ក្រុមពន្លត់អគ្គិភ័យនៅក្នុងរដ្ឋបីនៅភាគខាងលិចសហរដ្ឋអាមេរិក កំពុងបន្តពន្លត់ភ្លើងឆេះព្រៃដ៏ប្រល័យមួយ ដែលបង្កឲ្យមានផ្សែងអ័ព្ទរសាត់រាប់ពាន់គីឡូម៉ែត្រពាសពេញប្រទេស មកដល់បូរី New York និងរដ្ឋធានី Washington ក៏ដូចជាឆ្លងប្រទេសទៅដល់ទ្វីបអឺរ៉ុប និងប្រទេសម៉ិកស៊ិកផងដែរ។
អគ្គិភ័យនេះ បានកើតឡើងដោយសារអាកាសធាតុក្តៅ និងខ្យល់ក្ដៅប៉ុន្មានសប្ដាហ៍ជាប់គ្នា ហើយវាបានឆាបឆេះបំផ្លាញផ្ទៃដីប្រមាណ ១,៨លានហិកតា ក្នុងរដ្ឋ Oregon រដ្ឋ Washington និងរដ្ឋ California។ មនុស្សសរុប ៣៥ នាក់ត្រូវបានរាយការណ៍ថាបានបាត់បង់ជីវិតដោយសារភ្លើងឆេះព្រៃក្នុងរដ្ឋទាំងបីនេះ។
មន្ត្រីបរិស្ថានប្រចាំរដ្ឋ Oregonបានចាត់ទុកគុណភាពខ្យល់នៅទូទាំងរដ្ឋ Oregon ក្នុងកម្រិត «គ្រោះថ្នាក់» និង «មិនល្អខ្លាំង»។ បើយោងតាមអាជ្ញាធរអាកាសាធាតុជាតិ តាមទីតាំងមួយចំនួនការមើលឃើញមានចម្ងាយតិចជាងកន្លះគីឡូម៉ែត្រ ដែលបង្កឲ្យមានគ្រោះថ្នាក់ក្នុងពេលបើកបរ។
នៅរដ្ឋ California ភ្លើងឆេះព្រៃបានសម្លាប់មនុស្សយ៉ាងហោចណាស់ ២៥ នាក់ ឆេះកម្ទេចផ្ទះជាង ៤.២០០ ខ្នង អគារមួយចំនួន និងបំផ្លាញផ្ទៃដី ១,២ហិកតា ដែលនេះជាកំណត់ត្រានៃការបំផ្លិចបំផ្លាញច្រើនជាងពេលណាទាំងអស់ក្នុងប្រវត្តិសាស្ត្ររដ្ឋនេះ។
បើយោងតាមរដ្ឋបាលព្រៃឈើជាតិរបស់អាមេរិក ក្រុមអ្នកពន្លត់អគ្គិភ័យនៅក្នុងទីក្រុង Los Angeles ទទួលបានជោគជ័យក្នុងការពន្លត់ភ្លើង ដែលបានចូលមកកៀកត្រឹមតែចម្ងាយ ១៥០ម៉ែត្រប៉ុណ្ណោះពី ទីតាំងមើលផ្កាយ Mount Wilson Observatory៕
