អ្នកចិញ្ចឹមត្រីប្រា និងត្រីពោក្នុងខេត្តព្រៃវែងបង្ហាញក្តីសង្ឃឹមថា តម្លៃត្រីនឹងកើនឡើងជាងពេលបច្ចុប្បន្ននេះ ក្រោយរដ្ឋាភិបាលប្រកាសផ្អាកការនាំចូលត្រីដែលកសិករក្នុងស្រុកអាចផលិតបាន ជាពិសេសត្រីនាំចូលពីប្រទេសវៀតណាម។ កសិករចិញ្ចឹមត្រីក៏ជំរុញចំណាត់ការផ្អាកការនាំចូលត្រីពីប្រទេសជិតខាង ឲ្យមានប្រសិទ្ធភាពបំផុត។
សេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី៨ ខែមករា ឲ្យដឹងថាកម្ពុជាផ្អាកនាំចូលត្រី ដែលវារីវប្បកម្មផលិតបាន តាមសំណើរបស់អាជីវករនាំចេញ នាំចូលផលិតផលជលផល។
លោក គង់ គឹមហុន ដែលចិញ្ចឹមត្រីប្រានិងត្រីពោក្នុងស្រុកពាមរក៍ ខេត្តព្រៃវែង មានប្រសាសន៍ថាតម្លៃត្រីដែលលោកទើបតែលក់ ពោលគឺកាលពីចុងឆ្នាំ២០២០ មានតម្លៃទាប គឺត្រីពោ ៥.៥០០ រៀលក្នុងមួយគីឡូក្រាម ដែលលោកថា វាគួរតែមានតម្លៃ ៧ពាន់ទៅ ៨ពាន់រៀល ក្នុងមួយគីឡូក្រាម។
កសិករអាយុ ៤ ០ឆ្នាំរូបនោះ បន្តថា ការចុះថ្លៃនេះ ដោយសារត្រីនាំចូលពីវៀតណាមមានតម្លៃថោកជាង។ លោកបញ្ជាក់ថាវៀតណាមនាំត្រីស្ទើរគ្រប់ប្រភេទចូលទីផ្សារកម្ពុជា ក្នុងនោះក៏មានត្រីដែលប្រជាពលរដ្ឋខ្មែរចិញ្ចឹមបានផងដែរ។
លោកមានប្រសាសន៍ថា៖ «បើគេបិទមែនទែន យើងចិញ្ចឹមនៅហ្នឹង កាន់តែល្អហើយ។ វាអត់សូវបារម្ភ អត់សូវភ័យរឿងត្រីគេយកមកអញ្ចឹង។ ហើយបើបុកជាមួយត្រីយើង ត្រីយើងលក់ថោកដូចគេអញ្ចឹង ខាតអីចឹងណា»។
លោកបន្តថា កន្លងទៅវៀតណាមបានដឹកត្រីតាមរថយន្តចូលមកកម្ពុជា ហើយប្រជាជនខ្មែរបានទិញត្រីនោះទៅលក់បន្ត ម្នាក់ ៥០គីឡូក្រាម ឬ១០០គីឡូក្រាម ដើម្បីដឹកចែកចាយលក់តាមភូមិនៅតាមផ្លូវជនបទ។
ចំណែកលោក ខៃ ហេង អាយុ៦០ឆ្នាំ ជាអ្នកចិញ្ចឹមត្រីម្នាក់ទៀតក្នុងស្រុកពាមរក៍ ខេត្តព្រៃវែង ឲ្យដឹងថា ត្រីប្រារបស់លោកដែលលក់ក្នុងខែធ្នូ ឆ្នាំ២០២០ មានតម្លៃ ៤ពាន់រៀលតែប៉ុណ្ណោះក្នុងមួយគីឡូក្រាម ដែលលោកថា គួរតែខ្ពស់ជាងហ្នឹង។ លោកបន្តថា ការធ្លាក់តម្លៃត្រីនេះ ដោយសារត្រីមានចំនួនច្រើន ជាពិសេសគឺត្រីនាំចូលពីប្រទេសវៀតណាម។
កសិករដែលចិញ្ចឹមត្រីប្រាជាង ២ម៉ឺនក្បាល ហើយប្រហែលអាចលក់បានក្នុងខែកក្កដាឆ្នាំនេះ មានប្រសាសន៍ថា៖ «ចង់បានការទប់ស្កាត់អញ្ចឹងដែរ សម្រាប់ឲ្យត្រីយើងបានថ្លៃ។ ខ្ញុំយល់ថា ល្អ។ ចំណាត់ការហ្នឹង ល្អ សម្រាប់កសិករយើង។ ដោយសារតែបើត្រីយើងផ្គត់ផ្គង់នៅក្នុងស្រុកយ៉ាងណា ក៏ត្រីយើងបានថ្លៃបន្តិចដែរ»។
