ភ្ជាប់​ទៅ​គេហទំព័រ​ទាក់ទង

FBI ចាប់​ខ្លួន​បុគ្គលិក​ជាប់​កុងត្រា​របស់​ទីភ្នាក់ងារ​សន្តិសុខ​ជាតិ​ពី​បទ​លួច​លេខ​កូដ​សម្ងាត់


រូបភាព​នេះ​បង្ហាញ​ពី​បរិវេណ​នៃ​ទីភ្នាក់ងារ​សន្តិសុខ​ជាតិ នៅ​ក្នុង​ក្រុង Fort Meade។

បុគ្គលិក​ជាប់​កុងត្រា​របស់​ទីភ្នាក់ងារ​សន្តិសុខ​ជាតិ​មួយ​រូប​ត្រូវ​បាន​ចាប់​ខ្លួន​ហើយ​កំពុង​ស្ថិត​ក្រោម​ការ​ស៊ើប​អង្កេត​ពី​បទ​លួច​យក​ព័ត៌មាន​សម្ងាត់​ នេះ​បើ​យោង​តាម​សេចក្តី​ថ្លែង​ការណ៍​មួយ​របស់​ក្រសួង​យុត្តិធម៌។​

ជន​សង្ស័យ​អាយុ​ ៥១ឆ្នាំ ឈ្មោះ​ថា​ Harold Thomas Martin III រស់​នៅ​ទីក្រុង​ Glen Burnie រដ្ឋ​ Maryland ត្រូវ​បាន​ចាប់​ខ្លួន​កាល​ពី​ចុង​ខែ​សីហា​ ហើយ​គាត់​គឺ​ជា​បុគ្គល​ដែល​មាន​សិទ្ធិ​ក្នុង​ការ​ទទួល​ព័ត៌មាន​សម្ងាត់​ជាន់​ខ្ពស់​របស់​ជាតិ​ផង​ដែរ នេះ​បើ​យោង​តាម​សេចក្តី​ថ្លែង​ការណ៍​នោះ។​

សេចក្តី​ថ្លែង​ការណ៍​នោះ​មិន​បាន​បញ្ជាក់​អំពី​សារជាតិ​ ឬ​បរិមាណ​នៃ​ព័ត៌មាន​ដែល​ត្រូវ​លួច​នោះ​ទេ​ ប៉ុន្តែ​បាន​លើក​ឡើង​ពី​ឯកសារ​ចំនួន​៦​ ដែល​ទាញ​យក​ពី​ប្រភព​ព័ត៌មាន​សម្ងាត់​ ហើយ​ដែល​ចងក្រង​ឡើង​ដោយ​ទីភ្នាក់ងារ​រដ្ឋាភិបាល​កាលពី​ឆ្នាំ​២០១៤។​

បន្ទាប់​ពី​ធ្វើ​ការ​ត្រួត​ពិនិត្យ​ឡើង​វិញ​ ក្រុម​ស៊ើប​អង្កេត​បាន​រក​ឃើញ​ថា​ ឯកសារ​ទាំង​នោះ​ត្រូវ​បាន​គេ​ចាត់​ទុក​ថា​ជា​ឯកសារ​សម្ងាត់​កំពូល​ ដែល​នេះ​មាន​ន័យ​ថា​ ការ​លាត​ត្រដាង​ឯកសារ​សម្ងាត់​ទាំង​នោះ​អាច​នឹង​ធ្វើ​ឲ្យ​ប៉ះពាល់​ធ្ងន់ធ្ងរ​ដល់​សន្តិសុខ​ជាតិ​របស់​អាមេរិក។

កាសែត The New York Times បាន​រាយការណ៍​មក​ថា​ បុគ្គលិក​ជាប់​កុង​ត្រា​រូប​នេះ​ត្រូវ​បាន​គេ​សង្ស័យ​ថា​បាន​លួច​យក​លេខ​កូដ​សម្ងាត់​របស់​ទីភ្នាក់ងារ​សន្តិសុខ​ជាតិ​ ដើម្បី​វាយលុក​ចូល​ក្នុង​ប្រព័ន្ធ​កុំព្យូទ័រ​របស់​រដ្ឋាភិបាល​បរទេស​មាន​ដូចជា​ រុស្ស៊ី​ ចិន​ អ៊ីរ៉ង់​ និង​កូរ៉េ​ខាង​ត្បូង​ជា​ដើម៕

XS
SM
MD
LG