សមាជិកគណបក្សសង្គ្រោះជាតិចំនួន៥នាក់ ក្នុងខេត្តបាត់ដំបង ត្រូវបានផាកពិន័យក្នុងម្នាក់ចំនួន១០លានរៀល ដោយរងការចោទថាបានបង្ហោះសារម្រាមដៃស្អាតមិនទៅបោះឆ្នោត ដោយក្នុងនោះម្នាក់ជាអតីតប្រធានប្រតិបត្តិគណបក្សសង្គ្រោះជាតិខេត្តបាត់ដំបង ដែលកំពុងស្ថិតក្នុងការព្យួរសិទ្ធិនយោបាយចំនួន៥ឆ្នាំ។
លោក វន ពន ប្រធានគណៈកម្មការរៀបចំការបោះឆ្នោតខេត្តបាត់ដំបងប្រាប់ VOA នារសៀលថ្ងៃព្រហស្បតិ៍នេះថា អតីតសមាជិកគណបក្សសង្គ្រោះជាតិចំនួន៥រូប ត្រូវបានសមាជិកគណបក្សកាន់អំណាចក្នុងខេត្តបាត់ដំបងប្តឹងពាក់ព័ន្ធនឹងការបង្ហោះសារបង្ហាញពីការមិនទៅបោះឆ្នោត។ លោកបន្ថែមថាអ្នកទាំង៥នោះត្រូវបានគណៈកម្មការរៀបចំការបោះឆ្នោតខេត្តបាត់ដំបងបើកសវនាការនៅថ្ងៃព្រហស្បតិ៍នេះ ដោយសម្រេចឲ្យអ្នកទាំង៥បង់ពិន័យម្នាក់ៗចំនួន១០លានរៀល ទៅតាមមាត្រា១៤២ នៃច្បាប់ស្តីពីការបោះឆ្នោតជ្រើសតាំងតំណាងរាស្រ្តអាណត្តិទី៦។
លោកមានប្រសាសន៍ថា៖
«ចង្អុលដៃអីហ្នឹងគឺថាវាជាន័យមួយសម្រាប់មិនឲ្យគេទៅបោះឆ្នោត។ បើគាត់មិនបង់វាអនុលោមទៅតាមច្បាប់ តើច្បាប់គេកំណត់យ៉ាងម៉េចអីយ៉ាងម៉េច ទៅតាមច្បាប់។ ទី១ គេធ្វើយ៉ាងម៉េច ទី២ គេអនុវត្តវិធានការរដ្ឋបាលអីអញ្ចឹង»។
សមាជិកគណបក្សសង្គ្រោះជាតិដែលជាគណបក្សត្រូវបានតុលាការកំពូលរំលាយទាំង៥រូប ដែលរងពិន័យរួមមាន លោក ជា ជីវ ជាអតីតប្រធានប្រតិបត្តិរបស់គណបក្សសង្រ្គោះជាតិប្រចាំខេត្តបាត់ដំបង និងសមាជិកបួនរូបផ្សេងទៀតគឺលោក ថោង សារឿន លោក ពៅ តាំង លោក គ្រុយ គឹមសាំង និង លោក ម៉ាំង ឈុន។
លោក វន ពន បន្ថែមថាអ្នកទាំង៥នឹងត្រូវតម្រូវឲ្យបង់ពិន័យនេះក្រោយការបញ្ចប់បណ្តឹងតវ៉ាចប់សព្វគ្រប់ ប៉ុន្តែលោកមិនបានបញ្ជាក់ពីវិធានការលម្អិតក្នុងករណីដែលអ្នកទាំង៥មិនអនុវត្តតាមនោះទេ។ ចំណែកលោក ជា ជីវ ដែលជាបុគ្គលស្ថិតក្នុងការព្យួរសិទ្ធិមិនឲ្យធ្វើនយោបាយមួយរូប នឹងត្រូវរងវិធានការផ្សេងទៀត ដែលលោក វន ពន អះអាងថា ករណីនេះគឺផុតពីសមត្ថកិច្ចរបស់គណៈកម្មការរៀបចំការបោះឆ្នោត។
មាត្រា១៤២នៃច្បាប់ស្តីពីការបោះឆ្នោតជ្រើសតាំងតំណាងរាស្រ្តចែងថា ត្រូវផាកពិន័យជាប្រាក់ពី ៥,០០០,០០០ (ប្រាំលានរៀល) ទៅ ២០,០០០,០០០ (ម្ភៃលានរៀល) ដោយ គ.ជ.ប. ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិតដូចជា រារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត ធ្វើឲ្យមានការភាន់ច្រឡំនាំឲ្យបាត់ទំនុកចិត្តលើការបោះឆ្នោតនិងបង្កការរំខានមិនឲ្យដំណើរការបោះឆ្នោតបាន។
