណ្ណ​ក្លែងក្លាយ» ដែល​កាត​នោះ​ត្រូវ​បាន​បង្ហោះ​លើ​បណ្តាញ​សង្គម​ហ្វេសប៊ុក​ជា​បន្ត​បន្ទាប់។

អ្នក​នាំ​ពាក្យ​សមាគម​សិទ្ធិ​មនុស្ស​អាដហុដ លោក ស៊ឹង សែនករុណា បានបង្ហាញ​មន្ទិល​ជុំវិញ​ការ​បដិ​សេធ​របស់​ទី​បញ្ជាការដ្ឋាន​អង្គរក្ស។

លោកថ្លែង​ថា៖ «សូម្បី​តែ​អង្គភាព​ដែល​ត្រូវ​បាន​រង​ការ​ចោទ​ប្រកាន់​ថា​មេ​កើយ​របស់​ជន​ដែល​ត្រូវ​បាន​គេ​បាញ់​សម្លាប់​ហ្នឹង​ ក៏​មិន​មាន​ការ​បញ្ជាក់​ឲ្យ​បាន​ច្បាស់​លាស់​ដែរ គឺ​មាន​ការ​បដិសេធ។ ក៏​ប៉ុន្តែ​យើង​ឃើញ​មាន​ការ​លេច​រូបភាព​ជា​ច្រើន ​ដែល​ថា​ម្នាក់ឈ្មោះ​ អ៊ឹម សុវណ្ណារិទ្ធ​ ហ្នឹង​គឺ​ធ្លាប់​បាន​បម្រើ​ការ​នៅ​ទី​បញ្ជាការ​កង​អង្គរក្ស​អី​ជា​ដើម»។

អ្នក​នាំ​ពាក្យសមាគម​សិទ្ធិ​មនុស្ស​អាដហុក​រូប​នេះបន្ត​ថា ​លោក​ពិបាក​សន្និដ្ឋាន​ថា​ តើ​ការ​ប្រើប្រាស់​កម្លាំង​សមាមាត្រ​ទៅ​នឹង​ក្រុម​ជន​ដៃ​ដល់ រហូត​ដល់​មាន​ការ​បាញ់​សម្លាប់​ទាំង​អស់​ឬ​ទេ។

លោក​បន្ថែម​ថា៖ «យើង​ឃើញ​មាន​ការ​បង្ហាញ​នូវ​រូបភាព​វីដេអូ​ខ្លះ​មួយ​ចំនួន​ ហើយ​បាន​បញ្ជាក់​ថា ជន​ដែល​ប្រព្រឹត្ត​ហ្នឹង ​គឺ​មាន​អាវុធ​ហើយ​មាន​ការ​បាញ់​ស្រោច​មក​លើ​ខាង​សមត្ថកិច្ច។ ក៏​ប៉ុន្តែ​យើង​មើល​មិន​ឃើញ​ថា ​ការ​បាញ់​ស្រោច​ហ្នឹង​បាន​បណ្តាល​ឲ្យ​មាន​សមត្ថកិច្ច​មួយ​រូប​ណា​រង​របួស​ទេ។ តែ​ផ្ទុយ​ទៅ​វិញ​ យើង​ឃើញ​ថា ​សមត្ថ​កិច្ច​មាន​គ្នា​ជា​ច្រើន​នាក់​ហ្នឹង​បាន​បាញ់​មក​លើ​ក្រុម​ប្រដាប់​អាវុធ​ហ្នឹង គឺ​ស្លាប់​ដល់ ​៤ ​រូប។ អ៊ីចឹង​យើង​មិន​ទាន់​ដឹង​ពី​នីតិវិធី​ ឬ​ក៏​វិធី​នៃ​ការ​បង្រ្កាប​ហ្នឹង​ដោយ​ក្នុង​លក្ខខណ្ឌ​និង​កម្រិត​សមាមាត្រ​គ្នា​ក្នុង​កម្រិត​ណា​ទេ»។

​មន្រ្តី​សិទ្ធិ​មនុស្ស​រូប​នេះ​ក៏​បាន​សម្តែង​ការ​ព្រួយ​បារម្ភ​ផង​ដែរ ប្រសិន​បើ​ករណី​នេះ​ត្រូវ​បាន​ប្រព្រឹត្តឡើង​ដោយ​មន្រ្តី​នៃ​អង្គភាព​ណា​មួយ​ ដែល​មាន​សិទ្ធិ​យក​អាវុធ​របស់​អង្គភាព​មក​ប្រើប្រាស់​បាននៅ​តាម​ទី​សាធារណៈ។

