ក្រុមប្រឹក្សាសភាដែលស៊ើបអង្កេតការវាយប្រហារកាលពីថ្ងៃទី ៦ ខែមករា ឆ្នាំ២០២១ លើវិមានសភាសហរដ្ឋអាមេរិក Capitol នឹងបើកសវនាការដ៏គួរឱ្យភ្ញាក់ផ្អើលមួយនៅថ្ងៃអង្គារនេះ «ដើម្បីបង្ហាញភ័ស្តុតាងដែលទទួលបាននាពេលថ្មីៗនេះ និងស្តាប់សក្ខីកម្មសាក្សី»។
សេចក្តីថ្លែងការណ៍របស់គណៈកម្មាធិការដែលប្រកាសសវនាការនេះមិនបានបង្ហាញអត្តសញ្ញាណសាក្សីឬព័ត៌មានលម្អិតបន្ថែមអំពីភ័ស្តុតាងដែលខ្លួននឹងបង្ហាញនោះទេ។
សវនាការនៅថ្ងៃអង្គារនេះជារឿងគួរឱ្យភ្ញាក់ផ្អើលដោយសារគណៈកម្មាធិការនេះបាននិយាយថា សវនាការបន្ទាប់របស់ខ្លួននឹងធ្វើក្នុងខែកក្កដាដោយផ្តោតលើក្រុមជ្រុលនិយមក្នុងស្រុកដែលបានរំលោភបំពានវិមានសភានិងសកម្មភាពរបស់អតីតប្រធានាធិបតីលោក Donald Trump នៅពេលដែលការវាយប្រហារបានបន្ត។
អ្នកគាំទ្រលោក Trump បានសម្រុកចូលវិមានសភា ខណៈសមាជិកសភាកំពុងប្រជុំដើម្បីបញ្ជាក់ពីជ័យជម្នះរបស់លោក Joe Biden ក្នុងការបោះឆ្នោតកាលពីឆ្នាំ២០២០។
សវនាការមុនៗចំនួន៥លើករបស់គណៈកម្មាធិការនេះបានប្រើវីដេអូនៃការវាយប្រហារ វីដេអូថតការផ្តល់កសិណសាក្សី និងបទសម្ភាសន៍ផ្សាយផ្ទាល់ដើម្បីបង្ហាញពីរបៀបដែលលោក Trump និងសម្ពន្ធមិត្តព្យាយាមដាក់សម្ពាធឱ្យអតីតអនុប្រធានាធិបតីលោក Mike Pence ឱ្យក្រសួងយុត្តិធម៌ និងមន្ត្រីរដ្ឋបដិសេធលទ្ធផលការបោះឆ្នោត៕
ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន The Associated Press និង Reuters
