មន្រ្តីសុខភាពកំពូលម្នាក់របស់អាមេរិក និយាយថា លោកនឹងប្រាប់គណៈកម្មាធិការសភានៅថ្ងៃអង្គារនេះពីភាពគ្រោះថ្នាក់នៃការលុបចោលការរឹតត្បិតនៃមេរោគកូរ៉ូណាឆាប់រហ័សពេក។
វេជ្ជបណ្ឌិត Anthony Fauci នាយកវិទ្យាស្ថានជំងឺឆ្លងសហរដ្ឋអាមេរិក ប្រាប់កាសែត The New York Times ថា សាររបស់លោកទៅកាន់សមាជិកសភាគឺថា បើប្រទេសនេះ រំលងចំណុចឆែកឆេរក្នុងផែនការដែលមាន៣ដំណាក់កាលរបស់សេតវិមាន «យើងប្រឈមភាពគ្រោះថ្នាក់នៃការផ្ទុះដ៏ខ្លាំងនៃមេរោគកូរ៉ូណាទូទាំងប្រទេស»។
លោកវេជ្ជបណ្ឌិត Fauci បានមានប្រសាសន៍ទៀតថា «ការណ៍នេះនឹងមិនត្រឹមតែធ្វើឲ្យមានការឈឺចាប់ និងស្លាប់ប៉ុណ្ណោះទេ ក៏ប៉ុន្តែប្រាកដនឹងធ្វើឲ្យអូសបន្លាយពេលដល់ការស្វែងរករបស់យើងធ្វើឲ្យមានភាពប្រក្រតីឡើងវិញ»។
មន្រ្តីសុខាភិបាលបានព្រមានអស់ជាច្រើនសប្តាហ៍ហើយថា ការបន្ធូរបន្ថយការរឹតត្បិតស្ថិតនៅផ្ទះនិងការអនុញ្ញាតឲ្យពាណិជ្ជកម្មបន្តប្រតិបត្តិការឡើងវិញដ៏ឆាប់រហ័ស អាចនាំឲ្យមានឡើងវិញនូវជំងឺកូវីដ១៩ទាំងធ្វើឲ្យគ្រោះថ្នាក់ដល់សុខភាពសាធារណៈ និងគ្រោះថ្នាក់ដល់ការខំប្រឹងប្រែងរបស់រដ្ឋបាលប្រធានាធិបតីត្រាំដើម្បីចាប់ផ្តើមសកម្មភាពសេដ្ឋកិច្ចឡើងវិញ។
លោក Fauci ជាមន្រ្តីកំពូលម្នាក់នៃមន្រ្តីកំពូល៤នាក់មានគម្រោងបង្ហាញខ្លួននៅពីមុខគណៈកម្មាធិការសុខាភិបាល អប់រំ ការងារ និងប្រាក់ចូលនិវត្តន៍របស់ព្រឹទ្ធសភាសម្រាប់សវនាការដែលមានឈ្មោះថា «សុវត្ថិភាពត្រឡប់ទៅការងារ និងត្រឡប់ទៅសាលារៀនវិញ»។
សាកលវិទ្យាល័យ Jons Hopkins បានប្រាប់ឲ្យដឹងថា សហរដ្ឋអាមេរិកមានការឆ្លងមេរោគកូរ៉ូណា១លាន៣សែនករណី និងមនុស្សស្លាប់ជាង៨ម៉ឺននាក់៕