លោក ឃួង ស្រេង អភិបាលនៃគណៈអភិបាលរាជធានីភ្នំពេញ ចូលត្រួតពិនិត្យស្ថានការណ៍ក្រោយការបង្ក្រាបរបស់កម្លាំង​កង​រាជ​អាវុធហត្ថ​លើផែន​ការ​ចូល​ជំរិតនិង​ប្លន់​សម្លាប់​ ​ក្នុង​បុរី​អង្គរ​ភ្នំពេញ ក្នុង​ខណ្ឌ​សែន​សុខ រាជធានី​ភ្នំពេញ កាលពីថ្ងៃទី១ ខែមីនា ឆ្នាំ២០២១។ (រូបថតដោយបញ្ជាការដ្ឋានកងរាជអាវុធហត្ថរាជធានីភ្នំពេញ)
លោក ឃួង ស្រេង អភិបាលនៃគណៈអភិបាលរាជធានីភ្នំពេញ ចូលត្រួតពិនិត្យស្ថានការណ៍ក្រោយការបង្ក្រាបរបស់កម្លាំង​កង​រាជ​អាវុធហត្ថ​លើផែន​ការ​ចូល​ជំរិតនិង​ប្លន់​សម្លាប់​ ​ក្នុង​បុរី​អង្គរ​ភ្នំពេញ ក្នុង​ខណ្ឌ​សែន​សុខ រាជធានី​ភ្នំពេញ កាលពីថ្ងៃទី១ ខែមីនា ឆ្នាំ២០២១។ (រូបថតដោយបញ្ជាការដ្ឋានកងរាជអាវុធហត្ថរាជធានីភ្នំពេញ)

លោក រ័ត្ន ស្រ៊ាង មេ​បញ្ជា​ការ​រង​កង​រាជ​អាវុធ​ហត្ថ​លើ​ផ្ទៃ​ប្រទេស​និង​ជា​មេ​បញ្ជាការ​កង​រាជ​អាវុធ​ហត្ថ​រាជធានី​ភ្នំពេញ បានបង្ហោះ​សារ​នៅ​លើ​ហ្វេសប៊ុក​របស់​លោក ដោយ​ហៅ​ក្រុម​នោះ​ថា​បាន «រៀប​ផែន​ការ​គួរ​ឲ្យ​ភ្ញាក់​ផ្អើល​បំផុត»។

លោក​បន្ត​ថា​អ្នក​ផ្តើម​គំនិត​ឈ្មោះ អ៊ឹម សុវណ្ណារិទ្ធ ដែល​ត្រូវ​បាន​រាយការណ៍​ថា​ មាន​អាយុ​ជាង ​២០ ​ឆ្នាំ​ ធ្លាប់​ធ្វើ​ជា​អ្ន​ក​បើក​រថយន្ត​ឲ្យ​ម្ចាស់​ផ្ទះ ហើយ​ក៏​បាន​ឈប់​មួយ​រយៈ បន្ទាប់​មក​ក៏​សុំ​ម្ចាស់​ផ្ទះ​ចូល​ធ្វើ​ការ​វិញ ប៉ុន្តែ​ម្ចាស់​ផ្ទះ​មិន​ព្រម​ឆ្លើយ​តប។

លោក​បន្ថែម​ថា គម្រោង​ចាប់​ជម្រិត​ធ្វើ​ឡើង​នៅ​ថ្ងៃ​ច័ន្ទ ដោយ​សារពួកគេ​ងាយ​ស្រួល​ចូល​ធនាគារ​ដក​លុយ​តាម​មូលប្បទានប័ត្រ​ (សែក) ដែល​ពួកគេ​មាន​គម្រោង​ជំរិត​ពី​ក្រុម​គ្រួសារ​ជន​រង​គ្រោះ។

បើ​តាម​លោក រ័ត្ន ស្រ៊ាង​ ជន​ល្មើស​ដាក់ផែន​ការ​ភ្ជង់​ម្ចាស់​ផ្ទះ​ឲ្យ​សរសេរ​សែក​សាច់​ប្រាក់​ ១ ​លាន​ដុល្លារ បន្ទាប់​មក​នឹង​ចាប់​កូន​ស្រី​តូច​របស់​ម្ចាស់​ផ្ទះ​ម្នាក់​ឡើង​រថយន្តទៅ​ធនាគារ ដើម្បី​ដក​ប្រាក់។

ផែន​ការ​បន្ទាប់ ក្រោយ​ពី​ដក​លុយ​បាន ជន​ដៃ​ដល់នឹង​សម្លាប់​ម្ចាស់​ផ្ទះ​ទាំង​ ២ ​នាក់​ប្តី​ប្រពន្ធ ព្រម​ទាំង​កូនៗ​ ៦ ​នាក់ និង​អ្នក​បម្រើ​ ២ ​នាក់ រួច​ប្លន់​យក​លុយ​និង​គ្រឿង​អលង្ការ ដែល​មាន​ក្នុង​ទូរ​ដែក​ទាំង​អស់។

បន្ទាប់​មក​វេច​ខ្ចប់​សាក​សព​ដាក់​ចូល​រថ​យន្ត​ម្ចាស់​ផ្ទះ​ ២​ គ្រឿង ហើយ​បើក​យក​សព​ទៅ​បោះ​ចោល​នៅ​ជ្រោះ​ពេជ្រ​និល។

លោក រ័ត្ន ស្រ៊ាង បន្ថែម​ថា​ គម្រោង​របស់​មេ​ខ្លោង ក្រោយពេល​ប្លន់​បាន​សម្រេច គឺ​នឹង​ទិញ​រថយន្ត​ម៉ាក​ឡិចស៊ីស (Lexus LX​570 Kuro) មួយ​គ្រឿង រួច​រៀបការ​ផង​ដែរ៕

XS
SM
MD
LG