ភ្ជាប់​ទៅ​គេហទំព័រ​ទាក់ទង

អគ្គិភ័យ​ឆេះ​កម្ចេច​រោងចក្រ​ផលិត​ក្រដាស​មួយ​​​​នៅ​ភ្នំពេញ​

  • គង់ សុឋានរិទ្ធ

រោងចក្រ​ផលិត​ក្រដាស​មួយ​ដែល​មាន​ឈ្មោះ​ថា​រោងចក្រ​អន្តរជាតិ​ផលិត​ក្រដាស​នៅ​ក្នុង​ភូមិ​ត្រពាំងជ្រៃ ខណ្ឌ​សែនសុខ ​រាជធានី​ភ្នំពេញ ត្រូវ​អគ្គីភ័យ​ឆេះ​បំផ្លាញ​ខ្ទេច​ទាំង​ស្រុង​រហូត​មក​ទល់​នឹង​ថ្ងៃ​អង្គារ​ ទី​០៣ ធ្នូ នេះ។
រោងចក្រ​ផលិត​ក្រដាស​មួយ​ដែល​មាន​ឈ្មោះ​ថា​ រោងចក្រអន្តរជាតិ​ផលិត​ក្រដាសនៅ​ក្នុង​ភូមិ​ត្រពាំងជ្រៃ ​ខណ្ឌ​សែនសុខ​ រាជធានី​ភ្នំពេញ​ ត្រូវ​អគ្គិភ័យ​ឆាបឆេះ​បំផ្លាញ​ខ្ទេច​ទាំង​ស្រុងរហូត​មក​ទល់​នឹង​ថ្ងៃអង្គារ​នេះ។ (ចុច​មើល​រូបភាព)

កម្មករ​រោងចក្រ​សរុប​ជាង​១០០​នាក់​ត្រូវ​បាន​ជម្លៀស​ចេញ​ទាន់​ពេលវេលា​ដោយ​មិន​មាន​កម្មករ​ឬ​បុគ្គលិក​ណា​ម្នាក់​ទទួល​រង​គ្រោះថ្នាក់​នោះ​ទេ។

ប៉ុន្តែ​ការ​ខូចខាត​ត្រូវ​ប៉ាន់​ប្រមាណ​ថា​ យ៉ាងតិច​ចំនួន​បួន​លាន​ដុល្លារ​អាមេរិក។​

អគ្គិភ័យ​បាន​ចាប់​ផ្តើម​ឆាប​ឆេះ​នៅ​វេលា​ម៉ោង​ប្រមាណ​ជិត​៥​រសៀល​ថ្ងៃ​ច័ន្ទ​នៅ​ពេល​ដែល​កម្មករ​រោងចក្រកំពុង​រៀប​ចំ​ចាក​ចេញ​ពី​ការងារ។

កង​ប៉ូលិស​បាន​ប្រើ​រថយន្ត​ពន្លត់​អគ្គិភ័យ​ចំនួន​២៨​គ្រឿង​ ក៏ប៉ុន្តែ​មិន​អាច​គ្រប់គ្រង​អណ្តាត​ភ្លើង​បាន​នោះ​ទេ។

លោក​វរៈសេនីយ៍​ទោ ​នេត្រ​ វន្ថា​ ប្រធាន​ការិយាល័យ​បង្ការ ​ពន្លត់​អគ្គិភ័យ​នៃ​ស្នងការដ្ឋាន​នគរបាលរាជធានី​ភ្នំពេញ​មាន​ប្រសាសន៍​នៅ​កន្លែង​កើតហេតុ​ថា​មូលហេតុ​នៃ​អគ្គិភ័យ​បណ្តាល​មកពី​ការ​ផ្ទុះ​ចរន្ត​អគ្គិសនី។​

ដុំ​ក្រដាស​ធំ​ដែល​មាន​ក្រដាស​រមូរុំ​បញ្ចូល​គ្នា​បាន​ឆេះ​ងុំ​និង​បន្ត​ឆេះ​ខ្លះ​ទៀត​រហូត​មក​ទល់​នឹង​ម៉ោង​១២​ថ្ងៃត្រង់​ថ្ងៃអង្គារ​នេះ។

