ភ្ជាប់​ទៅ​គេហទំព័រ​ទាក់ទង

ការិយាល័យ​ស៊ើប​អង្កេត​របស់​សហព័ន្ធ​ធ្វើការ​ស៊ើប​អង្កេត​ជា​ផ្លូវ​ការ​​អំពីការ​សម្លាប់រង្គាល​នៅ​រដ្ឋ​ California


លោក​ James Comey ​ប្រធាន​ការិយាល័យ​ស៊ើប​អង្កេត​របស់​សហព័ន្ធ ​FBI បកស្រាយ​ពី​ការ​សម្លាប់​រង្គាល​នៅ​រដ្ឋ​ California ទៅ​កាន់​សន្និសីទសារព័ត៌មាន​នៅ​រដ្ឋធានីវ៉ាស៊ីនតោន​ នា​ថ្ងៃ​ទី ០៤ ខែ​ធ្នូ ឆ្នាំ​២០១៥។

ការិយាល័យ​ស៊ើប​អង្កេត​របស់​សហព័ន្ធ​ស.រ.អា FBI ​បាន​ធ្វើការ​ស៊ើប​អង្កេត​ជា​ផ្លូវ​ការ​កាល​ពី​ថ្ងៃ​ពុធ​អំពីការ​សម្លាប់រង្គាល​ប្រព្រឹត្ត​ដោយ​ប្តីប្រពន្ធ​ពីរ​នាក់នៅ​ការិយាល័យ​ផ្តល់​សេវាកម្ម​មួយ​នៅ​រដ្ឋ California​ ហើយ​បាន​កំណត់ថា​ នេះ​ជា​អំពើ​ភេរវកម្ម។ ​

លោក David Bowdich ជំនួយការ​ការិយាល័យ​ FBI ​នៅ​ទីក្រុង Los Angeles ​បាន​និយាយ​កាលពី​ថ្ងៃសុក្រ​ម្សិលមិញ​ថា​ មាន​ភស្តុតាង​មួយ​ចំនួន​ត្រូវបាន​រក​ឃើញ ​ដែល​បង្ហាញថា​ ការបាញ់​ប្រហារ​នោះ​ជា​អំពើភេរវកម្ម ​ដូចជា​សញ្ញាបង្ហាញថា​ អ្នកទាំង​ពីរនេះមាន​ផែនការ​ធ្វើ​សកម្មភាព​ទ្រង់ទ្រាយធំជា​ដើម។​ លោក​មិន​និយាយ​លម្អិត​អំពី​ភស្តុតាង​នោះ​ទេ ​តែ​លោក​គ្រាន់តែ​ប្រាប់ថា​ សញ្ញានោះ​មានដូចជា ​ទូរស័ព្ទ​ដៃ​ដែល​គេបំផ្លាញ​ចោល​ក្នុងធុង​សំរាម។​ លោក​ប្រាប់ថា ​មាន​ការហៅ​ទូរស័ព្ទ​រវាង​ជន​សង្ស័យ ​និង​អ្នក​ផ្សេង​ទៀត​ ដែលអាច​បង្ហាញ​សញ្ញា​បន្ថែម​ទៀត។ ​

ក្នុង​ពេល​ជាមួយ​គ្នានេះ​ដែរនៅ​ស.រ.អា​មានពាក្យស្លោក​និយាយ​ថា ​បើ​ឃើញ​មាន​អ្វី​សង្ស័យ​ សូម​រាយ​ការណ៍។ នេះជាពាក្យស្លោកប្រឆាំង​ភេរវកម្ម​នៅ​ស.រ.អា ដែល​អំពាវនាវ​ឲ្យពលរដ្ឋ​សាមញ្ញ​ទូរស័ព្ទ​ប្រាប់​ប៉ូលិស​ជាបន្ទាន់​ ប្រសិនបើ​គេ​ឃើញ​អ្វី​មួយ​មិន​ធម្មតា​ក្នុងសកម្មភាព​ជា​រៀងរាល់​ថ្ងៃ ​ទោះ​ជា​របស់​នោះមើល​ទៅ​ហាក់​ដូចជា​ មិន​បង្កគ្រោះ​ថ្នាក់​ក៏ដោយ ​ឧទាហរណ៍​ដូចជា​ វ៉ាលីស​ដែល​គេ​ទុកចោល ប្រអប់ ឬ​ដប​ដែល​មាន​វត្ថុរាវចម្លែក។ ​

