អតីតជំនួយការសេតវិមានលោកស្រី Cassidy Hutchinson បានប្រាប់សមាជិកសភាអាមេរិកកាលពីថ្ងៃអង្គារថា លោក Donald Trumpប្រធានាធិបតីកាលណោះ កាន់តែខឹងនិងងាយបង្កហេតុអំពីបរាជ័យក្នុងការបោះឆ្នោតឆ្នាំ២០២០។ លោកស្រីផ្តល់សក្ខីកម្មថា លោក Trump បានយល់ព្រមជាមួយពួកកុបកម្មនៅវិមានសភា (Capitol) កាលពីថ្ងៃទី ៦ ខែមករាឆ្នាំមុន នៅពេលដែលពួកគេបានអំពាវនាវឱ្យព្យួរកលោក Mike Pence អនុប្រធានាធិបតីពេលនោះ ព្រោះលោកមិនព្រមរារាំងលទ្ធផលបោះឆ្នោត។
លោកស្រី Hutchinson បាននិយាយថា ខណៈអ្នកគាំទ្រលោកTrump រាប់ពាន់នាក់នៅវិមានសភាស្រែកថា «ព្យួរកលោក Mike Pence!» លោកTrump បានប្រាប់លោក Mark Meadows ប្រធានខុទ្ទកាល័យសេតវិមានដែលជាចៅហ្វាយលោកស្រី ថា «Mikeសមតែអញ្ចឹង» ។ លោកស្រីបានដកស្រង់សម្តីរបស់លោក Meadows ថាលោក Trump«មិនគិតថា ក្រុមអ្នកតវ៉ាប្រឆាំងនឹងលោក Penceបានធ្វើអ្វីខុសទេ»។
អ្នកគាំទ្រលោក Trump បានលើកដែកសម្រាប់ព្យួរកនៅលើសួនច្បារជាតិ (National Mall) ដែលអាចមើលឃើញពីវិមានសភា តែទោះជាយ៉ាងណាកងសន្តិសុខរបស់លោក Pence បានប្រញាប់ប្រញាល់យកលោកទៅកាន់ទីសុវត្ថិភាព ខណៈការគំរាមកំហែងបានផ្ទុះឡើង។ អ្នកបះបោរខ្លះបានចូលមកដល់ចម្ងាយប្រហែល១២ ម៉ែត្រពីលោក Pence។
ក្រោយមក លោក Trump បានសរសេរ tweetថា «លោក Mike Pence មិនមានភាពក្លាហាន» រារាំងមិនឱ្យសភាបញ្ជាក់ថា លោក Joe Biden មកពីគណបក្សប្រជាធិបតេយ្យឈ្នះលោក ក្នុងការបោះឆ្នោតឆ្នាំ ២០២០នោះទេ ។ ប៉ុន្តែទីបំផុតជាងមួយម៉ោងក្រោយមកទើបលោក Trump បានប្រាប់អ្នកគាំទ្ររបស់លោកនៅក្នុងសារជាវីដេអូមួយឱ្យពួកគេចាកចេញពីវិមានសភា បន្ទាប់ពីលោកមិនបានអើពើនឹងការអង្វរពីសមាជិកគ្រួសារ រួមទាំងកូនស្រីរបស់លោកឈ្មោះ Ivanka ជំនួយការសេតវិមាន និងទីប្រឹក្សាផ្សេងទៀតដែលសុំឱ្យលោកប្រកាសជាសាធារណៈឱ្យបញ្ឈប់កុបកម្ម។
លោកស្រីHutchinson ដែលធ្វើការក្នុងការិយាល័យចម្ងាយតែប៉ុន្មានជំហានពីការិយាល័យប្រធានាធិបតីរបស់លោកTrumpនោះ បាននិយាយថា លោកស្រីបានដឹងពីលោកAnthony Ornato ជំនួយការលោក Meadows ដែលទទួលបន្ទុកសម្របសម្រួលព័ត៌មានសន្តិសុខលម្អិតរបស់លោក Trumpថា បន្ទាប់ពីការជួបជុំគ្នានៅជិតសេតវិមាន មុនការធ្វើបាតុកម្មនៅវិមានសភានោះ លោកប្រធានាធិបតីនៅពេលនោះបានព្យាយាមចាប់ចង្កូតឡាន limousine ពីភ្នាក់ងារសេវាសន្តិសុខ(Secret Service) ហើយទាមទារទៅវិមានសភាដើម្បីចូលរួមជាមួយអ្នកគាំទ្ររបស់លោក។
លោក Trump បានប្រាប់អ្នកគាំទ្ររាប់ពាន់នាក់នៅឯការជួបជុំនេះថា លោកនឹងចូលរួមជាមួយពួកគេក្នុងការដើរទៅកាន់វិមានសភា ប៉ុន្តែក្រុមសន្តិសុខរបស់លោកបានកំណត់ថា វាគ្រោះថ្នាក់ខ្លាំងពេក ហើយពួកគេក៏ដឹកលោកត្រឡប់ទៅសេតវិមានវិញ។
លោកស្រីHutchinson បាននិយាយថាលោកស្រីត្រូវបានលោកOrnato ប្រាប់ ថា នៅក្នុងរថយន្ត limousineនោះ លោក Trump «មានអារម្មណ៍ថា... គាត់គិតថាពួកគេនឹងទៅវិមានសភា» ហើយ «ខឹងខ្លាំងណាស់» នៅពេលដែលគាត់ដឹងថាពួកគេមិនទៅ៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានThe Associated Press និង Reuters)
