ទីភ្នាក់ងារព័ត៌មាន Reuters រាយការណ៍ថា អាជ្ញាធរប្រទេសកូរ៉េខាងត្បូងកាលពីថ្ងៃអង្គារ បានបញ្ជាឲ្យបិទសាលារៀនស្ទើរតែទាំងអស់ក្នុងទីក្រុងសេអ៊ូលនិងតំបន់ជុំវិញទីក្រុងនេះ ហើយត្រូវបើកការបង្រៀនសិស្សតាមប្រព័ន្ធអនឡាញវិញ។ នេះជាវិធានការប្រុងប្រយ័ត្នចុងក្រោយបំផុតក្នុងការប្រយុទ្ធប្រឆាំងការកើនឡើងវិញនៃករណីឆ្លងរាតត្បាតកូវីដ១៩។
មជ្ឈមណ្ឌលជាតិគ្រប់គ្រងជំងឹឆ្លងរបស់កូរ៉េខាងត្បូង បានរកឃើញការឆ្លងកូវីដ១៩ចំនួន២៨០ករណីថ្មី ត្រឹមយប់ថ្ងៃចន្ទ ដែលចំនួននេះបានធ្វើឲ្យចំនួនអ្នកឆ្លងទាំងអស់នៅកូរ៉េខាងត្បូងមានចំនួនសរុបជិត១៨.០០០ករណី និងមានអ្នកស្លាប់សរុប៣១០នាក់រហូតមកដល់ពេលនេះ។ នេះជាចំនួនប្រចាំថ្ងៃថយចុះពីថ្ងៃសៅរ៍ ដែលមានប្រមាណ៣៩៧នាក់ ដែលជាចំនួនខ្ពស់ជាងគេគិតចាប់ពីដើមខែមីនាមក។
ដោយករណីឆ្លងថ្មីៗភាគច្រើនកើតមាននៅតាមតំបន់រដ្ឋធានីសេអ៊ូលដែលមានពលរដ្ឋរស់នៅច្រើនកកកុញនោះ អាជ្ញាធរសុខាភិបាលកូរ៉េខាងត្បូងថា ប្រទេសមួយនេះ កំពុងឈានជិតការផ្ទុះឡើងវិញទូទាំងប្រទេសនូវជំងឺកូវីដ១៩ ហើយបានអំពាវនាវឲ្យពលរដ្ឋទាំងអស់ស្ថិតនៅក្នុងផ្ទះនិងកាត់បន្ថយការធ្វើដំណើររបស់ខ្លួន។
ក្រសួងអប់រំប្រទេសកូរ៉េខាងត្បូងបានលើកឡើងនៅថ្ងៃអង្គារថា សិស្សានុសិស្សទាំងអស់ លើកលែងសិស្សថ្នាក់ទី១២ ដែលក្នុងទីក្រុងសេអ៊ូល ទីក្រុង Incheon និងខេត្ត Geonggi ត្រូវសិក្សាតាមប្រព័ន្ធអនឡាញចាប់ពីថ្ងៃទី១១ ខែកញ្ញាតទៅ៕
