អតីតមន្រ្តីគណបក្សសង្រ្គោះជាតិចំនួន៣នាក់នៅក្នុងខេត្តបាត់ដំបង ត្រូវបានមន្រ្តីគណបក្សប្រជាជនកម្ពុជាប្តឹងទៅកាន់ គណៈកម្មការរៀបចំការបោះឆ្នោតប្រចាំខេត្តមួយនេះ កាលពីថ្ងៃសុក្រ ពាក់ព័ន្ធនឹងយុទ្ធនាការម្រាមដៃស្អាត តាមរយៈសារដែលពួកគេបង្ហោះតាមបណ្តាញសង្គមហ្វេសប៊ុក។
កន្លងទៅ អាជ្ញាធរកម្ពុជាបានព្រមានចាត់វិធានការផ្លូវច្បាប់ ប្រឆាំងនឹងអ្នកណាដែលអំពាវនាវកុំឲ្យប្រជាពលរដ្ឋទៅបោះឆ្នោត។ អតីតមេដឹកនាំគណបក្សប្រឆាំង លោក សម រង្ស៊ី ក៏បានអំពាវនាវកុំឲ្យប្រជាពលរដ្ឋទៅបោះឆ្នោតផងដែរ តាមរយៈយុទ្ធនាការម្រាមដៃស្អាត។
យោងតាមពាក្យបណ្តឹងចុះថ្ងៃទី២០ ខែកក្កដា ដាក់ទៅកាន់ គ.ជ.ប. លោក ជា ជីវ អតីតប្រធានប្រតិបត្តិខេត្តបាត់ដំបងរបស់គណបក្សសង្រ្គោះជាតិ ត្រូវបានប្តឹងដោយ លោក ពីវ ហូយ ជំទប់ទី២ មកពីគណបក្សប្រជាជនកម្ពុជា ក្នុងឃុំអន្លង់វិល ស្រុកសង្កែ ពីបទរារាំងពលរដ្ឋមិនឲ្យទៅបោះឆ្នោត។
ពាក្យបណ្តឹងបញ្ជាក់ថា កាលពីថ្ងៃទី១៩ ខែកក្កដា លោក ជា ជីវ និងអតីតមន្រ្តីគណបក្សសង្រ្គោះជាតិប្រមាណ៣០នាក់ បានជួបជុំគ្នាហូបនំបញ្ចុកនៅផ្ទះរបស់លោក ក្នុងឃុំអន្លង់វិល ស្រុកសង្កែ ខេត្តបាត់ដំបង ហើយបានធ្វើយុទ្ធនាការម្រាមដៃស្អាត និងបានថតរូបជុំគ្នាលើកម្រាមដៃសស្អាត ដែលត្រូវជានិម្មិតរូបនៃការធ្វើពហិការការបោះឆ្នោត ដែលក្រោយមករូបនោះត្រូវបានពួកគេបង្ហោះលើបណ្ដាញសង្គមហ្វេសប៊ុក។
គួររំឭកផងដែរថា លោក ជា ជីវ ស្ថិតក្នុងចំណោមអ្នកនយោបាយគណបក្សសង្គ្រោះជាតិ១១៨រូប ដែលត្រូវបានកាត់សិទ្ធិធ្វើនយោបាយចំនួន៥ឆ្នាំ ក្រោយគណបក្សសង្រ្គោះជាតិត្រូវបានតុលាការកំពូលរំលាយទាំងចម្រូងចម្រាសកាលពីខែវិច្ឆិកា ឆ្នាំ២០១៧។
ចំណែកនៅក្នុងពាក្យបណ្តឹងពីរដោយឡែកផ្សេងទៀត មន្រ្តីគណបក្សសង្រ្គោះជាតិពីរនាក់ទៀត គឺលោក ពៅ តាំង និងលោក គ្រុយ គឹមសាំង ដែលជាអតីតសមាជិកក្រុមប្រឹក្សាស្រុកកំរៀង ក៏ត្រូវបានប្តឹងផងដែរ ដោយជំទប់ទី២នៃឃុំបឹងរាំង មកពីគណបក្សប្រជាជនកម្ពុជា។