លោក​ James Comey ​ប្រធាន​ការិយាល័យ​ស៊ើប​អង្កេត​របស់​សហព័ន្ធ ​FBI និយាយ​ថា ​លោក​ដឹង​ថា​ ឧបទ្ទវហេតុ​ដូចជា​ការបាញ់​ប្រហារ​សម្លាប់រង្គាល​នៅរដ្ឋ​ California កាល​ពី​ថ្ងៃ​ពុធ​នោះ​ គឺ​ជា​អំពើ​នាំ​ឲ្យ​មាន​ការព្រួយ​បារម្ភ។ កាល​ពី​ថ្ងៃ​សុក្រ​ម្សិលមិញ ​លោក​បាន​ជំរុញ​ឲ្យ​ពលរដ្ឋ​អាមេរិកាំងកុំបែក​អារម្មណ៍​ និង​មិន​ហ៊ាន​ធ្វើការងារអ្វី​ដោយ​សារតែ​ការភ័យខ្លាច។​ លោកនិយាយ​ថា ​ប្រសិនបើ​លោក​អ្នក​ឃើញ​អ្វី​មិន​ទំនង ​សូមលោក​អ្នក​សួរ​អ្នក​នៅ​ជិត​នោះ​ថា​ វាជារបស់អ្នក​នោះ​ ឬយ៉ាងណា​ ឬ​រាយការណ៍​ប្រាប់​អាជ្ញាធរ​មានសមត្ថ​កិច្ច។ ​បើពិនិត្យមើល​ករណី​ក្នុង​ស.រ.អា យើង​ឃើញ​ថា ​នៅ​ពេល​នរណា​ម្នាក់​ឃើញ​អ្វីមួយ​ចម្លែក ​ទោះ​ជា​មិន​ដឹង​ថា វា​ជា​របស់​សមាជិក​គ្រួសារ​ ឬមិត្តភក្តិ ​និង​សហការី​ក៏​ដោយ ​គេ​មិន​រាយការណ៍​ប្រាប់​អាជ្ញាធរ​ពង្រឹង​ច្បាប់​ទេ។​អ្នកជំនាញ​ខាង​ភេរវកម្ម និងអំពើ​ជ្រុល​និយម​និយាយថា ​នេះជា​បញ្ហាគួរ​ឲ្យបារម្ភ​ជា​ពិសេស។តែជនសង្ស័យ​ឈ្មោះ​ Syed Farook ​និង​ប្រពន្ធឈ្មោះ ​Tashfeen Malik ទំនង​ជា​មនុស្ស​ធម្មតា ​ស្ងប់ស្ងៀម និង​មាន​កូនស្រី​អាយុ​៦​ខែ។ មិនមាន​របាយ​ការណ៍​ថា ​អ្នក​ទាំងពីរ​នេះ​បង្ហាញ​សកម្មភាព​គឃ្លើន​ គាំទ្រ​ក្រុម​ជ្រុល​និយមទេ។ ​ពួកគេ​ក៏​មិន​ដែល​និយាយ​ជា​ចំហ​អំពី​ភេរវកម្ម ឬ​អំពី​ពួករដ្ឋឥស្លាម ​ដែល​នាំ​ឲ្យ​មាន​ការ​សង្ស័យនោះទេ។​លោក​ James និយាយ​ថា ​ដោយហេតុ​នេះ​ហើយ​បាន​ជា​គ្មាន​សញ្ញា​អ្វី​នាំ​ឲ្យ​ឃាតករ​ទាំងពីរ​នេះ​ស្ថិត​នៅ​ក្រោម​ការ​តាមដាន​របស់​ FBI៕

XS
SM
MD
LG