ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

អតីត​ប្រធាន​ចលនា​យុវជន​គណបក្ស​ជំទាស់ប្រចាំ​​កូរ៉េ​ខាងត្បូង​ថា​ជីវភាព​នយោបាយ​របស់​លោក​អាស្រ័យ​លើ​ពលរដ្ឋ


រូបឯកសារ៖ លោក យឹម ស៊ីណន ប្រធានក្រុមយុវជននៅប្រទេសកូរ៉េខាងត្បូង។ (រូបថតផ្តល់ដោយលោក យឹម ស៊ីណន)

អតីត​ប្រធាន​ចលនាយុវជន​គណបក្ស​សង្គ្រោះ​ជាតិ​ប្រចាំ​ប្រទេស​កូរ៉េ​ខាង​ត្បូង​លោក​យឹម ស៊ីណន​ បាន​ស្នើ​សុំ​ឲ្យ​លោក​នាយករដ្ឋមន្ត្រី​ ហ៊ុន សែន លើក​លែង​ការ​ចោទ​ប្រកាន់​លើ​រូប​លោក​ ពាក់​ព័ន្ធ​នឹង​ផែនការ​វិលចូល​ប្រទេស​មិន​ជោគ​ជ័យ​របស់​មេដឹកនាំ​បក្ស​ជំទាស់​លោក​សម រង្ស៊ី​ កាល​ពី​ថ្ងៃទី​៩ ខែ​វិច្ឆិកា​ ឆ្នាំ​២០១៩។

សំណើ​របស់​លោក​ យឹម ស៊ីណន​ ធ្វើឡើង​ ក្រោយ​តុលាការ​ទម្លាក់​ចោលការ​ចោទ​ប្រកាន់​លើ​អ្នកវិភាគ​នយោ​បាយលោក​ សេង សារី ពី​បទរួមគំនិត​ក្បត់​និង​ញុះញង់​បង្កឲ្យ​មាន​ភាព​វឹកវរ​ធ្ងន់​ធ្ងរ​ដល់​សន្តិសុខ​សង្គម​ចំពោះ​ការ​វិភាគ​របស់​លោក​អំពី​«រដ្ឋាភិបាល​បង្រួប​បង្រួម​ជាតិ​» ដែល​ជា​ការ​ប្រកូក​ប្រកាស​របស់​លោក​សម រង្ស៊ី​កន្លង​មក​នោះ។ ការ​ទម្លាក់​ចោល​ការ​ចោទប្រកាន់​នេះ​ ធ្វើឡើង​ទៅតាម​ការ​អំពាវនាវ​របស់​លោក​នាយករដ្ឋមន្ត្រី​ហ៊ុន​ សែន។

លោក​ យឹម ស៊ីណន​ ប្រាប់​វីអូអេ​កាល​ពី​ថ្ងៃ​ព្រហស្បតិ៍​តាម​ប្រព័ន្ធ​ទំនាក់​ទំនង​សង្គម​មួយក្នុង​ន័យ​ដើម​ថា៖​«ខ្ញុំចង់​រស់​នៅ​ជា​ពលរដ្ឋ​ដែល​មិន​ស្ពាយ​ចោទនូវ​ទោសពៃរ៍​ណាមួយ​ជាប់ខ្លួន​ ដោយ​ខ្លួន​មិន​បាន​ធ្វើ​ខុស។ ហើយ​រឿង​ទៅ​ថ្ងៃ​ក្រោយ​នៃ​ជីវិត​នយោបាយ​ ទុក​ឲ្យ​ពលរដ្ឋ​ និង​ពេល​វេលា​អ្នក​កំណត់​»។

បើ​តាម​លិខិត​របស់​លោក​ យឹម ស៊ីណន​ ធ្វើ​នៅ​ប្រទេស​កូរ៉េខាង​ត្បូងចុះ​ថ្ងៃទី​២៩ ​ខែកញ្ញា​ ឆ្នាំ​២០២១ ​អតីត​ប្រធាន​យុវជន​គណបក្ស​ប្រឆាំង​រូប​នេះ បាន​សារភាព​ប្រាប់​លោក​ ហ៊ុន សែន​ថា​ក្នុងនាម​អតីត​ប្រធាន​ចលនា​យុវជន​នៃគណបក្ស​សង្គ្រោះ​ជាតិ​ប្រចាំនៅ​ប្រទេស​កូរ៉ខាង​ត្បូង​ លោកធ្លាប់​ដឹកនាំ​ការ​ធ្វើ​បាតុកម្ម​ តស៊ូមតិ​អហិង្សា​ ដោយ​អនុវត្ត​តាម​គោលការណ៍​ និង​លក្ខន្តិកៈ​គណបក្ស​សង្គ្រោះជាតិ​ស្រប​តាម​រដ្ឋធម្មនុញ្ញ​កម្ពុជា​ ក៏ដូច​ជា​គោលការណ៍​ប្រជាធិបតេយ្យ​ និង​សិទ្ធិមនុស្ស​ជាសាកល។

ប៉ុន្តែ​ជាអកុសល​ ចលនា​ធ្វើ​មាតុភូមិនិវត្តន៍​៩ វិច្ឆិកា បាន​បង្កឲ្យ​មានការ​ជេរប្រមាថ​ព្រះមហាក្សត្រ​ និង​បំផុស​ឲ្យ​មានការ​បះបោរ​ពី​សំណាក់​មហាជន​ និង​កងកម្លាំង​ប្រដាប់​អាវុធប្រឆាំង​នឹង​រដ្ឋាភិបាល​ ហើយ​ដែល​ការណ៍​នេះធ្វើ​ឲ្យ​លោក​និង​សហការី​៩នាក់​ទៀត​ ត្រូវបាន​បក្ខពួក​ជ្រុល​និយម​ក្នុងបក្ស​មួយចំនួន​នៃ​គណបក្ស​ជំទាស់​វាយប្រហារ​ លាប​ពណ៌​មួល​បង្កាច់​គ្រប់​រូបភាព​ដល់​យើង​ខ្ញុំ។

លោក​ថ្លែង​ក្នុងន័យ​ដើមថា៖​ «នេះ​ជារឿង​អយុត្តិធម៌​ ហើយ​ជា​អកុសល​មួយ​ទៀតនោះ​ គឺ​យុទ្ធនាការ​ខាង​លើនេះ​ បាន​ធ្វើ​ឲ្យ​មានការ​យល់​ច្រឡំ​ពីសំណាក់​អាជ្ញាធរ​កម្ពុជា​ រហូត​ដល់​មាន​ការ​ចោទ​ប្រកាន់​ដល់​ពួក​យើង​ខ្ញុំ​ថា​ បាន​ចូលរួម​សកម្មភាព​មាតុភូមិ​និវត្តន៍​៩វិច្ឆិកា​២០១៩​នោះ​ទៅវិញ​ ហើយ​ថែម​ទាំង​មានដីកា​ចាប់​ខ្លួន​ពី​ស្ថាប័ន​តុលាការ​ទៀតផង»៕

XS
SM
MD
LG