មន្រ្តីគណបក្សប្រជាជនកម្ពុជា លោក ពីវ ហូយ បានថ្លែងប្រាប់VOAថា លោកបានប្តឹងលោក ជា ជីវ ដោយលោកយល់ថា សកម្មភាពរបស់ពួកគេជា«ការញុះញង់»។
លោកមានប្រសាសន៍ថា៖ «អាហ្នឹងមកពីចង្អុលដៃហ្នឹង យុទ្ធនាការម្រាមដៃស្អាត លើកម្រាមដៃទាំងអស់គ្នា គ្នាម្ភៃសាមសិបនាក់ហ្នឹង។ អាហ្នឹងវាដូចរឿងញុះញង់អញ្ចឹងណា ពីព្រោះអាហ្នឹងមេគេបញ្ជាមក អាយុទ្ធនាការម្រាមដៃស្អាត។ សួរថាបើប្រជាជនទូទៅ ខ្ញុំមានថាអី។ គណបក្សសង្រ្គោះជាតិគេបានរំលាយចោលហើយ ដល់មេគេបញ្ជាអារឿងម្រាមដៃស្អាតហ្នឹង បានខ្ញុំប្តឹងកន្លែងហ្នឹង»។
ពួកគេទាំង៣នាក់ត្រូវបានប្តឹងតាមមាត្រា១៤២នៃច្បាប់ស្តីពីការបោះឆ្នោតជ្រើសតាំងតំណាងរាស្រ្ត ដែលចែងត្រង់ចំណុចមួយថា ត្រូវផាកពិន័យជាប្រាក់ពី៥លានរៀលដល់២០លានរៀល ដោយគណៈកម្មាធិការជាតិរៀបចំការបោះឆ្នោត ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិតក្នុងការរារាំងប្រជាពលរដ្ឋដែលមានសិទ្ធិទៅបោះឆ្នោតមិនឲ្យទៅបោះឆ្នោត។
លោក ជា ជីវ បានចាត់ទុកថានេះជាសេរីភាពនៃការបញ្ចេញមតិរបស់លោក។ លោកមានប្រសាសន៍ថា៖ «សកម្មភាពហ្នឹងគឺជាការបំភិតបំភ័យ និងគំរាមកំហែងសេរីភាពដែលមានចែងក្នុងរដ្ឋធម្មនុញ្ញ។ ហ្នឹងគឺជាការរារាំងមិនឲ្យខ្ញុំ និងអតីតសហការីរបស់ខ្ញុំហ្នឹង គាត់ធ្វើសកម្មភាពពាក់ព័ន្ធទៅនឹងការមានឆន្ទៈក្នុងការមិនទៅបោះឆ្នោត ប្រសិនបើអត់មានវត្តមានរបស់គណបក្សសង្រ្គោះជាតិ»។
អតីតមន្រ្តីគណបក្សសង្រ្គោះជាតិ លោក ពៅ តាំង អាយុ៤២ឆ្នាំ មានប្រសាសន៍ថា សារដែលលោកបង្ហោះគឺជាការបញ្ចេញមតិរបស់លោកផ្ទាល់ ហើយលោកក៏មិនបានអំពាវនាវដល់ប្រជាពលរដ្ឋកុំឲ្យទៅបោះឆ្នោតដែរ។
លោកមានប្រសាសន៍ថា៖ «ខ្ញុំគ្រាន់តែសរសេរថាសិទ្ធិសេរី រួចហើយសេចក្តីថ្លៃថ្នូរ ឆន្ទៈ សេចក្តីស្នេហា ការស្រឡាញ់។ ទាំងអស់នេះ គឺជាសញ្ញាបញ្ជាក់នូវការរស់នៅរបស់មនុស្សក្នុងសង្គមជាតិ។ ខ្ញុំចិត្តស្អាត រូបខ្ញុំមិនស្អាត ក៏ប៉ុន្តែម្រាមដៃខ្ញុំស្អាត ខ្ញុំគ្រាន់តែសរសេរតែប៉ុណ្ណឹងទេ»។ លោកចាត់ទុកថានេះគ្រាន់តែជាការគំរាមកំហែងដល់រូបលោក និងអ្នកផ្សេងទៀតតែប៉ុណ្ណោះ។
