ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្មេង​ប្រុស​ទី ៥ ត្រូវ​បាន​ជួយ​សង្គ្រោះ​ចេញ​ពី​រូង​ភ្នំ​នៅ​ប្រទេស​ថៃ


បដា​ដែល​សរសេរ​ថា «ស្វាគមន៍​មក​ផ្ទះ​វិញ ក្មេងៗ» ត្រូវ​បាន​ដាក់​នៅ​តាម​ផ្លូវ បន្ទាប់​ពី​កិច្ចខិតខំ​ប្រឹងប្រែង​ក្នុង​ការ​ជួយ​សង្គ្រោះ​បាន​ចាប់​ផ្តើម​សម្រាប់​ក្មេង​ទាំង​១២នាក់ និង​គ្រូ​បង្វឹក​របស់​គាត់ ដែល​ជាប់​នៅ​ក្នុង​រូង​ភ្នំ Tham Luang ប្រទេស​ថៃ កាលពី​ថ្ងៃទី៩ ខែកក្កដា ឆ្នាំ២០១៨។
បដា​ដែល​សរសេរ​ថា «ស្វាគមន៍​មក​ផ្ទះ​វិញ ក្មេងៗ» ត្រូវ​បាន​ដាក់​នៅ​តាម​ផ្លូវ បន្ទាប់​ពី​កិច្ចខិតខំ​ប្រឹងប្រែង​ក្នុង​ការ​ជួយ​សង្គ្រោះ​បាន​ចាប់​ផ្តើម​សម្រាប់​ក្មេង​ទាំង​១២នាក់ និង​គ្រូ​បង្វឹក​របស់​គាត់ ដែល​ជាប់​នៅ​ក្នុង​រូង​ភ្នំ Tham Luang ប្រទេស​ថៃ កាលពី​ថ្ងៃទី៩ ខែកក្កដា ឆ្នាំ២០១៨។

ក្មេង​ប្រុស​ទី ៥ ត្រូវ​បាន​ជួយ​សង្គ្រោះ​ចេញ​ពី​រូង​ភ្នំ​នៅ​ប្រទេស​ថៃ និង​បាន​បញ្ជូន​ទៅ​ព្យាបាល​នៅ​មន្ទីរពេទ្យ​នៅ​ថ្ងៃ​ចន្ទ​នេះ។ នេះ​បើ​យោង​តាម​សេចក្ដី​រាយការណ៍​របស់​ប្រព័ន្ធ​ផ្សព្វផ្សាយ​នានា។

ក្រុម​អ្នក​ជួយ​សង្គ្រោះ​នៅ​ក្នុង​ប្រទេស​ថៃ​បាន​ចាប់ផ្ដើម​ប្រតិបត្តិការ​ជួយ​សង្គ្រោះ​ម្ដង​ទៀត​នៅ​ថ្ងៃ​ចន្ទ​នេះ ដើម្បី​ជួយ​យក​ក្មេង​ប្រុស និង​គ្រូ​បង្វឹក​របស់​ពួកគេ​ចេញ​ពី​រូង​ភ្នំ​ដែល​ពួកគេ​បាន​ជាប់​គាំង​នៅ​ទី​នោះ​ដោយសារ​ជំនន់​ទឹក​ភ្លៀង​អស់​រយៈពេល​ជាង ២ សប្ដាហ៍​មក​ហើយ។

រដ្ឋមន្ត្រី​ក្រសួង​មហាផ្ទៃ​ថៃ​លោក Anupong Paojina បាន​និយាយ​ថា អ្នក​មុជ​ទឹក​ដដែល ដែល​បាន​ចូលរួម​នៅ​ក្នុង​ប្រតិបត្តិការ​ជួយ​សង្គ្រោះ​កាល​ពី​ថ្ងៃ​អាទិត្យ​ម្សិលមិញ គឺ​ជា​អ្នក​ដែល​បាន​ចូលរួម​នៅ​ក្នុង​ប្រតិបត្តិការ​ជួយ​សង្គ្រោះ​នៅ​ថ្ងៃ​ចន្ទ​នេះ ដោយសារតែ​ពួកគេ​ដឹង​អំពី​ស្ថានភាព​របស់​រូង​ភ្នំ​នោះ។

កាល​ពី​ថ្ងៃ​អាទិត្យ​ម្សិលមិញ អ្នក​មុជ​ទឹក​បាន​ជួយ​សង្គ្រោះ​ក្មេង​ប្រុស ៤ នាក់ ក្នុង​ចំណោម​ក្មេង​ចំនួន ១២ នាក់ និង​គ្រូ​បង្វឹក​ម្នាក់​ដែល​ជាប់​គាំង​នៅ​ក្នុង​រូង​ភ្នំ​នោះ។

ភ្លៀង​មូសុង​បាន​ចាប់ផ្ដើម​ធ្លាក់​ម្ដង​ទៀត​ហើយ ដោយ​បណ្ដាល​ឲ្យ​កម្ពស់​ទឹក​នៅ​ក្នុង​រូង​ភ្នំ​នោះ​កើន​ឡើង និង​បណ្ដាល​ឲ្យ​កម្រិត​ខ្យល់​អុកស៊ីហ្សែន​នៅ​ក្នុង​រូង​ភ្នំ​នោះ​ធ្លាក់​ចុះ។

អ្នក​មុជ​ទឹក​អន្តរជាតិ ១៣ នាក់ និង​អ្នក​មុជ​ទឹក​ថៃ ៥ នាក់ បាន​ចូលរួម​នៅ​ក្នុង​ប្រតិបត្តិការ​ជួយ​សង្គ្រោះ​នេះ។

ក្មេង​ប្រុស​ដែល​បាន​ជួយ​សង្គ្រោះ​ម្នាក់ៗ​គឺ​ត្រូវ​បាន​មុជ​ទឹក​អម​ដំណើរ​ដោយ​អ្នក​មុជ​ទឹក ២ នាក់ កាត់​តាម​រូង​ភ្នំ​លិច​ទឹក​ដ៏​ចង្អៀត និង​ក្រវៀចក្រវៀន។ អ្នក​មុជ​ទឹក​ទាំង​នោះ​ត្រូវ​ចំណាយ​ពេល​ប្រហែល ៨ ម៉ោង ដើម្បី​អាច​ចូល​ទៅ​ដល់​កន្លែង​ដែល​ក្មេងៗ​ទាំង​នោះ​នៅ​បាន និង​នាំ​ក្មេងៗ​ទាំង​នោះ​ចេញ​មក​ខាង​ក្រៅ​រូង​ភ្នំ​វិញ៕

XS
SM
MD
LG