សេចក្តីថ្លែងការណ៍របស់អ្នកនាំពាក្យនៃក្រសួងការបរទេសដែលបានចេញផ្សាយកាលពីថ្ងៃសៅរ៍បានបន្តដោយសុំកុំឱ្យបរទេសលូកដៃចូលក្នុងកិច្ចការផ្ទៃក្នុងនិងគោរពអធិបតេយ្យភាពរបស់កម្ពុជាហើយទុកឱ្យកម្ពុជាពង្រឹងលទ្ធិប្រជាធិបតេយ្យនិងលើកកម្ពស់សិទ្ធិមនុស្សដោយខ្លួនឯង។
នៅក្នុងសារជាបន្តបន្ទាប់ដែលបង្ហោះតាមបណ្តាញសង្គមក្នុងពេលថ្មីៗនេះលោកសម រង្ស៊ីបានស្នើឱ្យពលរដ្ឋនិងកងកម្លាំងប្រដាប់អាវុធចូលរួមធ្វើសកម្មភាពដែលលោកហៅថា «ការផ្លាស់ប្តូរជាវិជ្ជមាន» ក្នុងឆ្នាំ២០១៩នេះហើយក៏បានស្នើសុំឱ្យសហគមន៍អន្តរជាតិចាត់ទុករបបរបស់លោកនាយករដ្ឋមន្ត្រីហ៊ុន សែនដូចគ្នាទៅនឹងរបបរបស់លោកប្រធានាធិបតីនីកូឡាស ម៉ាឌុយរ៉ូនៃប្រទេសវ៉េណេស៊ុយអេឡាដែលពេលនេះកំពុងតែមានវិបត្តិនយោបាយយ៉ាងខ្លាំង។
ក្រសួងការបរទេសកម្ពុជាចាត់ទុកថាសេចក្តីថ្លែងការណ៍នានារបស់លោកសម រង្ស៊ីគឺជាការមើលស្រាលដល់ពលរដ្ឋកម្ពុជានិងគណបក្សនយោបាយចំនួន១៩ផ្សេងទៀតដែលបានចូលរួមបោះឆ្នោតកាលពីខែកក្កដាឆ្នាំមុនហើយដែលបាននាំឱ្យគណបក្សប្រជាជនកម្ពុជាឈ្នះយកអាសនៈសភាទាំង១២៥។
សេចក្តីថ្លែងការណ៍របស់ក្រសួងការបរទេសបានបន្ថែមថា៖
«រាជរដ្ឋាភិបាលនឹងប្រឆាំងទប់ស្កាត់តាមគ្រប់មធ្យោបាយ ចំពោះរាល់ការប៉ុនប៉ងនានានិងការធ្វើអន្តរាគមន៍ពីភាគីទី៣ក្នុងការបង្កអស្ថិរភាពនិងបំផ្លិចបំផ្លាញមាតុភូមិកម្ពុជាក៏ដូចជាសុភមង្គលរបស់ប្រជាជនយើង។ យើងនឹងការពារប្រជាជាតិយើងប្រឆាំងទល់នឹងកលល្បិចទាំងនេះទោះក្នុងតម្លៃណាក៏ដោយ»។
ការិយាល័យអ្នកនាំពាក្យរដ្ឋាភិបាលកម្ពុជាក៏បានចាត់ទុកការអំពាវនាវរបស់លោកសម រង្ស៊ីថាជា«អំពើភេរវកម្មនយោបាយ»។
នៅក្នុងសារចុងក្រោយនៅថ្ងៃសៅរ៍ដែរលោកសម រង្ស៊ីបានបន្តអំពាវនាវជាថ្មីឱ្យពលរដ្ឋទាមទារយកដីធ្លី គឺស្រែ ចំការ និងផ្ទះសម្បែងពីអាជ្ញាធរនិងឈ្មួញក៏ដូចជាទាមទារឱ្យរដ្ឋាភិបាលកម្ពុជាលុបចោលដីសម្បទានសេដ្ឋកិច្ចនិងបំណុលពលរដ្ឋផងដែរ។
លោកសម រង្ស៊ីដែលពេលនេះកំពុងរស់នៅនិរទេសខ្លួនក្រៅប្រទេសបានប្រកាសម្តងហើយម្តងទៀតថាលោកនឹងវិលចូលប្រទេសកម្ពុជាវិញនៅឆ្នាំ២០១៩នេះដើម្បីដឹកនាំចលនាទាមទារឱ្យមានការផ្លាស់ប្តូរក៏ដូចជារៀបចំការបោះឆ្នោតជាតិឡើងវិញ។
លោកបានបន្ថែមថា៖
«រដ្ឋាភិបាលថ្មី ដឹកនាំដោយគណបក្សសង្គ្រោះជាតិ នឹងរឹបអូសទ្រព្យសម្បត្តិ ពីក្រុមគ្រួសារ ហ៊ុន សែន និងបរិវារ ដែលបានលួចប្លន់ទ្រព្យសម្បត្តិរាស្ត្រ និងទ្រព្យសម្បត្តិជាតិ ហើយយកទ្រព្យសម្បត្តិដែលប្រមូលបានទាំងនោះ មកសងបំណុលជំនួសប្រជារាស្ត្រ និងរៀបចំប្រព័ន្ធសង្គមកិច្ចថ្មីមួយ មានទ្រង់ទ្រាយធំ និងលក្ខណៈទំនើប ដើម្បីលើកស្ទួយជីវភាពប្រជារាស្ត្រទូទៅ និងរួមចំណែករៀបចំសង្គមជាតិថ្មីមួយ ដែលមានលក្ខណៈស្អាតស្អំ ជឿនលឿន និងយុត្តិធម៌»៕