កសិកររូបនោះឲ្យដឹងទៀតថា ការចិញ្ចឹមត្រីនៅតំបន់របស់លោកមានការកើនឡើង បើប្រៀបធៀបនឹងពេលមុន។ លោកបន្តថា តម្លៃត្រីប្រែប្រួលជាបញ្ហាមួយសម្រាប់កសិករខ្មែរ។
កសិករចិញ្ចឹមត្រីក្នុងស្រុកពាមរក៍នេះ បានលើកឡើងដូចៗគ្នាថា ចំណីសម្រាប់ចិញ្ចឹមត្រីរបស់ពលរដ្ឋខ្មែរត្រូវនាំចូលពីវៀតណាម ដែលនាំឲ្យត្រីដែលចិញ្ចឹមធំធាត់ថ្លៃជាងត្រីវៀតណាម ព្រោះចំណាយខ្ពស់ជាង។
VOA មិនទាន់អាចសុំការអត្ថាធិប្បាយពីលោក អេង ជាសាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផលបានទេ នៅថ្ងៃច័ន្ទនេះ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានប្រាប់កាសែតភ្នំពេញប៉ុស្តិ៍ថា ការផ្អាកនាំចូលត្រីមួយចំនួនក្នុងពេលនេះ គឺដើម្បីលើកកម្ពស់ទីផ្សារផលិតផលក្នុងស្រុក ខណៈកម្ពុជាចង់ជំរុញឲ្យមានវារីវប្បកម្មក្នុងស្រុកកាន់តែច្រើន។
លោកបន្តថា ក្រសួងលើកទឹកចិត្តដល់អ្នកវិនិយោគ ឲ្យវិនិយោគលើរោងចក្រផលិតចំណីសម្រាប់វិស័យវារីវប្បកម្មនៅកម្ពុជាផងដែរ។
លោក ថេង សាវឿន ប្រធានសម្ព័ន្ធសហគមន៍កសិករកម្ពុជា មានប្រសាសន៍ថា ចំណាត់ការផ្អាកការនាំចូលត្រីពីប្រទេសជិតខាងនេះ គួរតែធ្វើឡើងតាំងពីមុន ព្រោះកសិករចិញ្ចឹមត្រីបានត្អូញត្អែរយូរមកហើយ។
លោកបន្តថា ការបិទការនាំចូលត្រីពីក្រៅប្រទេសអាចឲ្យកសិករបង្កើនការចិញ្ចឹមក្នុងស្រុកដើម្បីផ្គត់ផ្គង់តម្រូវការនិងបង្កើនការរកចំណូលរបស់កសិករ។
លោកបញ្ជាក់ថា៖ «មិនមែនទាល់តែពេលប្រជាពលរដ្ឋលើកឡើងពីក្តីកង្វល់និងបញ្ហា ឬក៏ផលប៉ះពាល់ដែលកើតមានឡើង ដោយសារតែការនាំចូលត្រីពីបណ្តាប្រទេសជិតខាង ទើបធ្វើកិច្ចការងារនេះទេ»។
លោកបន្តថា សម្រាប់ត្រី សាច់ ម្ហូប និងបន្លែ កម្ពុជានៅតែពឹងដង្ហើមប្រទេសជិតខាងនៅឡើយ។
រដ្ឋាភិបាលកម្ពុជាកត់សម្គាល់ថា របរកសិកម្មមិនលូតលាស់ ដោយសារតែការវិនិយោគមានកម្រិតទាប ថ្លៃដើមខ្ពស់ បញ្ហារំខានបំផ្លាញដោយអាកាសធាតុមិនថេរនិងហេដ្ឋារចនាសម្ព័ន្ធនិងទីផ្សារនៅទន់ខ្សោយ។
ខណៈរដ្ឋាភិបាលកំពុងប្រឈមនឹងផលប៉ះពាល់ផ្នែកសេដ្ឋកិច្ចដោយសារជំងឺកូវីដ១៩ ដែលនាំឲ្យមនុស្សរាប់ម៉ឺននាក់បាត់បង់ការងារក្នុងវិស័យកាត់ដេរ និងវិស័យទេសចរណ៍ លោកនាយករដ្ឋមន្ត្រី ហ៊ុន សែន កន្លងមក បានប្រកាសឲ្យប្រជាពលរដ្ឋ ងាកមកប្រកបរបរខាងវិស័យកសិកម្មដាំដុះនិងចិញ្ចឹមសត្វ ដូចជាត្រីជាដើមវិញ៕
