អតីតអនុប្រធានាធិបតីសហរដ្ឋអាមេរិកលោក Joe Biden ប៉ះទង្គិចពាក្យសម្តីយ៉ាងខ្លាំងជាមួយគូប្រជែងខាងគណបក្សប្រជាធិបតេយ្យផ្សេងទៀតកាលពីយប់ថ្ងៃពុធលើការថែទាំសុខភាព អន្តោប្រវេសន៍ ឧក្រិដ្ឋកម្មនិងពូជសាសន៍នៅពេលដែលគូប្រជែងរបស់លោក បានប៉ុនប៉ងបន្តុះបង្អាប់លោកជាបេក្ខជននាំមុខរបស់គណបក្សប្រជាធិបតេយ្យដើម្បីប្រកួតប្រជែងប្រធានាធិបតី ដូណាល់ ត្រាំ នៅឆ្នាំ២០២០ខាងមុខនេះ។
លោក Biden បានប្រកាសនៅឯពិធីបើកការជជែកដេញដោលយប់ទី២របស់គណបក្សប្រជាធិបតេយ្យនៅលើវេទិកានៅមហោស្រពក្នុងទីក្រុង Detroit ដែលជាទីក្រុងឧស្សាហកម្មរថយន្តនៅក្នុងរដ្ឋ Michigan ថា «ខ្ញុំឈរឈ្មោះជាបេក្ខជនប្រធានាធិបតីដើម្បីស្តារកិត្យានុភាពរបស់ប្រទេសនេះឡើងវិញ»។
នៅពេលភ្លាមៗនោះ លោក Biden និយាយទៀតថា ខ្ញុំគិតថា ផែនការថែទាំសុខភាព ដែលបានស្នើឡើងនៅសប្តាហ៍នេះដោយលោកស្រី Kamala Harris សមាជិកព្រឹទ្ធសភាមកពីរដ្ឋកាលីហ្វ័រញ៉ា មានការប្រចូកច្របល់។ លោកស្រី Harris ដែលបាននៅក្បែលោក Biden បានឆ្លើយតបវិញថា «លោក Biden ប្រហែលច្រឡំ ពីព្រោះលោកមិនបានអានផែនការនោះទេ»។
លោកអតីតអនុប្រធានាធិបតី Joe Biden បានជំទាស់ប្រឆាំងប្រព័ន្ធថែទាំសុខភាពដែលរៀបចំចាត់ចែងដោយរដ្ឋាភិបាលដែលបានទទួលការគាំទ្រដោយលោកស្រី Harris និងគូប្រជែងនាំមុខផ្សេងទៀតរបស់គណបក្សប្រជាធិបតេយ្យ តែផ្ទុយទៅវិញ បានគាំទ្រធ្វើឲ្យប្រសើរឡើងនៅក្នុងច្បាប់ថែទាំសុខភាពដែលគេស្គាល់ថាObamacare ដែលជាប្រព័ន្ធថែទាំសុខភាពរបស់ប្រទេសដែលបានទទួលការអនុម័តនៅឆ្នាំ២០១០ ខណៈដែលលោកធ្វើជាអនុប្រធានាធិបតីរបស់លោក បារ៉ាក់ អូបាម៉ា។