ចំណែកលោក គ្រុយ គឹមសាំង ដែលរងពាក្យបណ្តឹងនោះដែរ មានប្រសាសន៍ថា លោកមិនបានញុះញង់ ដូចការចោទប្រកាន់នោះទេ។ លោកមានប្រសាសន៍ថា៖ «បង្ហោះហ្វេសប៊ុកហ្នឹង ខ្ញុំដាក់ចំណងជើងថាម្រាមដៃខ្ញុំស្អាត បើគ្មានគណបក្សសង្រ្គោះជាតិ។ ហើយគាត់ប្តឹងហ្នឹង ប្តឹងចោទប្រកាន់ថាខ្ញុំញុះញង់ប្រជាពលរដ្ឋមិនឲ្យទៅបោះឆ្នោត។ ខ្ញុំអត់មានបានញុះញង់ទេ សិទ្ធិខ្ញុំ បុគ្គលខ្ញុំ។ ខ្ញុំចេញខ្លួនឯងអញ្ចឹងណា»។
ខណៈមន្រ្តីគណបក្សកាន់អំណាចកំពុងធ្វើយុទ្ធនាការឃោសនាបោះឆ្នោត ហើយអំពាវនាវឲ្យប្រជាពលរដ្ឋទៅបោះឆ្នោត មន្រ្តីគណបក្សសង្រ្គោះជាតិបានអំពាវនាវកុំឲ្យប្រជាពលរដ្ឋចេញទៅបោះឆ្នោត។ គណបក្សសង្រ្គោះជាតិធ្លាប់បានទទួលការគាំទ្រពីប្រជាពលរដ្ឋប្រមាណ៤៤ភាគរយនៅក្នុងការបោះឆ្នោតឃុំសង្កាត់ កាលពីខែមិថុនា ឆ្នាំ២០១៧។
អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប.) លោក ហង្ស ពុទ្ធា មានប្រសាសន៍ថាមន្រ្តីបោះឆ្នោតនៅថ្នាក់ក្រោមជាតិ នឹងព្យាយាមដោះស្រាយបញ្ហានេះ។ ប៉ុន្តែប្រសិនបើដោះស្រាយមិនចេញ ពាក្យបណ្តឹងនេះ នឹងត្រូវបញ្ជូនមក គ.ជ.ប.។
លោកមានប្រសាសន៍ថា៖ «ប្រសិនជាច្បាប់រកឃើញថា គាត់មានចេតនាប្រមូលគេប្រមូលឯងមិនឲ្យទៅបោះឆ្នោត អាហ្នឹងហើយជាបញ្ហា»។
ចំណែកលោក សម រង្ស៊ី ក៏បានអំពាវនាវកុំឲ្យប្រជាពលរដ្ឋទៅបោះឆ្នោតផងដែរ។ នៅក្នុងវីដេអូមួយដែលបង្ហោះលើហ្វេសប៊ុករបស់លោកកាលពីពេលថ្មីៗនេះ លោកបានថ្លែងថា៖ «បើបងប្អូនអញ្ជើញទៅបោះឆ្នោត មានន័យថាប្រទេសកម្ពុជានឹងរលាយសាបសូន្យហើយ ពីព្រោះការបោះឆ្នោតក្លែងក្លាយនេះ គឺគ្រាន់តែដើម្បីឲ្យ លោក ហ៊ុន សែន បន្តកាន់អំណាចតទៀត»។
កាលពីថ្ងៃសុក្រ នៅលើទំព័រហ្វេសប៊ុករបស់ឧត្តមស្នងការនៃអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នករាយការណ៍ពិសេសរបស់អង្គការសហប្រជាជាតិ អ្នកស្រី Rhona Smith បានអំពាវនាវដល់រដ្ឋាភិបាល ឲ្យថ្កោលទោសចំពោះការបំភិតបំភ័យដល់អ្នកមិនទៅបោះឆ្នោត និងធានាឲ្យបាននូវសិទ្ធិសេរីភាពបញ្ចេញមតិរបស់ជនគ្រប់រូប៕
