ស្ថានភាពទឹកជំនន់ស្ទឹងព្រែកត្នោតនៅភាគខាងលិចនិងខាងត្បូងរាជធានីភ្នំពេញនិងក្នុងខេត្តកណ្តាល បានឈានដល់កម្រិតប្រកាសអាសន្នកាលពីយប់ថ្ងៃអង្គារ ដោយធ្វើឲ្យជន់លិចផ្នែកជាច្រើននៃទីក្រុងនិងខេត្តនេះដែលនៅតាមបណ្តោយស្ទឹង។ នេះបើយោងតាម ក្រសួងធនធានទឹកនិងឧតុនិយម និងរបាយការណ៍ព័ត៌មានក្នុងស្រុកដែលបានរាយការណ៍នៅយប់ថ្ងៃទី១៣ខែតុលាឆ្នាំ២០២០។
ក្រសួងធនធានទឹក និងឧតុនិយម បានបង្ហោះសារតាមទំព័រហ្វេសប៊ុករបស់ខ្លួនថា បរិមាណទឹកហូរខ្លាំងមកពីផ្នែកខាងលើចូលក្នុងស្ទឹងព្រែកត្នោតបន្ថែម គួបផ្សំនឹងភ្លៀងធ្លាក់ខ្លាំងលើសពីកម្រិត៧២,៨០ មីលីម៉ែត្រ ត្រឹមម៉ោង ១៨:៤០នាទីយប់ ដោយបណ្តាលឲ្យកម្ពស់ទឹកនៅទំនប់អាងទឹក៧មករាឡើងខ្ពស់ជាងកម្ពស់អតិបរមាកាលពីឆ្នាំ២០១៨ទៅទៀត។
ទូរទស្សន៍ជាតិកម្ពុជាបានរាយការណ៍ថា ដោយសារស្ថានភាពជំនន់ទឹកភ្លៀងនេះ រដ្ឋាភិបាលកម្ពុជា បានប្រកាសផ្អាកជាបណ្តោះអាសន្ននូវការធ្វើចរាចរណ៍ផ្លូវជាតិលេខ៣ ចាប់ពីយប់ថ្ងៃទី១៣ ខែតុលា ឆ្នាំ២០២០តទៅ។
គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា គិតត្រឹមរសៀលថ្ងៃអង្គារ អ្នកស្លាប់ដោយសារគ្រោះទឹកជំនន់ឆ្នាំនេះមានចំនួន១១ នាក់និងពលរដ្ឋយ៉ាងហោច ៣ ម៉ឺនគ្រួសារ រងផលប៉ះពាល់ពីជំនន់លើកនេះ ក្នុងនោះមាន ២ ពាន់គ្រួសារ ត្រូវជម្លៀសចេញពីគេហដ្ឋានតែម្ដង៕
