ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

​អតីតប្រធានាធិបតី​ប្រទេស​ប្រស៊ីល​និយាយ​ថា ​លោក​នឹង​ប្រគល់ខ្លួន​ឲ្យ​អាជ្ញាធរ


អតីត​ប្រធានាធិបតី​ប្រេស៊ីល Luiz Inacio Lula da Silva លើក​ដៃ​ទៅ​កាន់​អ្នក​គាំទ្រ​ចេញ​ពី​បង្អួចនៃ​អាគារ​សហជីព​កម្មករ​ដែក​ថែប នៅ​ទីក្រុង Sao Bernardo do Campo ប្រទេស​ប្រេស៊ីល កាល​ពី​ថ្ងៃ​សៅរ៍​ទី​៧ មេសា ២៩១៨។

លោក​ Luiz Inacio Lula da Silva ​អតីតប្រធានាធិបតី​ប្រទេស​ប្រេស៊ីល​ ដែល​ត្រូវ​កាត់​ទោស​ជាប់​ពន្ធនាគារ​ បាន​និយាយ​កាល​ពី​ថ្ងៃ​សៅរ៍​ថា ​លោក​នឹង​ប្រគល់​ខ្លួន​ឲ្យអាជ្ញាធរ។ លោក​ប្រកាស​ដូច្នេះ​មួយ​ថ្ងៃ​ក្រោយ​ពី​មាន​ការ​ប្រឈម​មុខ​ជា​មួយ​ប៉ូលិស​ដែល​មាន​ភារកិច្ច​ចាប់​ខ្លួន​លោក។​

នៅ​ក្នុង​សុន្ទរកថា​ជា​លើក​ដំបូង​របស់​លោក​ចាប់​តាំង​មាន​ដីកា​ចាប់​ខ្លួន​ចេញ​កាល​ពីថ្ងៃ​ព្រហស្បតិ៍ ​លោក ​da Silva បាន​ប្រាប់​ក្រុម​អ្នកគាំ​ទ្រ​ថា ​លោក​គ្មាន​ទោស​ពៃរ៍​ទេ ​ហើយ​ថា ​លោក​ជាគោល​ដៅ​វាយ​ប្រហារ​ដែល​មាន​បំណង​រារាំង​មិន​ឱ្យ​លោក​ឈរ​ឈ្មោះ​ធ្វើ​ជា​ប្រធានាធិបតី​ម្តង​ទៀត​នៅ​ក្នុង​ខែតុលា។​ លោក​មិន​បាន​និយាយ​ថា ពេល​ណា​ ឬ​កន្លែង​ណា​ដែល​គាត់​នឹង​ប្រគល់​ខ្លួន​នោះ​ទេ ​ប៉ុន្តែ​ក្រុម​មេដឹកនាំ​គណបក្ស​ពលករ​របស់​លោក​បាន​លើក​ឡើងថា​ លោក​ប្រគល់​ខ្លួន​នៅ​ថ្ងៃសៅរ៍។​

លោក ​da Silva ​ត្រូវ​ជាប់​ពន្ធនាគារ​ចំនួន​១២​ឆ្នាំ ​ចាប់​ពីថ្ងៃ​សុក្រ​តាម​ការផ្តន្ទាទោស​ពីបទ​ស៊ី​សំណូក ​ប៉ុន្តែ​លោក​បាន​ទៅ​អគារ​សហជីព​ដែក​ថែប​នៅ​ជាយក្រុង​ Sao Paulo ​ដែល​កាល​ពី​ច្រើន​ឆ្នាំមុន​លោក​បាន​ចាប់​ផ្តើម​អាជីព​ជាមេដឹកនាំ​ពលករ។ នៅ​ពេល​ដែល​អតីត​ប្រធានាធិបតី​ឆ្វេង​និយម​រូប​នេះ​ចូល​ក្នុង​អគារ ​លោក​ត្រូវ​បានអ្នកគាំទ្រ​រាប់ពាន់​នាក់​និង​សមាជិក​នៃ​គណបក្ស​ពលករ​របស់​លោក​ដែល​ពាក់​អាវ​ក្រហម​និង​គ្រវីទង់​ក្រហម​រោម​ជុំវិញ។​ ហ្វូង​បាតុករ​បាន​រារាំង​មិនឱ្យ​ប៉ូលិស​ចាប់ខ្លួន​លោក​ទេ៕

XS
SM
MD
LG