ការបោះឆ្នោតជ្រើសតាំងតំណាងរាស្រ្តអាណត្តិទី០៦នឹងត្រូវធ្វើឡើងនាថ្ងៃអាទិត្យនេះ ដោយគ្មានការចូលរួមពីគណបក្សសង្គ្រោះជាតិដែលជាគណបក្សត្រូវបានតុលាការកំពូលរំលាយកាលពីខែវិច្ឆិកា ឆ្នាំ២០១៧ ដោយរងការចោទថាគណបក្សនេះបានឃុតឃិតជាមួយបរទេស រៀបចំគម្រោងផ្តួលរំលំរដ្ឋាភិបាលរបស់លោកនាយករដ្ឋមន្រ្តី ហ៊ុន សែន។ ក្រោយការរំលាយ គេឃើញថ្នាក់ដឹកនាំគណបក្សនេះដែលភាគច្រើនកំពុងភៀសខ្លួននៅក្រៅប្រទេសបានអំពាវនាវឲ្យប្រជាពលរដ្ឋធ្វើពហិការ កុំទៅបោះឆ្នោត ដោយថាការបោះឆ្នោតនេះជាការបោះឆ្នោតក្លែងក្លាយ។
ខណៈការអំពាវនាវនិងការបង្ហោះសារផ្សេងៗដោយមានទាំងការថតម្រាមដៃមិនមានប្រឡាក់ទឹកខ្មៅបង្ហាញពីការមិនទៅបោះឆ្នោតបាននិងកំពុងធ្វើឡើងជារៀងរាល់ថ្ងៃនោះ គេឃើញថា មន្រ្តីរដ្ឋាភិបាលកម្ពុជានិងគណៈកម្មាធិការជាតិរៀបចំការបោះឆ្នោត (គ.ជ.ប) ដែលលែងមានសមាជិកមកពីគណបក្សប្រឆាំងបានលើកឡើងថា ការបង្ហោះសារទាំងនោះ ជាសកម្មភាពខុសនឹងច្បាប់។ ពួកគេក៏បានប្រកាសចាត់វិធានការផ្សេងៗទៅលើការអំពាវនាវនិងការបង្ហោះសារទាំងនោះ ដោយមានទាំងការពិន័យជាប្រាក់និងការចាប់ដាក់ពន្ធនាគារជាដើម។
VOA មិនអាចទាក់ទងសមាជិកទាំង៥រូបរបស់គណបក្សសង្គ្រោះជាតិបានទេ នៅថ្ងៃព្រហស្បតិ៍នេះ។
យ៉ាងណាក៏ដោយ ក្រុមអ្នកឃ្លាំមើលសង្គមនិងអ្នកច្បាប់សុទ្ធតែបានលើកឡើងថាការអំពាវនាវមិនឲ្យពលរដ្ឋទៅបោះឆ្នោតនិងការថតម្រាមដៃបង្ហោះដោយខ្លួនឯង មិនមែនជាបទល្មើសដែលមានចែងក្នុងច្បាប់នោះទេ។ ក្រុមអ្នកឃ្លាំមើលសង្គមទាំងនោះក៏បានលើកឡើងថា ការអំពាវនាវ និងការបង្ហោះជាសារទាំងនោះ គ្រាន់តែជាការបញ្ចេញមតិ មិនមែនជាការគំរាមកំហែងនិងមិនមែនជាការបង្ខិតបង្ខំណាមួយឡើយ។
ក្នុងពេលថ្មីៗនេះ អង្គការអន្តរជាតិពាក់ព័ន្ធនឹងសិទ្ធិមនុស្សមួយចំនួនដែលរួមមានសមាជិកសភាអាស៊ានដើម្បីសិទ្ធិមនុស្សជាដើម បានជំទាស់ទៅនឹងការបោះឆ្នោតថ្នាក់ជាតិនៅក្នុងប្រទេសកម្ពុជាដែលនឹងត្រូវធ្វើឡើងនាថ្ងៃអាទិត្យនេះ ថាជាការបោះឆ្នោតដ៏ «គួរឲ្យខ្ពើម» និង «គួរឲ្យអៀនខ្មាស» ដោយពួកគេលើកឡើងថា កម្ពុជាមិនបានផ្តល់ឲ្យមាននូវការបោះឆ្នោតដោយសេរី ត្រឹមត្រូវ និងយុត្តិធម៌៕