អគារ​រោងចក្រ ​ផ្នែក​រដ្ឋាបាល​ត្រូវ​ឆេះ​ទាំង​ស្រុង។​ដែក​ដំបូល​អគារ​រោង​ចក្រ​បាក់​ធ្លាក់​មក​ដល់​ដី ​ផ្ទាំង​កញ្ចក់​បង្អួច​និង​កញ្ចក់​ទ្វារ​ផ្ទុះបែក​ រីឯ​ដុំរ​មូ​ក្រដាស់​ឆេះ​ក្លាយ​ជា​ផេះ​ស្ទើរ​គ្មាន​សល់ ​មាន​តែ​ដុំ​ក្រដាស​តិចតួច​បំផុត​ត្រូវ​ជម្លៀស​ចេញ​មក​ទីធ្លា​ខាង​ក្រៅ​អគារ​រោងចក្រ។

លោកស្រី​ម្នាក់​ដែល​ក្រុម​កម្មករ​និង​បុគ្គលិក​បង្ហាញ​ថា​ជា​ថៅ​កែ​រោង​ចក្រ​បាន​ផ្តល់​បទ​សម្ភាស​ដល់​វីអូអេ​សំឡេង​សហរដ្ឋ​អាមេរិក​ជា​ខេមរៈ​ភាសានៅ​ទីតាំង​រោងចក្រ​ដែល​នៅ​មាន​អណា្តត​ភ្លើង​នៅ​ឡើយ។​ ប៉ុន្តែ​លោក​ស្រី​ព្យាយាម​មិន​បង្ហាញ​ឈ្មោះ​របស់​ខ្លួន។

«គ្រាន់​តែ​ក្នុង​ឃ្លាំង​ក្រដាស​ស្តុក​គឺ​ជាង​២លាន​ដុល្លារ​ហើយ។​ ម៉ាស៊ីន​ជាង​២លាន​ដុល្លារ​ដែរ។ នេះ​ជា​ញើស​ឈាម​ខ្ញុំ​មួយ​ជីវិត​នៅ​ក្នុង​នេះ។ ខាត​ទាំង​អស់។ រលំ​គ្មាន​សល់​អី​មួយ​ទេ»។

លោក​វរៈសេនីយ៍​ទោ ​នេត្រ​ វន្ថា ​ប្រធាន​ការិយាល័យ​បង្ការ​ ពន្លត់​អគ្គិភ័យ​ មាន​ប្រសាសន៍​ថា​ភូមិសាស្ត្រ​រោងចក្រ​មិន​អនុគ្រោះ​ដល់​ការ​ចល័ត​រថយន្ត​ចូល​ពន្លត់​អគ្គិភ័យ។ ​មួយ​វិញ​ទៀត​ដុំ​ក្រដាស​ឆេះងុំ​មិនងាយ​នឹង​ពន្លត់។

«ពិបាក​ចល័ត​ឡាន​និង​ទី២​ដោយសារ​ដុំ​ក្រដាស​ដែល​ងាយ​ឆេះ។​ បើ​យើង​ប្រើ​ទឹក​តែ​មួយ​ឡាន​ដូច​ជះ​ទឹក​មួយ​ផ្តិល​លើ​សំរាម។​ ពេល​យើង​អស់​ទឹក​ឆេះ​ទៀត។​ ចាប់​តាំង​ពី​ម៉ោង​៥​ល្ងាច​មក​ទល់​ម៉ោង​១១​យើង​នៅ​តែ​ប្រតិបត្តិការ»។

លោក​ ជា ​មុន្នី ​ប្រធាន​សហជីព​សេរី​កម្មករ​នៃ​ព្រះ​រាជា​ណាច​ក្រ​កម្ពុជា​អធិប្បាយ​ថា ​ការ​ឆេះ​រោងចក្រ​ផលិត​ក្រដាស​ខាង​លើ​អាច​បណ្តាល​មកពី​កង្វះ​ការ​ត្រួត​ពិនិត្យ​ដោយ​មាន​ប្រសិទ្ធភាព​របស់​ភ្នាក់ងារ​មាន​សមត្ថកិច្ច​របស់​រដ្ឋាភិបាល​ទាក់​ទង​នឹង​ការ​ធានា​សុវត្ថិភាព​ការងារ​និង​ក្នុង​រោង​ចក្រ។

កាលពី​ពេល​កន្លង​ទៅ​រោងចក្រ​មួយ​នៅ​ក្នុង​ស្រុក​គងពិសី​ ខេត្ត​កំពង់​ស្ពឺ​បាន​បាក់​រលំ​និង​សង្កត់​កម្មករ​បណ្តាល​ឲ្យ​មាន​មនុស្ស​របួស​និង​ស្លាប់​មួយ​ចំនួន៕
XS
SM
MD
LG